Amos 3
3
Fade Nzapa ayeke hunda na azo ti lo peko ti asioni ye so ala sara
1Ala azo ti Israel, ala azo ti sewa
so *KOTA GBIA asara si ala sigigi na Ezipte,
ala ma tënë so lo tene na tere ti ala, lo tene:
2“Na popo ti asewa kue ti sese so,
gi ala oko laa mbi soro ala.
Ndani laa fade mbi yeke hunda na ala
titene ala fa na mbi peko ti asioni ye so kue ala sara.”
KOTA GBIA atene tënë, wayanga-Nzapa ayeke kai pepe
3Tongana azo use ama tere kozoni pepe,
ala lingbi ti tambula na lege gere oko?
4Tongana bamara ade ti wara nyama ti te pepe,
lo lingbi ti toto na ya ti gbako?
Tongana kete bamara ade ti gbu nyama pepe,
lo lingbi ti toto na ndo so lo lango daa?
5Tongana a zia mbeni kobe na yanga ti kuku pepe,
ndeke alingbi ti ti na ya ti kuku ni?
Tongana kuku agbu mbeni ye pepe,
lo lingbi ti londo na nduzu?
6Tongana a huru didi na ya ti mbeni gbata
ti fa tënë ti bira,
fade mbeto alingbi ti gbu azo pepe?
Tongana kpale asi na ya ti mbeni gbata,
*KOTA GBIA laa asara ye ni pepe?
7Biani, kozo titene Kota Gbia NZAPA asara mbeni ye, lo yeke fa tënë ti be ti lo na azo ti kua ti lo, awayanga-Nzapa.
8Bamara ayeke toto,
zo wa laa alingbi ti sara mbeto pepe, zo wa?
Kota Gbia NZAPA ayeke tene tënë,
zo wa laa alingbi ti ke ti tene
peko ti tënë ti yanga ti lo, zo wa?
KOTA GBIA afâ ngbanga na ndö ti gbata ti Samarii
9Na ndö ti ayangbo ti gbata ti Asdod, ala dekongo;
na ndö ti ayangbo ti Ezipte, ala dekongo,
ala tene:
“Ala bongbi tere ti ala na ndö ti ahoto ti Samarii,
ala baa gba ti wusuwusu so azo ayeke sara
na aye ti ngangu so azo ayeke sara na amba ti ala
na ndö ti ahoto ni!”
10“Azo ti Samarii ahinga ti sara ye
ti mbirimbiri oko pepe.
Ala bongbi na ya ti ayangbo ti ala
aye so ala mu na maboko ti azo na ngangu
nga na aye so ala nzi nzingo”;
so tënë ti yanga ti *KOTA GBIA laa.
11Ndani laa, tënë so Kota Gbia NZAPA atene
ayeke so:
“Fade awato ayeke ngoro gbata ti Samarii,
ala yeke kungbi ngangu gbagba ti mo na sese,
ala yeke nzi aye ti ya ti ayangbo ti mo kue.”
12Tënë so KOTA GBIA atene ayeke so:
“Tongana ti so wabatango-taba
ayeke gboto gi gere use wala nduru mê ti taba
na yanga ti bamara so agbu mbeni taba,
gi mara ti ye so laa ayeke si ande na azo ti Israel
so ayeke lango na gbata ti Samarii;
azo ti Israel so ayeke lango na ya ti ayongoro ngende,
wala na ndö ti apendere gbogbo so,
fade a yeke soo gi ambeni oko oko.”
Ala sara hange, ye ti ngangu ayeke ga
13So tënë ti yanga ti Kota Gbia NZAPA laa,
lo so lo yeke na ndö ti dunia kue, lo tene:
“Ala ma tënë so, ala fa peko ti tënë so
lo tene na tere ti *ahale ti Jacob:
14 Na lango so mbi yeke ga na tere ti azo ti Israel
ndali ti asioni sarango ye ti ala,
gi na lango so laa mbi yeke ga ti buba agbalaka
so ayeke na Betel;
fade a yeke kungbi adidi ti gbalaka ni
si ala yeke ti na sese.
15Ada ti ala so ala leke ndali ti ngoi ti buru
na ada ti ala so ala leke ndali ti ngoi ti ngu-Nzapa,
fade mbi yeke kungbi ni kue na sese.
Ada so ala sara na apembe ti doli,
na akota da ni ayeke tuku kue na sese!”
So tënë ti yanga ti KOTA GBIA laa.
Currently Selected:
Amos 3: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
