Amos 2
2
Fango ngbanga na ndö ti azo ti Moab
1Tënë so KOTA GBIA atene ayeke so:
“Mbi yeke na tënë na azo ti Moab
ndali ti asioni ye ota, wala osio so ala sara:
ala gbi abio ti gbia ti azo ti Edom,
ala gbi abio ni si aga fuku.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
2Fade mbi yeke bi wâ na ya ti kodro ti Moab
si wâ ni ayeke gbi ayangbo ti gbata ti Keriot kue.
Fade Moab ayeke kui na ya ti wusuwusu,
na ya ti dekongo ti bira nga na ya ti hurungo didi.
3Fade mbi yeke mingo kota makonzi
so ayeke sara kua na ya ti kodro ni;
mbi yeke fâ amakonzi ti lo kue legeoko na lo”;
tënë so KOTA GBIA atene laa.
Fango ngbanga na ndö ti azo ti Juda
4Tënë so KOTA GBIA atene ayeke so:
“Mbi yeke na tënë na azo ti Juda
ndali ti asioni ye ota, wala osio so ala sara:
ala baa ndia ti mbi KOTA GBIA tongana mbumbuse ye,
ala ke ti sara ye alingbi na ambela ti mbi;
ala mu peko ti anzapa ti mvene
tongana ti so akotara ti ala asara ando.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
5Fade mbi yeke bi wâ na ya ti kodro ti Juda
si wâ ni ayeke gbi ayangbo ti gbata ti Jérusalem kue.”
Fango ngbanga na ndö ti azo ti Israel
6Tënë so KOTA GBIA atene ayeke so:
“Mbi yeke na tënë na azo ti Israel
ndali ti asioni ye ota, wala osio so ala sara:
ala ka zo ti mbirimbiri ti wara na nginza,
ala ka wayere ti wara na pâpä.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
7 Nzara ti mungo aye ti azo ti mawa ahon ndö ti ala,
ataa fuku ti sese so ayeke na li ti ala;
na le ti ngbanga, ala yeke sara si
a fâ ngbanga ti asenge zo na legeni pepe.
Molenge-koli na babâ ti lo ayeke lango
gi na oko maseka-wali.
Na sarango ye tongaso, ala yeke buba iri ti mbi
so ayeke nde si ayeke nzoni kue.
8 Abongo so ala gbu na maboko ti awayere
ndali ti boon so awayere ni amu,
ala bi na sese, nduru na tere ti agbalaka
si ala yeke lango na ndö ni.
Vin so ala gbanzi,
ala ayeke nyon ni na ya ti da ti anzapa ti ala.
9Andaa mbi, mbi fâ ando azo ti mara ti Amori
na dawa ti ala, mbi hunzi ala kue;
azo ti Amori so ayo na nduzu tongana keke ti sedre
si ala yeke na ngangu tongana keke ti shene so.
Ti londo na li ti azo ni asi na gere ti ala,
mbi fâ ala, mbi hunzi ala kue.
10Kozoni, mbi mu ala, azo ti Israel na kodro ti Ezipte
mbi sigigi na ala,
mbi fa lege na ala na ya ti benyama ngu baleosio
titene ala gue, amu kodro ti mara ti Amori
titene aga ti ala.
11 Na pekoni, mbi soro na popo ti amolenge ti ala ti koli
ambeni zo ti ga awayanga-Nzapa;
mbi soro na popo ti ala ambeni maseka-koli
titene ala deba yanga ti ala ti mu tere ti ala kue na mbi.
Ala azo ti Israel, mvene laa mbi tene so? –
so tënë ti yanga ti KOTA GBIA laa.
12Me azo so adeba yanga ti ala ti nyon vin pepe,
ngbanga ti so ala mu tere ti ala kue na mbi,
ala azo ti Israel, ala mu vin na azo ni ti nyon.
Ala kanga lege na awayanga-Nzapa
ti tene peko ti atënë ti yanga ti mbi.
13“Fade mbi yeke nika ala
tongana ti so pusu so ayo nengo gba ti kobe
ayeke nika sese na hongo ti lo.
14Ataa azo so gere ti ala ayapu na mungo loro,
ala lingbi ti kpe pepe;
ataa azo so ayeke na ngangu mingi,
ala lingbi ti sara ye na ngangu ti ala ni pepe;
ataa angangu turugu,
ala lingbi ti soo fini ti ala pepe.
15Zo ti pikango kokora ayeke kiri ti gbu le ni pepe,
nzoni zo ti kpengo loro ayeke ngba na fini pepe,
zo ti kpengo na mbarata ayeke soo fini ti lo pepe.
16Na lango ni so, ataa ngangu turugu
so ayeke na mbeto pepe,
lo yeke kpe tere ti lo ndumbu”;
so tënë ti yanga ti KOTA GBIA laa.
Currently Selected:
Amos 2: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
