Amos 1
1
1 So ayeke atënë ti Amos, mbeni wabatango-taba ti kete kodro ti Tekoa. Na ya ti mbeni ye tongana bango-li, lo baa ye na ndö ti Israel na ngoi so Ozias ayeke gbia ti Juda si Yeroboam, molenge ti Yoas, ayeke gbia ti Israel. Ye ni asi ngu use kozoni si sese ayingi. 2Amos atene:
“Ti londo na hoto ti *Sion,
KOTA GBIA ayeke toto tongana bamara;
ti londo na Jérusalem, lo dekongo ngangu.
Apere ti awabatango-nyama ahole kue awe,
ndö ti hoto ti Karmel ahole kasakasa.”
KOTA GBIA afa tënë ti fango ngbanga ti lo
Fango ngbanga na ndö ti azo ti Sirii
3Tënë so *KOTA GBIA atene ayeke so:
“Mbi yeke na tënë na azo ti Damas
ndali ti asioni ye ota, wala osio so ala sara:
ala fâ ya ti azo ti Galaad na wen ti dengo ya ti sese.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
4Fade mbi yeke bi wâ na da ti gbia Hazael
si wâ ni ayeke gbi yangbo ti gbia Ben-Hadad.
5Fade mbi yeke sara si angbongboro wen
ti yanga ti agbagba ti gbata ti Damas akungbi;
mbi yeke mingo makonzi so ayeke na popo-hoto ti Aven,
mbi yeke mingo lo so ayeke sara komandema
na Bet-Eden.
Tongaso fade a yeke gbu azo ti Sirii
ti gue na ala na kodro ti Kir”;
so tënë ti yanga KOTA GBIA laa.
Fango ngbanga na ndö ti azo ti Filistii
6 Tënë so *KOTA GBIA atene ayeke so:
“Mbi yeke na tënë na azo ti Gaza
ndali ti asioni ye ota, wala osio so ala sara:
ala gbu azo ti akete kodro kue kue kue
si ala ka ala na azo ti mara ti Edom.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
7Fade mbi yeke bi wâ na gbagba ti Gaza
si wâ ni ayeke gbi ayangbo ti gbata ni kue.
8Fade mbi yeke mingo makonzi ti Asdod,
mbi yeke mingo lo so ayeke sara komandema
na Askalon;
mbi yeke kiri maboko ti mbi ti pika gbata ti Ekron
si tanga ti azo ti mara ti Filistii ayeke kui”;
tënë so Kota Gbia NZAPA atene laa.
Fango ngbanga na ndö ti azo ti Tir
9Tënë so KOTA GBIA atene ayeke so:
“Mbi yeke na tënë na azo ti Tir
ndali ti asioni ye ota, wala osio so ala sara:
ala gbu azo ti akete kodro
si ala ka ala kue kue kue na azo ti mara ti Edom.
Ala buba lege ti *mbuki ti ala na a-ita ti ala,
azo ti Israel awe.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
10Fade mbi yeke bi wâ na gbagba ti Tir
si wâ ni ayeke gbi ayangbo ti gbata ni kue.”
Fango ngbanga na ndö ti azo ti mara ti Edom
11Tënë so KOTA GBIA atene ayeke so:
“Mbi yeke na tënë na azo ti Edom
ndali ti asioni ye ota, wala osio so ala sara:
ala mu yongoro zeme si ala tumba peko ti a-ita ti ala,
azo ti Israel,
ala baa mawa ti a-ita ti ala ni oko pepe.
Na ya ti ngonzo ti ala, ala ngba ti fâ a-ita ti ala ni,
ala bata ala na be lakue.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
12Fade mbi yeke bi wâ na gbata ti Teman
si wâ ni ayeke gbi ayangbo ti gbata ti Bosra kue.”
Fango ngbanga na ndö ti azo ti mara ti Amon
13 Tënë so KOTA GBIA atene ayeke so:
“Mbi yeke na tënë na azo ti mara ti Amon
ndali ti asioni ye ota, wala osio so ala sara:
ala suru ya ti amama ti ngo na sese ti Galaad
ti sara si sese ti ala akono.
Ndani laa, ngbanga so mbi fâ na li ti ala,
mbi yeke kiri na ndö ni oko pepe.
14Fade mbi yeke zia wâ na gbagba ti Raba
si wâ ni ayeke gbi ayangbo ti gbata ni kue
na lango ti bira,
na popo ti dekongo ti bira,
na ndembe so pupu ti ngu-Nzapa
na ngangu pupu ayeke ya.
15Fade a yeke gbu gbia ti ala
ti gue na lo na kodro wande,
lo na amakonzi ti lo kue”;
tënë so KOTA GBIA atene laa.
Currently Selected:
Amos 1: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
