Salmo 91
91
Dwata guflidung i dad to gmadè kenen
1Balù simto mnè di ifat Dwata Too Mdatah,
kanlung sa, du Dwata i Too Mtulus.
2Fakaygu man di Amugu Dwata,
“Ge i guflidunggu na i kamlung deg;
ge i Dwatagu na i gusmaliggu.”
3Gmanam én, du falwaan ge mdà di dad sasè gamfawel ge;
na mdà di dad tduk magu i gamfati.
4Snafangan ge di dad gamsasè ge,
salngad di anuk smafang i dad ngaan di dungan i fafakan
fye landè sasè gafat di ge;
kanlungan ge du too gsalig kenen.
5Taman landè duenam likò i too kanlikò mkel di butang,
ku demen i gamsasè ge mkel di mduh,
6ku demen i dad tduk tmadè ge di kifu,
na demen i gamsasè gafalmo ge di ltu duh.
7Balù kel i bong gaslok na mlibu to mati mdadong di ge,
na balù sfalò libu to mati di glibutam,
là mkel di ge i sasè gaslok én.
8Teenam sa i flayam Dwata i dad to sasè,
bay là ge gakuf.
9Ku én gumneam di ifat i Amum Dwata
na i Too Mdatah i guflidungam,
10là ge nkel i sasè gaslok,
na là gafdadong di gumneam i gamsasè ge,
11du dek Dwata i dad kasaliganan mifat ge,
fye kanlungla ge balù nè gusalum.
12Silungla ge i dad kmalla,
du fye là gtadè di batu i bliam.
13Landè gaslokam balù magu ge di bleng i dad malbang lmanaf liyun,
ku demen ndaam i dad saldafan,
balù too labè i dad liyun demen too nun alas i dad ulad.
14Man Dwata, “Du bong nawan deg, falwàgu kenen di dad gamsasè kenen,
na kanlunggu, du fgadean na deg i Amun Dwata.
15Di katlon deg, tnabenggu kenen,
na làgu kenen tnagak di bang i nun samuk,
bay falwàgu na fdatahgu kenen.
16Fsengu i nawan di klawilan,
na banlégu kenen kagalwà mdà di dad gamsasè kenen.”
Currently Selected:
Salmo 91: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
