Salmo 90
90
Dwata i tagnè guflidung i dad ton
I lingag ani satu dasal i salig Dwata dnagit ku Mosis
1Amugu, ge i tagnè guflidungmi,
mdà di muna gutambulmi kel di duh ani.
2Di là fa mgimò i dad bulul
na balù i tanà na i banwe ani,
ge sa i Dwata landè gumdà na landè gusen.
3Tagmanam di dad to, “Samfulê gamu di gumdàyu,”
na glut, di kfatila fasfuléam ale di kfung.
4Di ge, Dwata, i mlibu fali salngad di alò sduh i klon mlius,
salngad di alò malfabi
ku demen salngad di klo kunung satu to di butang
di là mlo lê kenen tanlas.
5Nweam dad to mdà di tah tanà di klal kebe i dunuk;
gafaldam ale salngad di kagafaldam i kna di kukat i to di flafus;
mlal ale mati gambet i bnas,
6du balù too fye taboan di flafus,
là mlo mlanas na di kaflabin mati.
7I kalbutam, fatimi;
too sè klikòmi di kaflabeam.
8Hae, du toom neye i kdee gukulangmi,
na balù dad salà bunimi, too gfan di ge;
9na mdà di kalbutam i salàmi, là gami mlawil;
midul i falimi na là mlo kafto i nawami.
10Alò fitu falò fali gal gusen i klawilmi,
na nun gafat di walu falò fali ku too ale mgal;
bay slame klidù na kaflayam i gnagula di klola mto,
na là mlo fto i nawami.
11Landè to too gmadè i kbong kinit kalbutam,
na landè to too gablà i klikoan i kaflabeam.
12Tdoam gami fabtas i dad duhmi mimò di tah tanà ani,
du fye fulung gami mebe i ktomi.
13E Amugu Dwata, kilen dé gusen i kalbutam gami?
Kandom gami dad saligam!
14Na fitem gami i kakdom landè kgilin kat flafus,
du fye lehew gami kat i duh di klomi fa mto.
15Blém gami i kalbong klehew salngad kalbong i klidù tagablém gami;
i klidùmi tanlasam klehew kel di bong klo i dad fali ktayudmi i kaflayam.
16Fitem lêman di gami, dad saligam, i dad gamtikeng nimoam,
na fitem di belmi i bong kdatah glalam.
17E Amumi, E Dwatami, begam gami banlé i kafye mdà di ge,
na banlém gami kfulung mimò i nimòmi,
hae du fye too nun gukelan.
Currently Selected:
Salmo 90: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
