Ñwaè' Taitoès 1

1Ŋwà' ca ce saŋ mɛ̌ Pol ce m yu ŋwɛ̀ rfà' nè Nyʉ̀ a ker ba ŋwɛ̀ ntuu nè Jisos Krâis. Nyʉ̀ à m ce mɛ̀ tɛ m bo jà' bèe ce e ce, tɛ wowèe a bo byemi nè ye, rìŋ yuu mini ce àde' yi gee ŋwɛ̀ cu rcu ce Nyʉ̀ kòŋ. 2Àde' ŋwɛ̀ cu njɛ̀ɛ rcu ca njobè' e ce kè' ryòŋ ce nfesè. Tɛ ŋgòŋ yi ka' kè ba, Nyʉ̀ ce e ke nya' mnde' ka' à m kà' enɛ e be fa bèe njɛ̀ɛ ryòŋ ca. 3Nfè' à ka' ghɛɛ, Nyʉ̀ à gee yi nlàa yi yɛɛtì àwaŋ, bèe a riŋ buu ca. Nyʉ̀ ce e yu yìsèe ŋwɛ̀ rjà' à fa blàa ca mba mɛ̌ mmbò enɛ m fe'shi nè bèe.

4M ce saŋ ŋwà' ca nè Taitòs ce e yu muu wà ce mini njobè' e byemi nè Jisos Krǎis àmbò sèe à byemi nà. M ce loo mɛnɛ Nyʉ̀ ce e yu yìsèe Ta ker ba Jisos Krǎis ce e yu yìsèe ŋwɛ̀ rjà', tʉr wèe à ntee bòŋboŋ, ker fa wèe cumʉnyaŋ.

5Mɛ̀ m mà'shi enɛ à cu à to' Krět tɛ à bo nàshi buu embe cor ce vi yu yɛɛnì ka' nà, kèr ce btu embe cor à bcor ce vi yu à bu' mla' wɛɛwɛ. Kuushi enɛ mɛ̀ m làa nè wɛ̀ enɛ, 6à ka' ce ce tu embe côr, à ce ba ŋwɛ̀ ce bèe a rìŋ enɛ e yu ŋwɛ̌ mbòŋmboŋ, a tʉr ŋgwa mò'sir cà'cà', boo vi foŋ a ba ŋgǎa rbyemì, yap ŋgèe à ba njɛ̀ɛ ŋgèe ce àde' bèe a yɛ laa enɛ wowèe a ce gèe buu bbebep kɛ̀ enɛ a tèe btu ka'. 7Ŋwɛ̀ ce e ce fyɛ' bèe Nyʉ̀ yu ŋwɛ̀ ce mfà' Nyʉ̀ mi yu mba yě mmbò. Banɛ yi ŋgèe yi ba bòŋboŋ. E fa nàa tu kɛ̀ tʉr ntee cɛcɛp ka'. E fa lɛ ntee à buu mno ka'. E fa ba ŋwɛ̀ ce e ce gèe buu ba à mntee ka'. E fa ba ŋwɛ̀ roŋ mbàa ka'. 8E ba ba ŋwɛ̀ ce e yu mmbo mtoo, a ba ŋwɛ̀ ce e kòŋ ba yuu bòŋboŋ. E ba ŋwɛ̀ ce e be kwà'shi buu nè bfee-ŋwɛ̀, ba ŋwɛ̀ nyɛɛnì, ba ŋwɛ̀ nrara à bsii Nyʉ̀, ker ba ŋwɛ̀ ce e mà'shi yì nyor àwàa ka'. 9E ba ŋwɛ̀ ce e be tɛɛ njep ryɛ'nì mini ce a yɛ'ni ye, tɛ ye ye foŋ bo rìŋ à ryɛ'ni bèe mo' bòŋboŋ, kèr gee tɛ yi yɛɛti rara enɛ bèe ce a ce kani ryɛ'nì ca nà a ce jep jep.

10M ce làa wa'a njobè' bèe ce a tèe btu a yu gòr sê, laŋlaŋ běe à mʉ̀ ŋgǎa ŋgèe bʉ̀. Njɛ̀ɛ bèe ca a yu ŋgǎa làa buu bcicì, a ce bo' bèe nè wap blàa anà. 11Gèe tɛ wowèe a baate yap cùu njobè' wowèe a ce yɛ'ni ba yuu ce yi yu yɛɛnì ka'. A ku ce ròo ba nduunjì à rkoni mbàa à njɛ̀ɛ njì ce e yu nè rìtu-ŋwɛ̀. Wowèe a jepsi rbyemì embe mndap bèe mo' nè wap blàa anà. 12Ŋwɛ̀ mò' efa mʉ̀ běe à to' Krět anà, ce e m ce yɛ buu ce vi be kè ba, à m làa enɛ̂, “Běe à to' Krět a yu ŋgǎa mnde'. Wowèe a yu àmbò mnyàa efa rìŋ wa'a, a ba mŋkuŋri ce a yu bbor.” 13Yuu ce e m làa anà yi yu mini. Banɛ à lapni wowèe tatap sê, tɛ wowèe a bo byemi ba yuu ce yi yu mini. 14Fa mà'shi tɛ wowèe a ker du àmbùu mghàghar Jûs, kɛ̀ kèr yu'ni nè rsa' ce bèe ce a kani yuu mini a fa nà ka'. 15Ŋwɛ̀ à ka' tʉr ntee rara, banɛ buu wɛɛwɛ be ba brara a yě bsii. Ŋwɛ̀ à ka' tʉr ntee sii, ke' byemi ka' banɛ buu wɛɛwɛ vi be ba brara nè ye ka' njobè' mi mkwà'shì mi yu msii, e ke' ker rìŋ jɛɛ jɛɛ efa yuu bòŋboŋ ba yuu bebep ka'. 16Njɛ̀ɛ bèe ca a lòr enɛ a rìŋ Nyʉ̀ sê, buu ce wowèe a ce gèe vi ce dùŋshi enɛ wowèe a mɛŋni Nyʉ̀. Wowèe a yu běe bcicì, a tee btu. Àde' wowèe a gèe yuu bòŋboŋ ka'.

Currently Selected:

Ñwaè' Taitoès 1: LNT

Highlight

Copy

Compare