Ñwaè' Taitoès 2

1À ka' ba yi àmbò wɛ̀, yɛ'ni bèe ba ŋgěe bòŋboŋ ce ryɛ'nǐ rbòŋboŋ li làa enɛ bèe a gêe. 2Làa nè mmbaŋrù ce a yu bleebèe enɛ wowèe a tʉr ba ntee bobor, ke' lor buu àtɛ̀r ka; kwa'shi buu nè bfee-ŋwɛ̀; byemi nè Jisos Krǎis nè mini-ŋwɛ̀, koŋ bèe, tɛɛ tatap. 3Làa nè bbyèŋge ce a yu bleebèe foŋ enɛ wowèe a gee ŋgèe ce yi yu nè ryu'nì-ŋwɛ̀. Wowèe a fa tee mnde' mbe tu bèe mo', kɛ̀ ba bkwàa nè mrù' ka'. Wowèe a yɛ'ni bèe ba buu bbòŋboŋ, 4tɛ ryɛ'nì ca li bo gèe tɛ bbyèŋge ce a bii bghàrbèe nà a bo kòŋ bduu wap ba boo wap, 5gèe buu nè bfee-ŋwɛ̀, ba brara enjep ntee, fyɛ' wap mndap bòŋboŋ, gèe ŋgěe bòŋboŋ nè bèe mo', yu'ni nè bduu wap. Wowèe a gee wa'a fà dì' ŋwɛ̀ mò' bo koni njì à rlàa yuu bebep àmbò blǎa Nyʉ̀ njo' yap ŋgèe ka'.

6Cep boo mnsùnsù foŋ enɛ wowèe a fa mà'shi wap mnyor àwàa ka'. 7À ka' ba àmbò wɛ̀, yuu wɛɛwɛ ce wɛ̀ ka' ce gèe, à gee ba yuu bòŋboŋ tɛ bèe mo' a bo yɛ bè'ni. Yɛ'ni bèe nè mini-ŋwɛ̀, fa gèe ŋkɛ̀rbuu nè lo ryɛ'nì ka'. 8Làa ba blǎa bbòŋboŋ ce àde' ŋwɛ̀ mò' jaasì ka', tɛ rìtu yi bo koo bèe ce a kani lisèe rfà'. Rìtu yi be koo wowèe njobè' wowèe a yɛ yuu bebep ce àde' a suŋ àmbò sèe ka'.

9Làa nè bkwàa enɛ wowèe a yu'ni nè wâp mmasà, gee buu wɛɛwɛ ce wap mmasà a kòŋ enɛ wowèe a gêe. Wowèe a fa sɛr mnsɛr ka'. 10Wowèe a fa cwàr mmbo ka'. Wowèe a fa' nè wap mmasà nè ntee mo'sir à nfè' wɛɛwɛ tɛ yap ŋgèe yi bo gèe tɛ bèe a vʉse buu ce sèe ce yɛ'ni àmbò Nyʉ̀ ce e yu yìsèe ŋwɛ̀ rjà'.

11Kuushi enɛ Nyʉ̀ à m gèe yi ŋgěe bòŋboŋ yi yɛɛtì àwaŋ tɛ bèe wɛɛwɛ a bo lùŋ. 12Yi ŋgěe ca yi ce yɛ'ni sèe enɛ sèe borni ŋgèe ce bèe ce a mɛŋni Nyʉ̀ a ke gèe, ker borni efa rlɛ̀ ntee à buu enjep ŋgòŋ na. Yi ce yɛ'ni sèe foŋ enɛ sèe cu rcu ce li yu nè bfee-ŋwɛ̀, ba mini tɛ yisèe ŋgèe enjep ŋgòŋ na yi bo ba yɛɛnì à bsii Nyʉ̀. 13Sěe ce cu wa'a, ce kè' nfè' ce Jisos Krǎis be vʉ̀ nè vi bghònì, tɛ yi fòo yi yɛɛti àwaŋ. E yu yìsèe Nyʉ̌ ŋgòr, a ker ba ŋwɛ̀ rjà'. 14E m kwe a sěe btù tɛ e bo fʉr sèe efa buu bbebep, kèr gèe tɛ sèe ba brara enjep ntee, ba yì bèe ce a ce lu'shi à rgèe ba buu bbòŋboŋ. 15Suŋ bèe buu ca. Cep, ker lapni bèe nè ŋger-ŋwɛ̀. Fa mà'shi tɛ ŋwɛ̀ mò' lor wɛ̀ àtɛ̀r ka'.

Currently Selected:

Ñwaè' Taitoès 2: LNT

Highlight

Copy

Compare