Ñwaè' Áfásoès 1

1Ŋwà' ca ce saŋ mɛ̌ Pol ce Nyʉ̀ à ce mɛ̀ enɛ m ba ŋwɛ̀ ntuu nè Jisos Krâis. M ce saŋ ŋwà' ca nè bèe Nyʉ̀ ce a yu à to' Ɛfɛsòs. Bèe Nyʉ̀ ca yu bèe ce a dù àmbùu Jisos Krǎis nè mini-ŋwɛ̀. 2M ce loo mɛnɛ Nyʉ̀ ce e yu yìsèe Tâ, ba Tata Jisos Krâis, tʉr wèe à ntee bòŋboŋ, gee tɛ wèe cu nè cumʉnyaŋ-ŋwɛ̀.

3Sèe yoŋshi Tata Nyʉ̀ ce e yu Tàr nè Jisos Krǎis ce e yu yìsèe Tatâ. Yu ye ce e ghòni sèe nè buu embe bùu. E ghòni sèe nè buu ca njobè' sèe yu bèe Jisos Krâis. 4Tɛ Nyʉ̀ ka' kè gèe ŋgòŋ, e m ce sèe enɛ sèe ba àbee sèe Jisos Krǎis wèe tɛ sèe bo ba yì bèe, ba brara, ba yɛɛnì a yě bsii. À ka' ba njobè' Nyʉ̀ à kòŋ sèe, 5e m kwà'shi war, a gee enɛ sèe ba boo vi njo' rfà' ce Jisos Krǎis be vʉ̀ gèe nè sèe. Nyʉ̀ à m gèe ca njobè' à m ba yuu ce yi m bòŋ ye, e koŋ à rgèe. 6E m gèe enɛ sèe ba boo vi tɛ sèe bo kù'si ye njobè' e m gèe yuu bòŋboŋ nè sèe. E m gèe yuu anà nè sèe à cicì. Sèe à koni yi njo' muu yì ce e kòŋ se nà. 7À ka' ba njobè' Jisòs à m fa vi blɛɛ à rtee sèe efa ŋgɛ', Nyʉ̀ à foosì sèe efa yìsèe buu bbebep. E m tʉr ntee bòŋboŋ nè sèe nè mini-ŋwɛ̀, 8a ka' gee yuu anà nè sèe à njì ce àde' ŋwɛ̀ laa ka'. E m tʉr bfee, a riŋ buu wɛɛwɛ, a ka' gee wa'a. 9E m gèe yuu ce e m ce yu' rbòŋ àgho, a gee sèe à riŋ buu ce àde' sèe à m ba riŋ ka', ce yu buu ce e m kwà'shi enɛ e be lòr Jisos Krǎis gèe àgho. 10E m kwà'shi enɛ e be gèe buu ca ce nfè' à ka' ghɛɛ, vʉ̀ nè buu embe bùu ba buu enjep nshè wɛɛwɛ tarshi àbee, lɛ̀ njeptii Jisos Krâis.

11Yu ba njo' Jisos Krǎis ca ce Nyʉ̀ à m ce wèr enɛ wèr ba yì bèe. E ke gèe buu wɛɛwɛ ba àmbò e lɛ̀ enɛ e be gèe. 12E m ce wèr wa'a tɛ wèr ce wèr à m ba bèe entòmbì à rlɛ̀ mmir mbendù Jisos Krǎis bo gèe tɛ bèe a yɛ yi fòo, ce kù'si ye.

13Wee wèe foŋ yu àbee wèe Jisos Krǎis wèe. Wèe à m yu' nsuŋ kuu yuu mini, ce e yu enɛ àde' wèe lûŋ, a byemi nè Jisòs. Wèe à ka' byemi wa'a, Nyʉ̀ à fa wèe ncòo ce e ce dùŋshi enɛ wèe yu yì bèe. Ncòo anà yu Yʉ' Rara ce Nyʉ̀ à m kà' enɛ e be fa nè yì bèe. 14Yʉ' Rara ca yi yu àmbò yuu ce Nyʉ̀ à tɛr lɛ nè sèe wa'a, caar tɛ Nyʉ̀ tee sèe efa ŋgɛ', tɛ sèe koni buu wɛɛwɛ ce e be fa nè yì bèe, tɛ bèe wɛɛwɛ a yɛ yi fòo, kù'si ye.

15À ka' ba njo' buu ce Nyʉ̀ à gèe nè wèe na, m ce loo nè wèe kɛ̌' à nfè' ce bèe a m suŋ mɛ̀ enɛ wèe à byemi nè Tata Jisòs, a ker koŋ bèe Nyʉ̀ wɛɛwɛ. 16M ce yòŋshi Nyʉ̀ à nfè' wɛɛwɛ njo' wèe, a ker ce loo nè wèe à nfè' ce m ka' ce loo. 17M ce loo nè Nyʉ̀ ce e yu Nyʉ̀ nè yìsèe Tata Jisos Krǎis a ker ba Tàr ce e yu ŋwɛ̀ fòo, enɛ e fa wèe yi yʉ', tɛ wèe tʉr bfee, rìŋ njɛ̀ɛ ŋwɛ̀ ce Nyʉ̀ yu nè mini-ŋwɛ̀. 18M ce loo mɛnɛ Nyʉ̀ mʉ' wee bfee tɛ wèe bo yɛ li rraa, rìŋ buu wɛɛwɛ ce wèe à lɛ̀ mmir mbendù mo njobè' e m kɛ' wèe, ker riŋ enɛ bti' ce Nyʉ̀ à lɛ̀ nè yì bèe vi bòŋ a caa ŋger. 19M ce loo enɛ e mʉ' wee bfee tɛ wèe bo rìŋ yi ŋger ce yi càa ŋger bsìp. Yu ŋger ca ce e lòr a ce gèe rfà' àgho njep visěe mntee, ce sèe yu bèe ce sèe à byemi nè ye. Ŋger ce yi càa ŋger anà ku ba ŋger 20ce e m lòr a gee Jisos Krǎis à fʉʉ efa rkwe, e lor ye a cuusi a yě rkoo mà' mbe bùu. 21A mbe dì' ce Jisos Krǎis yu, a ce sa' buu wɛɛwɛ ce vi tʉr ŋger mbe bùu; e yu ŋwɛ̌ ŋgòr a caa byʉ' wɛɛwɛ, ba bcìndap Nyʉ̀ wɛɛwɛ, a ker tʉr ŋger a caa bèe wɛɛwɛ ce a tʉr mlii njep ŋgòŋ na sè'ni. E tʉr ŋger sè'ni na, kèr lò tʉr à nfè' ce e bii ka' ba. 22Nyʉ̀ à m lòr buu wɛɛwɛ a lɛ njeptii Jisòs, a ker gee enɛ e ba tu nè côr, ce sa' buu wɛɛwɛ. 23Cor yu nyor Jisos Krâis, ce e gèe Jisòs à misì a ghɛɛte, Jisòs ye ye à gee buu ce vi yu à bdì' wɛɛwɛ vi misì a ghɛɛte.

Currently Selected:

Ñwaè' Áfásoès 1: LNT

Highlight

Copy

Compare