Ñwaè' Gaèláshaè 3

1Běe à ŋgǒŋ Gàlɛshà, wèe yu blʉr a? Ŋwɛ̀ ce e rò' wèe à rò' nda? Mbò wèr à m suŋ wèe mbùu efa rkwe Jisos Krǎis embe kìntaa rara se a? 2Kù suŋ nè mɛ̀ ba yuu mo'sir. Yʉ' Rara yi m niŋ njep wěe mntee njo' mncir ce wèe à m ce lɛ̀, kɛ̀ njo' blǎa Nyʉ̀ ce wèe à m yu' a byemi? 3Wèe à m kɛ̀' nè Yʉ' Nyʉ̀, a ce tà' mìsi ba à ye ŋger njokɛ? Wèe yu blʉr wa' njokɛ? 4Wà' ku' buu ce Yʉ' anà yi gèe wèe à riŋ na vi ku bʉ à cicì a? M ce kwà'shi wa' ka'. 5Wèe à yɛ àmbò Nyʉ̀ à fa wèe yi Yʉ', a ker ce gèe buu bbɛ̀ɛ a wěe mʉ njì enjep Yʉ' anà. Nyʉ̀ ce gèe buu ca njobè' wèe ce lɛ̀ mncir, kɛ̀ njobè' wèe à yu' nsuŋ mbòŋmboŋ, a byemi?

6Kwà'shi ka nè àmbò Abràhâm. A saŋ mbe Ŋwǎ' Nyʉ̀ enɛ̂, “Abràham à m byemi yuu ce Nyʉ̀ à m làa, li rbyemì anà li gee e ba ŋwɛ̌ nyɛɛnì à bsii Nyʉ̀.” 7Banɛ wèe riŋ enɛ bèe ce a byemi nè Nyʉ̀ a bèe ce a yu boo Abràhâm. 8A m saŋ mbe Ŋwǎ' Nyʉ̀ enɛ Nyʉ̀ be kè gèe tɛ bèe enje jɛɛ a ba byɛɛnì a yě bsii njobè' wowèe a byemi nè ye. A m saŋ elǔuŋgòŋ àmbò Nyʉ̀ à m fè'shi nsuŋ mbòŋmboŋ nè Abràhâm. E m làa nè ye enɛ̂, “M be ghòni bto' enjep ŋgòŋ na wɛɛwɛ njo' wɛ̀.” 9Banɛ àmbò Nyʉ̀ à m ghòni Abràham njobè' e m byemi nè ye nà, e be ghòni bèe wɛɛwɛ ce a byemi nè ye foŋ.

10À ka' ba àmbò bèe ce a fòosi ba nè mncir nà, ndòo yu mbe wǎp tù, njobè' a saŋ mbe Ŋwǎ' Nyʉ̀ enɛ̂, “Ŋwɛ̀ ce e ka' tɛ yu'ni nè mncir wɛɛwɛ ce a saŋ mbe ŋwà' mncir ka', banɛ ndòo à co' ye.” 11Sèe rìŋ seenɛ àde' mncir vi gee ŋwɛ̀ e ba yɛɛnì à bsii Nyʉ̀ ka', njobè' a saŋ mbe Ŋwǎ' Nyʉ̀ enɛ̂, “Ŋwɛ̀ ce e yu yɛɛnì à bsii Nyʉ̀ njobè' e byemi nè ye, ŋgàŋ be lùŋ.” 12Mncir vi tʉr yuu mo' à rgèe nè rbyemì ka'. Mncir vi làa yi enɛ ŋwɛ̀ yu'ni nè vi yu'ni. A saŋ mbe Ŋwǎ' Nyʉ̀ enɛ̂, “Ŋwɛ̀ à ka' lɛ mncir wɛɛwɛ, ŋgàŋ ka' koni ryòŋ.” 13Ndòo à co' sèe wɛɛwɛ njobè' sèe à lɛ̀ mncir wɛɛwɛ ka'. Jisos Krǎis à tee sèe efa ndòo ca. E m lòr yisèe dì', a kwe mbe ce, a lo a ba ŋwɛ̀ ndòo à bsii Nyʉ̀. Yi ku ba àmbò a saŋ mbe Ŋwǎ' Nyʉ̀ enɛ̂, “Ŋwɛ̀ ce a ka' kɛti mbe ce banɛ ŋgàŋ yu ŋwɛ̀ ndòo à bsii Nyʉ̀.” 14Jisos Krǎis à m yɛ ŋgɛ' ca tɛ bèe enje jɛɛ a bo koni efa bghònì ce Nyʉ̀ à m fa nè Abràhâm, tɛ sèe ce sèe à byemi nè Jisòs bo koni Yʉ' ce Nyʉ̀ à m kà' enɛ e be fa nè yì bèe nà njo' ye.

15Bfʉr wâ, m be fè'ni yuu ce m ce làa à yuu ce bèe a ke gèe. Bèe a mmbaa a ka' ye lè', àde' mò' bʉ' lè' anà ka'. Àde' mò' ker kyese yuu mo' mbendù lè' anà ka', njobè' a kur wɛɛ. 16Lè' ce Nyʉ̀ à m ye elǔuŋgòŋ nà yi ku ba wa' foŋ. E m ye lè' anà, a gee mkà'ni anà ba nè Abràham ba yì ŋgʉ̀. Ŋwǎ' Nyʉ̀ yi làa enɛ̂, “Nè yò ŋgʉ̀”, ce yi yu enɛ e m ce làa ba àmbò bèe àŋgoo ka', e m ce làa ba àmbò ŋwɛ̀ mò'sir, ŋwɛ̀ anà à ba Jisos Krâis. 17Yuu ce m ce làa yi yu enɛ Nyʉ̀ à m ye lè' a Abràham wa'a, bfè' mjèe-kyèe-ba-bfè'-mntaar vi ka' càa, e ka' fa mncir nè Jûs. Mncir anà vi tʉr ŋger à rbʉ' lè' tɛ yuu ce Nyʉ̀ à m kà' yi kʉti à yuu cicì ka'. 18Ŋwɛ̀ à ka' koni bghònì ese Nyʉ̀ njo' mncir ce e ce lɛ̀, yi ba ba enɛ Nyʉ̀ ce fa sèe bghònì anà njo' lè' ce e m ye ka'. Geewa'a, sèe rìŋ seenɛ Nyʉ̀ à m ghòni Abràham njobè' e m kà' enɛ e be ghòni ye.

19Àmbò yi yu wa' na banɛ Nyʉ̀ à m fa sèe mncir njokɛ? E m fa sèe mncir tɛ sèe bo rìŋ yuu ce yi yu bebep. Mncir anà vi m ba, dù bà' à nfè' ce ŋwɛ̀ ce e m ba ŋgʉ̀ Abràham ca à vʉ̀. Ŋwɛ̀ anà a ŋwɛ̀ ce Nyʉ̀ à m ye lè' a Abràham enɛ e be ghòni ye. Nyʉ̀ à lor mncir anà, a fa nè bcìndap Nyʉ̀, bcìndap Nyʉ̀ wo wo a fa mncir anà nè ŋwɛ̀ ce e m tɛɛ mbetar Nyʉ̀ ba ŋwɛ̀. 20Ŋwɛ̀ à ka' tɛɛ mbetar bèe, banɛ ŋgàŋ tɛɛ à btu bèe àŋgoo. À ka' ba àmbò Nyʉ̀, e ku ba mò'sir.

21Wà' mncir vi jepsi lè' ce Nyʉ̀ à m ye nà a? Yi yu wa' ka'. Mncir vi m ka' ba tʉr ŋger à rfa ŋwɛ̀ ryòŋ ce nfesè, à ba kù ba vi ce vi m ba gèe tɛ bèe a ba yɛɛnì à bsii Nyʉ̀. 22Geewa'a, àde' mncir vi fa ŋwɛ̀ ryòŋ ce nfesè ka'. A saŋ mbe Ŋwǎ' Nyʉ̀ enɛ buu bbebep vi tʉr ŋger mbendù ŋgòŋ ca wɛɛwɛ. Banɛ yu ba bèe ce a byemi nè Jisos Krǎis nà, ce a be tʉr buu ce Nyʉ̀ à m kà' enɛ e be fa nè bèe ce a byemi nè ye.

23À m ba mbe nfè' ce Jisos Krǎis à m be vʉ ka' nà, mncir vi kur sèe àmbò ŋgǎa shaŋ wa'a caar a du a ba' à nfè' ce e m vʉ̀, sèe à byemì nè ye nà. 24Mncir vi m ce nàshi sèe tɛ Jisos Krǎis ka' vʉ̀, tɛ sèe ce sèe à byemi nè ye nà bo ba byɛɛnì à bsii Nyʉ̀. 25À ka' ba sè'ni ce sèe à byemi nè Jisòs na yuu mo' yi ker ce nàshi sèe àmbò yi m ce nàshi nà ka'.

26Wèe wɛɛwɛ yu boo Nyʉ̀ njobè' wèe à byemi nè Jisos Krâis. 27Ŋwɛ̀ wɛɛwɛ ce a bàptir ye, a Jisos Krǎis a ba àbee, ŋwɛ̀ anà à lòr ba ŋgèe Jisos Krâis. 28Banɛ kɛ̀ à yu Jus ɛ̀, kɛ̀ à yu ŋwɛ̀ enje jɛɛ ɛ̀, kɛ̀ à yu ŋkwàa ɛ̀, kɛ̀ à yu muu ɛ̀, kɛ̀ à yu mbaŋrùŋwɛ̀ ɛ̀, kɛ̀ à yu njeŋwɛ̀ ɛ̀, jɛɛ jɛ̀ɛ jɛɛ yu àgho ka' njobè' wèe wɛɛwɛ yu ŋwɛ̀ mò'sir njep Jisos Krâis. 29Wɛ̀ ka' ba ŋwɛ̀ Jisos Krâis, banɛ à yu mò' efa ŋgʉ̀ Abràham ce e be koni buu ce Nyʉ̀ à m kà' enɛ e be fa nè ŋgʉ̀ Abràham nà.

Currently Selected:

Ñwaè' Gaèláshaè 3: LNT

Highlight

Copy

Compare