Ñwaè' Gaèláshaè 2

1Bfè' vi ka' càa ncòp-kyèe-à-rrʉ̀ʉ, mɛ̀ ker du à rla' Jɛ̀rusalɛ̀m wèr Bànabàs. Mɛ̀ m lòr Taitòs, wèr wowèe à dû. 2Mɛ̀ m dù njobè' Nyʉ̀ à m làa nè mɛ̀ enɛ m dû. Mɛ̀ ka' dù bà', a suŋ wowèe yuu ce mɛ̀ m ce fè'shi nè bèe enje jɛɛ. Mɛ̀ m ku suŋ ba bèe ce a m ba btu embe cor cà'cà'. Mɛ̀ m suŋ wowèe fà dì' rfà' ce mɛ̀ m gèe ker ba lì ce m ce gèe sè'ni, mi bo bʉ à cicì ka'. 3Wowèe a byemì yuu ce mɛ̀ m suŋ wowèe anà. Ka' Taitòs ce wèr wowèe à m vʉ̀ nà à m ba ŋwɛ̌ à to' Grěs wa'a, a m tàa ye enɛ e gèe bʉ̀ ka'. 4A m sèesi yuu a kuu bʉ̀ ba njo' bèe mo' ce a m ce bo'shi enɛ a yu ŋgǎa rbyemì. Bèe anà a m la' kùu a vʉ a wěr mʉ tɛ a bo yɛ ka njɛ̀ɛ njì ce wèr ce gèe buu wàrwàr njobè' wèr Jisòs wèe yu àbee nà. Wowèe a m kòŋ enɛ mncir Jus vi kur wèr. 5Wèr à m fa njì nè wowèe koo mʉcàr ka', fà dì' a kupse nsuŋ mbòŋmboŋ ca, jepsi wèe ka'.

6À ka' ba àmbò bèe ce a m ce à btu embe cor nà, wowèe a m ker kyese yuu mo' mbendù blàa ce mɛ̀ m ce fè'shi ka'. Ka' bèe ca a m ba btu wa'a, mɛ̀ m lòr yap nta' anà à yuu gòr ka', njobè' bèe wɛɛwɛ a yu yɛɛnì à bsii Nyʉ̀. 7Wowèe a m yɛ yap enɛ blàa ce mɛ̀ m ce fè'shi anà à m fa Nyʉ̀ a fa nè mɛ̀ nè mini-ŋwɛ̀. A m yɛ enɛ Nyʉ̀ à m tuu mɛ̀ enɛ m du fe'shi blàa ca nè bèe enje jɛɛ, àmbò Nyʉ̀ à m fa blàa ca foŋ nè Pità enɛ e du fe'shi yi ba nè Jus nà. 8Ŋwɛ̀ ce e m fa Pità ŋger enɛ e gee rfà' ca nè Jus à m ku ba ŋwɛ̀ ce e m fa mɛ̀ ŋger foŋ enɛ m gee rfà' ca nè bèe enje jɛɛ. 9Jɛms ba Pità ba Jǒn ce a m ba àmbò btu btatap embe côr, a ka' yɛ enɛ Nyʉ̀ à fa mɛ̀ njɛ̀ɛ rfà' ca ghup, wèr wowèe ba Bànabàs à fanì mmbo à rdùŋshi enɛ wèr ce fà' àbee. Wèr wowèe à m byemi àbee enɛ wèr Bànabàs du fe'shi yer ba nè bèe enje jɛɛ, tɛ wowèe a fe'shi yap ba nè Jûs. 10Wowèe a m ku fa wèr ncep ba à yuu mo'sir cà'cà'. Wowèe a m làa enɛ wèr fa lèse efa rjà' ŋgǎa fùp ka'. Wowèe a m ku laa ba yuu ce mɛ̀ m ce kòŋ à rgèe sê.

11À m ba mbe nfè' ce Pità à m vʉ̀ à rla' Antìyòk, mɛ̀ lapnì ye à mʉ̀ bèe njobè' e m gèe fàa. 12Pità à m kɛ̀' a ce ye byee a bèe enje jɛɛ wèe. Jɛms à ka' tuu Jus mo' enɛ a vʉ yɛ Pità, Pità à bornì efa rye byee a bèe enje jɛɛ cà, a fʉr yì nyor efa mʉ̀ wowèe. E m gèe wa'a njobè' e m ce wɛp Jus mo' ce a m ce làa enɛ ŋwɛ̀ à ka' tɛ gèe bʉ̀ ka', ŋgàŋ ba ŋwɛ̀ rbyemì ka'. 13Jus ce a m ce cu à rla' Antìyòk a ba ŋgǎa rbyemì foŋ nà, a m koni ŋgěe cicì ce Pità à m ce gèe nà. Bànabàs ye ye à m lò a ce gèe njɛ̀ɛ yap ŋgèe anà. 14Mɛ̀ ka' yɛ mɛnɛ wowèe a ce gèe ba yuu jɛɛ efa yuu ce nsuŋ mbòŋmboŋ ce làa, mɛ̀ laa nè Pità à bsii bèe wɛɛwɛ enɛ̂, “À yu ŋwɛ̀ Jûs, a ce cu àmbò bèe enje jɛɛ a ce cu nà. Wɛ̀ ka' ce tàa bèe enje jɛɛ enɛ a gèe ba ndèe Jus njokɛ?”

15À ka' ba yi àmbò wèr ce wèr yu Jus seese nà, wèr yu àmbò bèe enje jɛɛ ce a ke lɛ̀ yap yu mncir Nyʉ̀ ka' nà ka'. 16Ka' yi yu wa'a, wèr rìŋ war enɛ Nyʉ̀ e ke lòr ŋwɛ̀ à ŋwɛ̌ nyɛɛnì njobè' ŋgàŋ ce lɛ̀ mncir ka'. Yuu ce yi ke gèe ŋwɛ̀ e ba nyɛɛnì à bsii Nyʉ̀, ku ba rbyemǐ nè Jisos Krǎis cà'cà'. Wèr ce wèr yu Jûs, à byemi nè Jisòs foŋ tɛ Nyʉ̀ bo lòr wèr à běe byɛɛnì, ke' ba njo' mncir ce wèr ce lɛ̀ ka'. Yi ku ba àmbò a m saŋ mbe Ŋwǎ' Nyʉ̀. A m saŋ enɛ̂, “Àde' ŋwɛ̀ ba nyɛɛnì à bsii Nyʉ̀ njobè' ŋgàŋ ce lɛ̀ mncir ka'.” 17Àde' ŋwɛ̀ mò' laa enɛ sèe ce sèe ce kòŋ à rba yɛɛnì à bsii Nyʉ̀ njo' rfà' Jisos Krâis, ku bii ŋgǎa ŋgèe buu bbebep njobè' sèe ce lɛ̀ mncir ka'. Ŋwɛ̀ à ka' laa wa'a, banɛ e ce làa enɛ Jisos Krǎis ce fa bèe ŋger à rgèe buu bbebep. Yi yu wa' ka' koo mʉcàr. 18M ka' ker ce bà'ri yuu ce mɛ̀ m sà'si, banɛ m yu ŋwɛ̀ bʉ'shi mncir. 19Mncir vi m gèe mɛ̀ riŋ mɛnɛ njì mò' yu àgho nè ŋwɛ̀ à rba yɛɛnì à bsii Nyʉ̀ njobè' e ce lɛ̀ mncir ka'. Yi ka' ba wa'a, mɛ̀ ba sè'ni àmbò gʉ̀ʉ ŋwɛ̀ ce àde' mncir vi ker gee yuu àgho ka' wa'a, tɛ m bo cu ba rcu ce Nyʉ̀ kòŋ. 20Àde' m laa mɛnɛ a m taa wèr Jisos Krǎis mbe kìntaa wèr ye à kwe àbee. A mbùu ce ryòŋ ce m tʉr sè'ni na yu la ka'. Ryòŋ anà yu ba li Jisos Krǎis ce e yu njep mɛ̌ ntèe. Rcu ce m ce cu njep ŋgòŋ sè'ni na yu ba rcu rbyemì ce li gèe mɛ̀ ce lɛ̀ ya ntee ba nè Muu Nyʉ̀ ce e m kòŋ mɛ̀, a fa li ryòŋ njo' mɛ̀. 21Yi m ba ba enɛ àde' ŋwɛ̀ ba yɛɛnì à bsii Nyʉ̀ njobè' e lɛ mncir, yi ba ba enɛ rkwe Jisos Krǎis li yu à cicì. Àde' m lor ntee bòŋboŋ ce Nyʉ̀ tʉr nè sèe na à yuu cicì ka'.

Currently Selected:

Ñwaè' Gaèláshaè 2: LNT

Highlight

Copy

Compare