Ñwaè' Gaèláshaè 1

1Ŋwà' ca ce saŋ mɛ̌ Pol ce m yu ŋwɛ̀ ntuu nè Jisos Krâis. À m ce ŋwɛ̀ a ce mɛ̀ enɛ m gee rfà' ca ka'. Mɛ̀ m koo ŋger ese ŋwɛ̀ mò' à rgèe rfà' ca foŋ ka'. À m ce ba Jisos Krǎis ba Tàr Nyʉ̀ ce e m fʉr Jisòs efa rkwe. 2Wèr bfʉr wɛɛwɛ ce a yu àfa à cà'ni bcor ce vi yu à ŋgǒŋ Gàlɛshà. 3Tɛ Nyʉ̀ ce e yu yìsèe Tâ, ba Tata Jisos Krâis, tʉr wèe à ntee bòŋboŋ ker fa wee cumʉnyaŋ. 4Jisos Krǎis à m fa yì nyor a sěe tù, tɛ Nyʉ̀ bo fòosi sèe efa yìsèe buu bbebep, tee sèe efa ŋgěe bbebep enjep ŋgòŋ na. E m gèe ba yuu ce Nyʉ̀ ce e yu yìsèe Ta à m kòŋ enɛ yi ba. 5Tɛ bèe a ku'si Nyʉ̀ à nfè' bsìp. Yi yu wa'a.

6Mɛ̀ yu' yuu ce wèe ce gèe, a bɛɛŋger sê. Nyʉ̀ à m kɛ' wèe enɛ wèe ba yì bèe njo' yuu bòŋboŋ ce Jisos Krǎis à m gèe nè wèe. Ka' Nyʉ̀ à m gèe wa'a, wèe à beesì njì nè ye cɛrcɛr sê, a ce dù ba àmbùu nsuŋ mò' ce wèe ce kwà'shi enɛ a nsuŋ mbòŋmboŋ. 7Nsuŋ mbòŋmboŋ mò' ce e yu mini ker ba àgho caa efa yì mɛ̀ m suŋ wèe nà ka'. Bèe mo' a ce jepsi wèe, a ce kòŋ enɛ a ba kupse nsuŋ mbòŋmboŋ ce e yu àmbò Jisos Krâis. 8Ŋwɛ̀ mò' ka' ker fe'shi nsuŋ mbòŋmboŋ mò' ce e yu jɛɛ efa yì ce wèr à m fè'shi nè wèe nà, ndòo co' ye. Ka' à ba fe'shi ba wèr ɛ̀, kɛ̀ ncìndap Nyʉ̀ embe bùu ɛ̀, ndòo co' ŋgàŋ. 9M ce suŋ wèe ba yuu ce wèr à m suŋ wèe nà. Ŋwɛ̀ mò' à ka' ker fe'shi nsuŋ mbòŋmboŋ mò' ce e yu jɛɛ efa yì ce wèr à m fè'shi nè wèe, wèe à yu' a byemi nà, ndòo co' ye.

10Wà' m ce làa buu ca tɛ bèe a bo kòŋ mɛ̀, kɛ̀ yu' rbòŋ nè yuu ce m ce làa a? Yi yu wa' ka'. M ce kòŋ mɛnɛ yu' ba Nyʉ̀ yu' rbòŋ nè mɛ̀. Mɛ̀ m ba ce kòŋ mɛnɛ yu' ba bèe yu' rbòŋ nè mɛ̀, mɛ̀ m ba ba ŋwɛ̀ rfà' nè Jisos Krǎis ka'.

11Bfʉr wâ, m ce kòŋ enɛ wèe riŋ bòŋboŋ enɛ nsuŋ mbòŋmboŋ ce mɛ̀ m fè'shi nè wèe nà à m ba nsuŋ ŋwɛ̀ ka'. 12Mɛ̀ m yu' nsuŋ ca ba ekùè cùu ŋwɛ̀ ka'. À m yɛ'ni ŋwɛ̀ a yɛ'ni mɛ̀ nsuŋ ca ka'. Yu ba Jisos Krǎis ce e m gèe mɛ̀ riŋ buu ca.

13Wèe rìŋ àmbò ya ŋgèe yi m ba à nfè' ce mɛ̀ m ce gèe ba ndèe Jus nà. À m ba à nfè' anà mɛ̀ ce fa ŋgɛ' nè ŋgǎa cor sê. Mɛ̀ m ce kòŋ mɛnɛ cor ba àgho ka'. 14Mɛ̀ m càa bèe magòr sê, efa mʉ̀ yà wà', à njɛ̀ɛ njì ce mɛ̀ m ce gèe ndèe Jûs. Mɛ̀ m tʉr ntee lùulu njep ndèe wa btarkʉ sê. 15Ka' yi m ba wa'a, Nyʉ̀ à m tʉr ntee bòŋboŋ nè mɛ̀, a ce mɛ̀ tɛ yà ma ka' kè bi mɛ̀. 16Nfè' à ka' ghɛɛ, e gee mɛ̀ riŋ muu yì tɛ m bo suŋ bèe enje jɛɛ àmbò muu yì anà. À m ba à nfè' anà mɛ̀ ke' cu mɛnɛ ŋwɛ̀ mò' suŋ mɛ̀ yuu ce m gee ka'. 17Mɛ̀ m dù à rla' Jɛ̀rusalɛ̀m tɛ m bo yɛ bèe ce a m ba ŋgǎa ntuu nè Jisòs entombì nè mɛ̀ nà ka'. Mɛ̀ m nàti cɛrcɛr sê, a du à ŋgǒŋ Àrɛbìyà, a ka' lǒ àfo a ku kʉti ba à rla' Dàmaskòs. 18Bfè' vi ka' cǎa btaar, mɛ̀ du à rlà' Jɛ̀rusalɛ̀m tɛ m bo lɛɛte wèr Pità. Mɛ̀ m cu wèr ye à mnòŋ ncòp-ta-à-rrʉ̀ʉ. 19Mɛ̀ m ker yɛ ŋwɛ̀ ntuu mò' efa mʉ̀ ŋgǎa ntuu entombì nà ka'. Mɛ̀ m ku yɛ ba Jɛms ce e yu nfʉr Tata Jisòs. 20Buu ce m ce saŋ na vi yu mini. Nyʉ̀ rìŋ enɛ m ce nya' ba mnde' ka'. 21Mɛ̀ ka' lǒ à rla' Jɛ̀rusalɛ̀m a du à bdì' mo' à ŋgǒŋ Sirìyà ba à ŋgǒŋ Sìlesìyà. 22À m ba à nfè' anà bcor Jisos Krǎis ce vi m ba à ŋgǒŋ Jùdiyà, a be riŋ mɛ̀ ka'. 23Wowèe a m ku yu' ba buu ce bèe a m ce làa àmbò mɛ̀. Bèe a m ce làa enɛ̂, “Ŋwɛ̀ ce e m ce fa ŋgɛ' nè sèe nà ce fè'shi sè'ni ba àmbò rbyemǐ nè Jisos Krâis, ce e m ce kòŋ enɛ li ba ka' nà.” 24Wowèe a m ce ku'si rlii Nyʉ̀ njo' mɛ̀.

Currently Selected:

Ñwaè' Gaèláshaè 1: LNT

Highlight

Copy

Compare