Ñwaè' Beâe Koreèn Ce Embenjïì 13

1M ka' vʉ ca'ni wèe banɛ a nfè' taar sè'ni àmbò mɛ̀ cà'ni wèe. Kuushi nè enɛ̂, “A ka' vʉ nè mnsa' enɛ ŋwɛ̀ à gèe yuu bebep, banɛ a be sa' mnsa' anà ce bèe a mmbaa kɛ̀ bèe a mntaar ɛ̀, a ka' tɛɛ njìnsa' enɛ ŋgàŋ à gèe fàa anà ghup.” 2Mɛ̀ m bɛɛ wèe mbe nfè' ce mɛ̀ m ker vʉ a ca'ni wèe nà, a ker ce bɛɛ wèe sè'ni na tɛ nfè' ce m be kèr vʉ̀ cà'ni wèe ka' ghɛɛ. M ce làa nè bèe ce a gèe buu bbebep nà ker ba bɛr bèe enɛ m be vʉ̀ tɛ m koosimnse nè wowèe ka'. 3Banɛ wèe be rìŋ enɛ ya nlàa yi lò ese Jisos Krâis. Jisòs Krǎis ye ye ghashi wèe nè mmbo ce mi yu mwɛ̀ni ka', e ce fà' a wěe mʉ nè ŋger-ŋwɛ̀. 4Yi yu mini enɛ e m gò'si à nfè' ce a m taa ye mbe kìntaa. Geewa'a, e cu ntèe sè'ni à ŋger Nyʉ̀. Àmbò wèr yu bgò'sì foŋ àmbò Jisos Krǎis à m ba nà, banɛ wèr be cu btèe foŋ wèr Jisos Krǎis wèe à ŋger Nyʉ̀, a ce fà' nè wèe nè ŋger-ŋwɛ̀.

5Fyɛ' nè wee mnyor yɛ ka enɛ wèe ce cu ba rcu ŋgǎa rbyemì a ba cu lɛ? Mòoshi nè wêe mnyor. Mbò wèe à rìŋ weenɛ Jisos Krǎis yu njep wèe, ce wèe ka' tɛ gwè rmòoshì ka' a? 6M ce kwà'shi mɛnɛ wèe be lò yɛ enɛ wèr à gwè rmòoshì ka'. 7Yuu ce wèr ce loo nè Nyʉ̀ yi yu enɛ wèe fa gèe yuu bebep ka'. Wèr ce loo wa'a, a ke' ce loo tɛ bèe a bo yɛ enɛ wèr à so ka'. Wèr ce loo ba enɛ wèe gee yuu ce yi yu yɛɛnì, ka' yi ce yɛɛti àmbò wèr à lɛ gwè wa'a. 8Yi yu enɛ àde' wèr gee yuu mo' ce àbà yi jepsì yuu mini ka'. Wèr be kù gèe ba yuu ce yi be gèe tɛ mini du ba entòmbì. 9Wèr à ka' ba bgò'sì, wèe ba btatap, nyor boŋ wèr sê. Wèr ku ce loo nè Nyʉ̀ ba enɛ wèe kupse, ba yɛɛnì. 10Banɛ a mbùu ce m ce saŋ buu ca nè wèe ka' lò vʉ̀ cà'ni wèe. M ce saŋ wa'a fà dì' m bo lòr ŋger ce Tata Nyʉ̀ à fa mɛ̀, ghashi wèe ba nè mmbo mtatap à nfè' ce m ka' vʉ ka'. Nyʉ̀ à m fa mɛ̀ ŋger anà tɛ m bo tapsi wèe àgho, ke' ba ba enɛ m sɛɛsi wèe àgho ka'.

11Bfʉr wâ, m ce mìsi ya ŋwà' ca a ce làa nè wèe enɛ wèe cu bòŋboŋ. Ghèter nè kupse, ba yɛɛnì. Yu' nè yuu ce m ce làa. Tʉr nè ntee e mo'sir, cu nè nè cumʉnyaŋ-ŋwɛ̀. Wèe à ka' gee wa'a, Nyʉ̀ ce rkòŋnì li ke lò ese ye, cumʉnyaŋ lo ese ye foŋ nà ba wèe wowèe. 12Cà'ni nè bfʉr wee, baa wowèe nje nyòr à rlii Jisòs. 13Bèe Nyʉ̀ wɛɛwɛ a cà'ni wèe. 14M ce loo mɛnɛ Tata Jisos Krǎis tʉr wèe à ntee bòŋboŋ, tɛ Nyʉ̀ koŋ wèe, tɛ Yʉ' Rara yi gee wèe ba àbee.

Currently Selected:

Ñwaè' Beâe Koreèn Ce Embenjïì 13: LNT

Highlight

Copy

Compare