Ñwaè' Koèlosïì 4
4
1Mmasà, gèe nè ŋgěe bòŋboŋ nè wee bkwàa. Kuushi nè enɛ wee wèe tʉr masà ce e yu mbe bùu.
2Wèe ce loo nè Nyʉ̀ à nfè' wɛɛwɛ. Wee loo, wèe ce kwa'shi ba à yuu ce wèe ce loo anà, ce yoŋshi ye à buu wɛɛwɛ ce e gèe nè wèe. 3Loo nè nè wèr tɛ wèr bo koni njì à rsuŋ nsuŋ ce e m ba à bsʉ̀ti àmbò Jisos Krǎis nà, nè bèe. M yu mbe shaŋ sè'ni na njobè' mɛ̀ m ce suŋ nsuŋ anà nè bèe. 4Loo nè enɛ Nyʉ̀ ja' mɛ̀ tɛ m gee tɛ bèe a riŋ nsuŋ anà bòŋboŋ àmbò mɛ̀ ba gèe.
5Wèe ka' cu wèe bèe ce a yu ŋgǎa rbyemì ka', wèe cu nè bfee-ŋwɛ. Wèe fa mà'shi tɛ nfè' ce wèe yu wèe wowèe anà bʉ à cicì ka'. 6Yɛ nè enɛ wee blàa vi yu bbòŋboŋ, a ker ce lèe àmbò mgwaŋ wa'a. Ŋwɛ̀ ka' bipshi yuu nè wèe, wèe ghetèr beesi ye à njǐ mbòŋmboŋ.
7Tikikòs be suŋ wèe buu wɛɛwɛ ce vi koni mɛ̀. E yu nfʉr ce wèr kòŋ ye sê. E ce gèe rfà' Tata Nyʉ̀ nè yi ntee wɛɛwɛ. Wèr ye ce fà' nè Tata Jisòs àbee. 8Mɛ̌ tuu ye enɛ e vʉ yɛ wèe tɛ e bo suŋ wèe àmbò wèr yu, kèr fa wèe ŋger foŋ. 9Yùnismòs ce e yu muu wèe à vʉ̀ a ye. E yu nfʉr ce wèr kòŋ sê. E ce dù àmbùu Jisòs nè yi ntee wɛɛwɛ. Wowèe a be suŋ wèe buu ce vi koni wèr àfa wɛɛwɛ.
10Àristakòs ce wèr ye yu mbe shaŋ, à cà'ni wèe. Mak ce e yu nfʉr Bànabàs à cà'ni wèe foŋ. Mɛ̀ fa wèe ncep àmbò Mak wɛɛ. Mɛ̀ suŋ wèe enɛ e ka' vʉ̂, wèe konì ye bòŋboŋ. 11Jisòs ce a too li rlii mo' enɛ Jostòs à cà'ni wèe foŋ. Ku ba bèe a mntaar ca ce a yu Jus à mʉ̀ bèe ce wèr wowèe ce fà'. Wèr wowèe ce fà' wa'a tɛ bèe a bo rìŋ àmbò kʉʉ Nyʉ̀. Wowèe a fa mɛ̀ ŋger magòr sê. 12Ɛ̀pafràs ce e yu muu wèe, a ker ba ŋwɛ̀ rfà' nè Jisos Krâis, à cà'ni wèe. E ce loo nè wèe à nfè' wɛɛwɛ enɛ Nyʉ̀ gee tɛ wèe tɛɛ tatap, ba àmbò Nyʉ̀ ce kòŋ enɛ wèe à ba ba, rìŋ buu ce Nyʉ̀ ce kòŋ enɛ wèe à ba gèe, gèe buu anà wɛɛwɛ. 13Mɛ̀ yɛ nè ma mmir enɛ e ce fà' tatap sê, tɛ e bo jà' wèe, jà' běe à rla' Làodisìyà ker ba běe à rla' Hìrapolìs. 14Luk ce wèr kòŋ sê, ce e ke fa bèe mcɛ̀p nà, ker ba Dimàs, a cà'ni wèe.
15Cà'ni nè bfʉr ce à rla' Làodisìyà nè mɛ̀, ker ca'ni Nimfà ba bèe ce a ke niŋ cor mbe yě ndàp nà foŋ. 16Wee bè' ŋwà' ca, wèe tuusì nè cor ce à rla' Làodisìyà tɛ wowèe a bo bè' foŋ. Wee wèe be' ŋwà' ce mɛ̀ tuusi nè cor ce à rla' Làodisìyà nà foŋ. 17Làa nè nè Àkibòs enɛ e ce gee rfà' ce Nyʉ̀ à fa nè ye enɛ e gee nà. 18À saŋ mɛ̌ Pôl, a saŋ rcà'ni ca nè ya bo. Kuushi nè yà ŋgɛ' ce m ce yɛ mbe shaŋ. M ce loo mɛnɛ Nyʉ̀ tʉr wèe à ntee bòŋboŋ.
Currently Selected:
Ñwaè' Koèlosïì 4: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
