Ñwaè' Koèlosïì 3

1Wèe rìŋ enɛ Nyʉ̀ à gee wèe à fʉʉ efa rkwe wèe Jisòs Krǎis wèe, banɛ wèe lɛ ntee ba à buu embe bùu, mbe dì' Jisos Krǎis yu, a cu à rkoo mà' Nyʉ̀. 2Kù ce kwa'shi nè ba àmbò buu embe bùu, ke' ba àmbò buu enjep ŋgòŋ ka'. 3Wèe kwa'shi wa'a njobè' wèe à m kwe, le ryòŋ li ba njep Jisos Krǎis ce e yu a Nyʉ̀, Nyʉ̀ à kupshì ryòŋ anà a lɛ nè wèe. 4Le ryòŋ yu Jisos Krâis. Be kè ba à nfè' ce e nyɛɛ, tɛ wèe wowèe ba àbee, tɛ wèe tʉr ŋgʉ̀' mò' efa fòo ce Nyʉ̀ à fa nè ye.

5Banɛ wèe borni njɛ̀ɛ buu ce wèe à m ce gèe à nfè' wèe à m ce cu ba rcu enjep ŋgòŋ na nà. Lòr nè buu anà àmbò buu ce vi kwe wa'a. Mà'shi nè bsàkì ba mkɛ'ni, borni ŋgěe bebep wɛɛwɛ, ba mkwà'shǐ mmbembep. Fa bàŋ mmir à buu ka', njobè' à ka' ce bàŋ mmir à buu banɛ wɛ̀ lòr buu anà àmbò yu Nyʉ̀ wa'a. 6Njɛ̀ɛ buu bbebep ca vi gèe Nyʉ̀ ce ko'si rshentee nè bèe. 7À m ba à nfè' entombì wèe à ce gèe njɛ̀ɛ ŋgèe ca, njɛ̀ɛ mkwà'shì à rgèe buu ca mi tʉr ŋger mbe wěe ndù. 8À ka' ba sè'ni ce wèe Jisos Krǎis wèe yu àbee na, banɛ wèe borni ŋgěe bebep. Fa ba ŋwɛ̀ rshentee kɛ̀ ŋwɛ̀ ncɛpntee ka'. Fa kwà'shi bebep àmbò ŋwɛ̀ mò' ka'. Fa ba ŋwɛ̀ mnsa'ni ka'. Fa mà'shi tɛ blǎa bbebep vi fʉʉ eku wɛ̌ cùu ka'. 9Fa nya' nè mnde' nè ŋwɛ̀ mò' ka', njobè' wèe à mà' ye ŋgěe rʉ̀ʉ ce wèe à m ce gèe nà, 10a lor sè'ni ba ŋgěe fi. Nyʉ̀ ce e m boo wèe à běe bfi ca ce kupshi ye ŋgèe ca tɛ yi bo ba àmbò ŋgèe yi, tɛ wèe bo rìŋ ye bòŋboŋ. 11À ka ba njobè' wèe à tʉr ba ŋgěe fi sè'ni na, jɛɛ jɛ̀ɛ jɛɛ ker ba fa wěe mʉ ka'. Jus a yu jɛɛ efa bèe enje jɛɛ ka'. Bèe ce a gèe bʉ̀ a yu jɛɛ efa bèe ce a yu mbɛ̀'nsʉ̀r ka'. Ŋwɛ̌ à rìŋ yu jɛɛ ka'. Nfuu bkà' a yu jɛɛ ka. Jɛɛ jɛ̀ɛ jɛɛ yu àgho mbetar bkwàa ba boo ka'. Wowèe wɛɛwɛ a ku ba byɛɛnì njobè' a ce yɛ sè'ni ba Jisos Krâis, à ba ye ce e tʉr bèe wɛɛwɛ.

12Nyʉ̀ à ce wèe enɛ wèe ba yì bèe. E kòŋ wèe sê. Banɛ wèe gee ba ŋgèe ce yi dùŋshi enɛ wèe yu yì bèe. Ce koosi nè mnse nè bèe mo', gee ŋgěe bòŋboŋ nè wowèe. Lòr nè wee mnyor njep nshè, ba nè rbonì-ŋwɛ̀, ker kur ntee. 13Fa bepsi nè ntee cɛrcɛr ka'. Ŋwɛ̀ mò' ka' gee yuu bebep nè wèe, wèe foosì ye. Tata Jisòs à fòosi wèe efa yè buu bbebep, banɛ wèe foosi bèe mo' foŋ. 14Yuu ce yi yu lulu sê, yi yu enɛ wèe koŋ bèe, njobè' rkòŋnì a yuu ce yi kur buu ca wɛɛwɛ àbee, tɛ wèe bo ba àmbò Nyʉ̀ ce kòŋ enɛ wèe ba. 15Yɛ nè enɛ cumʉnyaŋ ce e lò ese Jisos Krǎis ba njep wěe mntee à buu wɛɛwɛ ce wèe ce gèe, njobè' Nyʉ̀ à kɛ' wèe enɛ wèe ba àbee àmbò ŋwɛ̀ mò'sir, nè cumʉnyaŋ-ŋwɛ̀. Ce yoŋshi nè Nyʉ̀ à nfè' wɛɛwɛ. 16Yɛ nè enɛ blǎa Jisòs vi cu njep wěe mntee à nfè' wɛɛwɛ. Lòr bfee ce Nyʉ̀ à fa wèe, yɛ'ni ker cep àgho. Ku'si Nyʉ̀ nè byɛɛ njɛ̀ɛ jɛɛ jɛ̀ɛ jɛɛ. Wee yòp wa'a, wèe ce yoŋshi Nyʉ̀ enjep ntee. 17Buu wɛɛwɛ ce wèe ce gèe, kɛ̀ wèe ce làa ɛ̀, gèe nè buu anà wɛɛwɛ ba à rlii Tata Jisòs, ker ce yoŋshi Nyʉ̀ Tàr a yě rlii.

18Bbyèŋgê, yu'ni nè nè bduu wee àmbò bèe ce a ce dù àmbùu Tata Jisòs a ba gèe.

19Mmbaŋrù, kòŋ nè wee bbyèŋge. Fa nyʉ̀' nè wowèe ka'. 20Bôo, yu'ni nè nè wêe bta ba wêe mma à buu wɛɛwɛ, njobè' wèe ka' ce gèe wa'a, Tata yu' rbòŋ. 21Btar boo, wèe fa gèe ŋgèe à njɛ̀ɛ njì ce ntee yi lo yaŋ boo wee tɛ bsɛ̀ vi lo koo wowèe ka'. 22Bkwàa, yu'ni nè nè wee mmasà enjep ŋgòŋ na. Wèe fa kù ce fà' ba à nfè' ce wowèe a ce yɛ wèe tɛ wowèe a bo yu' rbòŋ nè wèe ka'. Fà' nè nè wowèe nè ntěe mo'sir njobè' wèe ce wɛp Tata Nyʉ̀. 23Wèe ka' ce gèe ba njɛ̀ɛ kɛ, wèe gee nè ye ntee wɛɛwɛ njobè' wèe ce gèe yuu anà ba nè ŋwɛ̀ ka, wèe ce gèe ba nè Tata Jisòs. 24Ŋwɛ̀ ce e yu yè masà yu Tata Jisos Krâis. E be kè là' wèe. E be kè fa wèe buu ce e kupshi a lɛ nè yì bèe. 25Nyʉ̀ be là' bèe ce a ce gèe buu bbebep à buu bbebep anà. E ke so'niŋgòŋ ka'.

Currently Selected:

Ñwaè' Koèlosïì 3: LNT

Highlight

Copy

Compare