Ñwaè' Táèsaèlonikaè Ce Entombïì 1

1Ŋwà' ca ce saŋ mɛ̌ Pôl, ba Silàs ba Timotì nè ŋgǎa cor ce a yu à rla' Tɛ̀sàlonikà. Bèe ca yu bèe Nyʉ̀ Tàr, a ker ba bèe Jisos Krǎis foŋ. M ce loo mɛnɛ Nyʉ̀ tʉr wèe à ntee bòŋboŋ, fa wèe cumʉnyaŋ.

2Wer ke loo à nfè' wɛɛwɛ ce kuushi wèe ker ce yòŋshi Nyʉ̀ njo' wèe. 3Wer ke loo nè Tata Nyʉ̀ wa'a ce kuushi njɛ̀ɛ rbyemì ce wèe à tʉr nè Jisos Krâis, a ce fà' àgho. Wer ke loo wa'a ce kuushi mfà' ce wèe ce gèe njo' le rbyemì, ba le rkòŋnì ce wèe tʉr nè Jisos Krâis, a ker ce kuushi àmbò wèe à tɛɛ tatap a ce kè' nfè' ce e be vʉ̀. 4Bfʉr wêr, wèr rìŋ enɛ Nyʉ̀ à kòŋ wèe, a ce wèe. 5Wèr rìŋ wa'a njobè' wèr à m ku fe'shi Nsuŋ Mbòŋmboŋ ca nè wèe ba nè cùu cà' ka'. Wèr à m fè'shi nè wèe nè ŋger-ŋwɛ̀ à ŋger Yʉ' Rara, a riŋ enɛ yuu ce wèr ce làa yi yu mini. Wèe rìŋ njɛ̀ɛ rcu ce wèr à m ce cu a wěe mʉ. Wèr à m ce cu wa'a njo' wèe. 6Wèe à m koni yuu ce wèr à m ce gèe, a koni yuu ce Tata Jisòs à m ce gèe. Ka' a m fa wèe ŋgɛ' gòr wa'a, wèe à m ku yu' blàa ca a byemi, Yʉ' Rara yi gee wèe à ce lu'shi. 7Wèe à ka' byemi wa'a, a ba rdùŋshì nè ŋgǎa rbyemì ce à ŋgǒŋ Mɛ̀sɛ̀donìyà ba à ŋgǒŋ Àkayà. 8Blàa àmbò Tata ce vi lò ese wèe vi ku ba' ba à ŋgǒŋ Mɛ̀sɛ̀donìyà ba à ŋgǒŋ Àkayà ka', běe à bto' wɛɛwɛ a yu' àmbò le rbyemì ce wèe tʉr nè Nyʉ̀. Yi ka' ba wa'a, yuu mo' ce àde' wèr ker suŋ bèe àmbò wèe yi yu ka'. 9Bèe a ce suŋ àmbò wèe à m koni wèr à nfè' ce wèr à m vʉ̀ ca'ni wèe nà. A ce suŋ foŋ àmbò wèe à m mà'shi mnyʉ̀ enjep ŋgòŋ na a ce fà' ba nè Nyʉ̀ ce e yu ntèe, à ba Nyʉ̌ mini, 10a ker ce kè' nfè' ce muu yì be sùu embe bùu. Muu yì anà yu Jisòs ce e m fʉʉ efa rkwe, à ba ye ce e be fʉr sèe efa ku' ŋgɛ' ce e be vʉ̀ à nfè' ce Nyʉ̀ à sa' ŋgòŋ ca.

Currently Selected:

Ñwaè' Táèsaèlonikaè Ce Entombïì 1: LNT

Highlight

Copy

Compare