Ñwaè' Timotïì Ce Embenjïì 3

1Rìŋ enɛ be kè ba à nfè' elʉ̀simbùu tɛ ŋgɛ' ba sê. 2Bèe a be kè kòŋ wap mnyor, kòŋ mbàa sê, ce yu' nyor, kèr ce suŋni nyor, ce cɛpni. Boo foŋ a be kè tèe btu nè wap mma ba wap btâ. Bèe a be kè ce yòŋshi bèe à buu bbòŋboŋ ce a gèe nè wowèe ka', ce gèe mntùp buu. 3Bèe a be kè ce kòŋni ka', tʉr ntee rfòosì ka', ce tee mnde' mbe tu bèe mò', gèe yuu ce yàp nyor ce kòŋ enɛ a gêe, ce gèe ŋgèe mnyàa, kòŋ buu bbòŋboŋ ka'. 4Bèe a be kè ce ye mcʉ̀ mbe btu bèe mò', ce gèe buu àwàa, ce nàa nyor, kòŋ à rye ŋgòŋ, kè' kòŋ Nyʉ̀ ka'. 5Wowèe a be kè rìŋ Nyʉ̀ ba à mŋgùpcùu kè' rìŋ ye enjep ntee ka', Fa tɛɛ kùu wèe njɛ̀ɛ bèe anà ka'. 6Bèe mo' efa wǎp mʉ a lo la' kùu du à mndap bèe mo', bo' bbyèŋge ce a yu blʉr a ce wɛp buu njo' yàp buu bbebep ce wowèe a jep njep mʉ̀ mo. 7Njɛ̀ɛ bbyèŋge anà a kòŋ à ryɛ'ni buu sê, a ce ghèter sê, a ke' riŋ yuu mini ka'. 8Njɛ̀ɛ mmbaŋrù ce a bo' bbyèŋge na a bàa yuu ce yi yu mini àmbò Jɛnìs ba Jɛmbrɛ̀s a m gèe nè Musìs nà. Wap mntee vi yu bsii, lap rbyemì li ba mini ka'. 9Bèe a be lò tee yàp mbùu tɛ wowèe a yɛɛti àwaŋ àmbò Jɛnìs ba Jɛmbrɛ̀s a m yɛɛti nà.

10Wɛ̌ Timotì, wɛ̀ rìŋ la ryɛ'nì ba njɛ̀ɛ njì ce m ce cu la rcu, a riŋ yuu ce m ce kòŋ à rgèe njep ŋgòŋ na, a yɛ la rbyemì, a yɛ njɛ̀ɛ njì ce m ce kur ntee, a yɛ la rkòŋnì, a yɛ foŋ àmbò mɛ̀ tɛɛ tatap nè Jisòs, 11a yɛ ŋgɛ' ce bèe a m ce fa nè mɛ̀, a yɛ mlù ce mɛ̀ m ce yɛ. Wɛ̀ m yɛ yuu ce yi m koni mɛ̀ à rla' Antìyòk ba à rla' Ìkonìyòm ker ba à rla' Listrà. Bèe a m fa mɛ ŋgɛ' sê, mɛ̀ ku tɛɛ tatap, Tata Jisos à ja' mɛ efa ŋgɛ' anà wɛɛwɛ. 12Yi yu mini enɛ bèe a be fa ŋgɛ' nè bèe ce a ce dù àmbùu Jisòs, a ce kòŋ à rcu lap rcu àmbò Nyʉ̀ ce kòŋ. 13Ŋgèe bèe ce a yu yap ba běe bbebep, a ce bo'shi enɛ a rìŋ Nyʉ̀ se nà, yi be bep càa ŋger. Wowèe a be kè ce bo' bèe, ce bo' wap btu foŋ. 14Kù tɛɛ yo ba njep buu ce a m yɛ'ni wɛ̀, wɛ̀ rîŋ, a byemi enɛ vi yu mini nà, kuushi bèe ce a m yɛ'ni wɛ̀ buu anà. 15Wɛ̀ rìŋ enɛ kɛ̌' à nfè' ce wɛ̀ m ba ghàrŋwɛ̀ vʉ ghɛɛ sè'ni na, wɛ̀ rìŋ blàa embe Ŋwǎ' Nyʉ̀ sê. Àde' blàa anà vi gee à tʉr bfee, byemi nè Jisos Krâis, lûŋ. 16Blàa wɛɛwɛ ce vi yu mbe Ŋwǎ' Nyʉ̀, vi lò ese Nyʉ̀, a tʉr sɛ' sê. Vi yu à ryɛ'ni bèe, a ba à rlapni bèe ce a ce yɛ'nì ryɛ'nì mnde', a ba à rnàshi bèe, a ker ba à rcep bèe tɛ a bo cu rcu ryɛɛnì, 17tɛ ŋwɛ̀ ce e ce fà' nè Nyʉ̀ bo tʉr buu wɛɛwɛ, ghɛɛte à rgèe mfǎ' mmbòŋmboŋ.

Currently Selected:

Ñwaè' Timotïì Ce Embenjïì 3: LNT

Highlight

Copy

Compare