Ñwaè' Beâe Koreèn Ce Embenjïì 9

1Mbùu mò' ker ba àgho nè mɛ à rsaŋ nè wèe kuu rfa ce wèe à ba fa tɛ a bo jà' bèe Nyʉ̀ àgho nà ka'. 2Mɛ̀ rìŋ mɛnɛ wèe à tami nyor a ce lu'shi à rjà' wowèe. A mbùu ce m ce nàa tu nè wèe à bsii bèe Nyʉ̌ à ŋgǒŋ Mɛ̀sɛ̀donìyà mɛnɛ wèe ce běe à ŋgǒŋ Àkayà à m tami nyor à rfa kɛ' ha' ŋgàani. Ye ntee ce wèe à tʉr à rfa yuu yi gèe bèe magòr efa wǎp mʉ a koŋ à rfa foŋ. 3M ku ce kòŋ à rtuu bfʉr ca nè wèe tɛ nàatu ce wèr ce nàa nè wèe nà bo bʉ à cicì ka'. M ce tuu wowèe tɛ wèe bo tami nyor àmbò mɛ̀ m làa nà, 4njobè' m ka' vʉ wèr bèe mo' e à ŋgǒŋ Mɛ̀sɛ̀donìyà, wowèe a vʉ yɛ enɛ wèe à tami nyor ka', rìtu yi koo wèr. Rìtu yi ka' koo wèr, yi ba ekɛ àmbò wèe ce wèr à lɛ̀ ntee njep wèe. 5A mbùu ce mɛ̀ m kwà'shi mɛnɛ m loo bfʉr ca tɛ wowèe a du entombì yɛ wèe, tɛ a bo baashi rfa ce wèe à m kà'ni à rfa na mbe dǐ' mo'sir tɛ m ka' vʉ̀. Wèe à ka' gee wa'a, yi duŋshì enɛ wèe à fa njobè' wèe à kòŋ à rfa ke' ba njobè' a tàa wèe tàa ka'.

6Kuushi nè enɛ ŋwɛ̀ ce e ka' bye mʉcàr banɛ ŋgàŋ be kep mʉcàr, tɛ ŋwɛ̀ ce e byè gòr kep gòr. 7Ŋwɛ̀ wɛɛwɛ fa àmbò e kwà'shi enjep yě ntee à rfa. E fa, e fa ce de'ŋger kɛ̀ fa njobè' a tàa ye tàa ka' njobè' Nyʉ̀ kòŋ ŋwɛ̀ ce e ce fa nè rlu'shì-ŋwɛ̀. 8Nyʉ̀ tʉr ŋger à rghòni wèe gòr sê, tɛ wèe ke' buu yuu mo' à nfè' mò' ka', tɛ wèe bo lòr buu anà gèe mfǎ' mmbòŋmboŋ àgho. 9Yi yu àmbò a saŋ mbe Ŋwǎ' Nyʉ̀ enɛ̂, “E lɛ̀ mi mmbo mtoo nè ŋgǎa fùp, yi ŋgěe bòŋboŋ yi ce kupse à nfè' mò' ka'.” 10Nyʉ̀ ce e ke fa ŋgʉ̀ buu nè ŋwɛ̀ rbyè, ker fa yuu ye, be fa wèe ku' ŋgʉ̀ buu, gèe tɛ ye ŋgěe bòŋboŋ yi fa sɛ' gòr. 11E be gèe tɛ wèe tʉr buu gòr à nfè' wɛɛwɛ, ba mmbo mtoo a nfè' wɛɛwɛ tɛ bèe magòr a bo yòŋshi Nyʉ̀ njo' le rfa ce wowèe a ce koo ese wèr. 12Rfà' ce wèe ce gèe na li ce jà' bèe Nyʉ̀ ce a buu yuu, a ker ce gèe bèe magòr a ce yòŋshi Nyʉ̀. 13Wèe à ka' gee njɛ̀ɛ rfà' ca, banɛ wèe ce dùŋshi bèe njɛ̀ɛ bèe ce wèe yu. Bèe a be yɛ, kù'si Nyʉ̀ njobè' wèe ku ce gèe ba buu ce wèe à làa àmbò Nsuŋ Mbòŋmboŋ kuu Jisos Krâis. 14A be yòŋshi ye foŋ njobè' wèe yu mmbo mtoo nè wowèe, ker ba nè bèe wɛɛwɛ. 15Sěe yòŋshi Nyʉ̀ à ku' li rfa ce àde' sèe tʉr cùu à rsuŋ ka' nà.

Currently Selected:

Ñwaè' Beâe Koreèn Ce Embenjïì 9: LNT

Highlight

Copy

Compare