Ñwaè' Beâe Koreèn Ce Embenjïì 8

1Bfʉr wâ, wèr ce kòŋ enɛ wèe riŋ yuu bòŋboŋ ce Nyʉ̀ à m gèe bcor ce vi yu à ŋgǒŋ Mɛ̀sɛ̀donìyà vi gêe. 2Ŋgɛ' ce wowèe a m yɛ, à m mòoshi wowèe sê. Geewa'a wowèe a m ce lu'shi sê, a ba mmbo mtoo sê, ka' fùp à m koo wowèe se wa'a. 3Mɛ̀ rìŋ mɛnɛ wowèe a m ku fa ba àmbò àde' wowèe a m ba fa ka', wowèe a m fa a caa embo. À m làa ba ŋwɛ̀ nè wowèe enɛ wowèe a fa wa' ka', à m ku kwa'shi ba wowèe a fa wa'a. 4Wowèe a m loo wèr, a loo nè mini-ŋwɛ̀ enɛ wèr gee yuu bòŋboŋ nè wowèe, fa wowèe njì foŋ tɛ a ja' bèe Nyʉ̀ ce a yu à ŋgɛ'. 5Yuu mo' ce wèr à m ce kwà'shi enɛ àde' yi ba ka', yi yu enɛ wowèe a m fa wap mnyor nè Tatâ, a ker fa nè wèr foŋ àmbò Nyʉ̀ e kòŋ. 6Wèr à ka' yɛ wa'a, a loo Taitòs ce e m kɛ̀' rfà' rjà' ca enɛ e du nè rfà' ca kùntombì, ja' wèe tɛ wèe misi rfǎ' rbòŋboŋ ce Nyʉ̀ à fa wèe na. 7Wèe ce gèe buu wɛɛwɛ bòŋboŋ. Wèe tʉr rbyemì tatap. Wèe rìŋ à rsuŋ buu Nyʉ̀, wèe tʉr bfee à buu mini, wèe à kòŋ à rjà' bèe, wèe à kòŋ wèr. Banɛ wèr ce kòŋ wernɛ wèe gee rfǎ' rbòŋboŋ ca bòŋboŋ foŋ.

8M ce làa wa'a a ce fa ba rsa' ka'. M ce kòŋ ba à rfè' le rkòŋnì à rkòŋnì lǐ bèe mo', tɛ m bo yɛ mɛnɛ le rkòŋnì anà li yu mini lɛ. 9Kuushi nè njɛ̀ɛ ntee bòŋboŋ ce Tata Jisòs à m tʉr. E m ba ŋwɛ̀ bkù', a lo a kʉti ŋwɛ̀ fùp njo' wèe, tɛ yì fùp ca bo gèe tɛ wèe tʉr bkù'. 10Cena yu ba yà ncep ce m ce fa nè wèe àmbò buu ca. Yi bòŋ enɛ wèe misi yuu ce wèe à m kɛ̀' ha' ŋgàani nà sè'ni na. Wèe à m ba bèe entombì, a ke' ku ba ba bèe entombì à rfa cà'cà' ka', wèe à m ba bèe entombì ce a m kɛ̀' a tami nyor à rfa. 11Banɛ wèe gee rfà' ca misî. Wèe gee li nè ntee bòŋboŋ àmbò wèe à m kɛ̀' nè ntee bòŋboŋ foŋ nà. Gèe nè li nè yuu ce wèe à tʉr. 12Ŋwɛ̀ à ka' tʉr ntee à rfa, Nyʉ̀ be koo ba yuu ce ŋwɛ̀ anà tʉr, ke' ba ba yuu ce e buu ka'. 13M ce làa ba enɛ wèe fa gòr sê, lo bɛ buu, tɛ bèe mo' a bo yu' rbòŋ àgho ka'. M ce làa ba enɛ bèe wɛɛwɛ a tʉr yuu ce yi ghɛɛ wowèe, tɛ bèe wɛɛwɛ a bo ba yɛɛnì, tɛ mò' buu yuu ka'. 14Wèe ja' bèe ce a buu yuu, nè ku' buu ce wèe tʉr sè'ni na, wee wèe à ka' buu yuu, wowèe a tʉr, tɛ a bo jà' wèe àgho foŋ. Yi ba sè'ni enɛ ŋwɛ̀ wɛɛwɛ à tʉr yuu ce e buu. 15Yi yu àmbò a m saŋ mbe Ŋwǎ' Nyʉ̀ enɛ̂,

“Ŋwɛ̀ ce e m kwɛ̀' gòr à m tʉr gòr se ka'.

Ŋwɛ̀ ce e m kwɛ̀' mʉcàr à m tʉr mʉcàr se ka'.”

16M ce yòŋshi Nyʉ̀ enɛ e gèe Taitòs à koŋ à rjà' wèe àmbò wer wèr foŋ à kòŋ à rjà' nà. 17Taitòs à m ku byemi ba yuu ce wèr à m làa nè ye ka', e kòŋ à rjà' wèe sê, a kwa'shi sè'ni nè yi tu enɛ e be vʉ̀ yɛ wèe. 18Wèr ce tuu nfʉr mò' enɛ e du a Taitòs. Nfʉr ca tʉr rlii rbòŋboŋ à bcor wɛɛwɛ njo' blǎa Nyʉ̀ ce e ce fè'shi. 19E yu ŋwɛ̀ ce bcor wɛɛwɛ a ce, a tuu enɛ wèr wowèe jɛr koo rfa ca. Cena yu rfà' ce li be gèe tɛ bèe a ku'si Tata Nyʉ̀, kèr rìŋ foŋ enɛ wèr ce kòŋ à rjà' bfʉr wer. 20Wèr ce lòr nfè' nè ku' rfa ca, fà dì' bèe mo' a lo ce de'ŋger kùu rfa anà ka'. 21Wèr ce ghèter à rgèe ba yuu ce yi yu bòŋboŋ à bsii Tatâ, ker ba à bsii bèe foŋ.

22Banɛ wèr ce tuu nfʉr wèr mò' foŋ enɛ e du a wowèe. Nfʉr ca yu ŋwɛ̀ ce wèr à fyɛ' ye nfè' àŋgoo sê, a yɛ enɛ e tʉr ntee à rgèe rfà' Nyʉ̀ à nfè' wɛɛwɛ. E tʉr ntee à rjà' wèe sè'ni na sê, njobè' e tʉr ntee njep wèe gòr sê. 23À ka' ba yi àmbò Taitòs, e yu ŋwɛ̀ ce wèr ye ce fà' àbee tɛ wèr bo jà' wèe. À ka' ba àmbò bfʉr mo' ce a wowèe a ce dù nà, wowèe a tɛɛ àtu bcor wɛɛwɛ. Wowèe a be gèe tɛ bèe a nɛsi Krâis. 24Dùŋshi nè nè bèe ca enɛ wèe à kòŋ wowèe nè mini-ŋwɛ̀. Wèe ka' gee wa'a, banɛ bcor wɛɛwɛ a be yu', rìŋ enɛ nàatu ce wèr à m nàa nè wèe nà, à m ba nàatu mini.

Currently Selected:

Ñwaè' Beâe Koreèn Ce Embenjïì 8: LNT

Highlight

Copy

Compare