Ñwaè' Beâe Koreèn Ce Embenjïì 10

1Mɛ̌ Pôl, m ce bu' mmbo nè wèe. Bèe a ce làa enɛ mɛ ke ba a wěe mʉ ce wɛp, e ba à nfè' m yu àfo ka', m saŋ ŋwà' tatap nè wèe. M ce loo nè wèe à rlii Jisòs ce e tʉr rbonì, a ba mʉnyaŋ enɛ, 2wèe fa gèe tɛ m lo làa nè njèndoŋ ntatap nè wèe à nfè' ce mɛ̀ vʉ̀ ka'. Àde' m laa tatap ba nè bèe ce a ce làa enɛ wèr ce gèe rfà' tɛ wèr bo ye sɛ' enjo, àmbò bèe enjep ŋgòŋ a ke gèe nà. 3Yi yu mini enɛ wèr ce cu njep ŋgòŋ na. Wèr ce cu njo wa'a, a ke' ce mà' bìr ba àmbò bèe enjep ŋgòŋ na a ke mà' nà ka'. 4Buu bìr ce wèr ce mà' bìr àgho yu ba buu bìr enjep ŋgòŋ na ka'. Wèr ce mà' ba nè buu bìr vǐ Nyʉ̀ ce vi tʉr ŋger, a ce sà'si bdì' ce yer ŋgǎa bbàa a cu. 5Wèr ce lòr buu bìr ca ce siŋsi bfee bèe enjep ŋgòŋ na àgho, ker ba njɛ̀ɛ buu ce bèe a ce kwà'shi, ce vi gèe wowèe a mɛŋnì bfee Nyʉ̀. Wèr ce lòr vi ce so mkwà'shì bèe àgho tɛ wowèe a bo yu'ni nè Jisos Krâis. 6Wèe a ka' duŋshi enɛ wèe à yu'ni nè Jisos Krǎis nè ye ntee-ŋwɛ̀, wèr fa ŋgɛ' nè bèe ce a tèe btu.

7Wèe ce fyɛ' buu ba efa mmìr. Ŋwɛ̀ mò' à ka' ce lòr yi tu enɛ ku ba ye ŋwɛ̀ yì Jisos Krâis, ŋwɛ̀ anà a ba kwà'shi nfè' baa, rìŋ enɛ wer wèr foŋ yu bèe vi Jisos Krâis.

8Wèe à ka' ce kwà'shi enɛ m ce yu' nyor magòr nè ŋger ce Tata Jisos Krǎis à fa wèr nà, banɛ àde' m koosì rìtu ka'. E fa mɛ̀ ŋger anà tɛ m bo tapsi wèe àgho, ke' ba ba enɛ wèr sɛɛsi wèe àgho ka'. 9Wèe fa kwà'shi enɛ m ku ce wɛpsi wèe ba nè mŋwà' ce m ce saŋ na cà'cà' ka'. 10Mɛ̀ làa wa'a njobè' bèe a ce làa enɛ mŋwà' ce m ce saŋ nè wèe vi tap, a ce' sê, mɛ̌ ba fa wěe mʉ, yɛɛti àmbò ŋwɛ̀ ce e gò'si, la rfè'shì li tʉr ŋger ka'. 11Bèe anà a ba rìŋ enɛ buu ce wèr ce saŋ nè wèe à mŋwà' njo' wèr yu àfo ka' nà vi yu jɛɛ efa vì ce wèr be gèe à nfè' ce wèr à vʉ̀ a yɛ wèe nà ka'.

12Àde' wèr ke laa nyʉ̀ mò' enɛ wèr yu àmbò bèe ce a ce kwà'shi enɛ a yu běe bgòrgòr nà ka'. Àde' wèr fe'nì yer ŋger à yap ka'. Wowèe a ce fè'ni yap ŋger fa wǎp mʉ wa'a, banɛ wowèe a yu blʉr. 13Wèr be nàa tu caa embe dì' ce wèr à ba nàa ka'. Wèr be nàa tu ba à rfà' ce Nyʉ̀ à fa nè wèr. Rfà' ce wèr ce gèe fa wěe mʉ yu mbèp mò' efa rfà' anà. 14Wèr à m nàti a jɛr sê, a vʉ a yɛ wèe a fe'shi Nsuŋ Mbòŋmboŋ àmbò Jisos Krǎis nè wèe. Àmbò wee yu mbèp mo' efa ler rfà' na, wèr à ka' ce nàa tu nè wèe banɛ wèr ce nàa tu a caa embe dì' ce wèr à ba nàa ka'. Wèr à m ka' tɛ bà fà' fa wěe mʉ ka', wèr à m ba nàa tu càa embo. 15Wèr à nàa tu a caa embe dì' wèr à ba nàa ka' njobè' wèr à nàa tu nè rfà' ce bèe mo' a gèe ka'. Wèr ce kwà'shi ba enɛ le rbyemì li be kù ce kù' tɛ ler rfà' ce wèr ce gèe fa wěe mʉ li ku' foŋ sê. 16Yi ka' ba wa'a, wèr ce fè'shi Nsuŋ Mbòŋmboŋ ca à bdì' mo' foŋ, ke' ce nàa tu à rfà' ce ŋwɛ̀ mò' à gèe fa yě ŋkʉ̀ ka'. 17Yi ba enɛ̂, “Ŋwɛ̀ à ka' ce nàa tu, e naa ba à yuu ce Tata à gèe.” 18Yu ba ŋwɛ̀ ce e ce làa enɛ e yu yɛɛnì ce àde' e ba yɛɛnì ghup à bsii Tata ka'. Ŋwɛ̀ ce e yu yɛɛnì à bsii Tata yu ŋwɛ̀ ce Tata rìŋ enɛ e yu yɛɛnì.

Currently Selected:

Ñwaè' Beâe Koreèn Ce Embenjïì 10: LNT

Highlight

Copy

Compare