Ñwaè' Beâe Koreèn Ce Embenjïì 7

1Bkar wâ, àmbò Nyʉ̀ à gèe mkà'ni ca nè sèe, sèe raasi visèe btu efa buu wɛɛwɛ ce vi ce bepsi visèe mnyor ba visèe byʉ'. Sèe ce wɛp Nyʉ̀, fa visèe btu wɛɛwɛ nè ye, ce gee ŋgěe rara à buu wɛɛwɛ.

2Mʉ̀' nè wee mntee nè wèr. Wèr à gèe fàa nè ŋwɛ̀ mò' ka', wèr à dà'si ŋwɛ̀ mò' ka', wèr à ye sɛ' efa ŋwɛ̀ mò' ka'. 3M ce làa wa'a, a ke' ce lapni wèe lapni ka'. Wèr tʉr wèe à ntee bòŋboŋ àmbò wèr à m suŋ wèe nà. Kɛ̀ yu rkwe ɛ̀, kɛ̀ yu rlùŋ ɛ, sèe ku ba àbee. 4M tʉr ntee njep wèe nè mini-ŋwɛ̀, a ce nàa tu nè wèe. Wèe ce gèe ya ntee yi ce fʉte. Ka' wèr yu njep ŋgɛ' wa'a, m be kù ce lu'shi lu'shi njo' wèe.

5Wèr à m bà' à ŋgǒŋ Mɛ̀sɛ̀donìyà a lʉshi ka', mlù mi ku bii nè wèr. Ŋgɛ' à konì wèr à mnjì wɛɛwɛ, bèe a ce kɛ̀' wèr msì'si, wèr a ce wɛp. 6Geewa'a, Nyʉ̀ à m fa wèr ŋger àmbò e ke fa nè bèe ce a sɛ̀. E m fa wèr ŋger ca à nfè' ce Taitòs à m vʉ̀. 7Yi yu enɛ wèr à m ku tʉr ŋger ba njobè' Taitòs à m vʉ̀ ka, wèr m tʉr yi foŋ njobè' Taitòs à m suŋ wèr enɛ wèe à m fa ye ŋger. E m suŋ wèr enɛ wèe ce kòŋ à ryɛ mɛ̀ sê, a ker suŋ mɛ̀ enɛ wèe ce koosimnse à yuu ce wèe à m gèe. E m suŋ wèr àmbò wèe tʉr ntee à rgèe buu ce mɛ̀ làa. Mɛ̀ ka' yu' buu ce e suŋ anà, a lu'shi nè wèe gòr sê.

8Wèe à m ka' ba koosimnse njo' ŋwà' ce mɛ̀ m saŋ nà, yi bep mɛ̀ ka'. Nyor à m bep mɛ̀ à nfè' entòmbì ce mɛ̀ m yɛ enɛ ŋwà' anà yi m gèe wèe à koosimnse à mʉ nfè' mò'. 9Geewa'a, m ce lu'shi sè'ni, a ke' ce lu'shi njobè' mɛ̀ m gèe wèe à koosìmnse ka', m ce lu'shi njobè' wèe à m koosimnse wa'a, a kupse, a ma' yè buu bbebep. Ŋkoosimnse ce wèe à m tʉr, yu njɛ̀ɛ ŋkoosimnse ce Nyʉ̀ kòŋ. Wèr à m bepsi wèe bepsi ka' koo mʉcàr. 10Ŋwɛ̀ à ka' koosimnse à njɛ̀ɛ njì ce Nyʉ̀ kòŋ, banɛ ŋkoosimnse ca be gèe tɛ ŋgàŋ kupse, ma' yì buu bbebep, lùŋ. Àde' ŋwɛ̀ seŋ buu enɛ e gèe yuu bebep à njɛ̀ɛ njì ce e ce koosimnse wa' ka'. Ŋkoosimnse yì bèe enjep ŋgòŋ na e ke vʉ̀ ba nè rkwe. 11Yɛ nè yuu ce njɛ̀ɛ ŋkoosimnse ce Nyʉ̀ kòŋ na à gèe nè wèe. E gèe wèe à lor buu tatap sê, a ka yè njo. E gèe nyor à bep wèe, wèe a ce bɛ̀ɛŋger, a ce kòŋ enɛ sèe ba cǔu mo'sir, ntee yi ce lùu wèe à rgèe buu bbòŋboŋ. E gèe wèe à tamì nyor à rsa' ŋwɛ̀ ce e gèe yuu bebep. Wèe à dùŋshi enɛ wèe tʉr bo njep yuu bebep anà ka' koo mʉcàr. 12Mɛ̀ m ce saŋ ŋwà' ca nè wèe wa'a, a ke' ce saŋ ba enɛ m ce sa' ŋwɛ̀ ce e gèe yuu bebep, kɛ̀ bèenjì ŋwɛ̀ ce a m gèe yuu bebep nè ye ka'. Mɛ̀ m saŋ tɛ wèe bo yɛ rara à bsii Nyʉ̀ enɛ wèe à fa wêe mnyor nè wèr nè mini-ŋwɛ̀.

13Yi ka' ba wa'a, wèe à gee ntee yi fʉtè wèr. Kyese àgee ntee ce yi m fʉte wèr na, wèr à m yu' rbòŋ se à ryɛ njɛ̀ɛ njì ce Taitòs à m ce lu'shi, njobè' wèe à m gèe yi ntee yi ke' ce bu' ka'. 14Mɛ̀ m nàa tu nè Taitòs njo' wèe, wèe a ke' coosi mɛ̀ ka'. Àmbò yuu wɛɛwɛ ce wèr à m suŋ wèe yi m ba mini nà, buu ce wèr ce nàa tu àgho nè Taitòs njo' wèe nà, à yɛɛtì mini foŋ. 15Taitòs ce kuushi àmbò wèe wɛɛwɛ à m tami nyor à ryu'nì, ker ba njɛ̀ɛ njì ce wèe à m koni ye nè rwɛp-ŋwɛ̀, cena yi gee e ker koŋ wèe a caa àmbò e m kòŋ. 16M ce lu'shi njobè' àde' m lɛ ntee njep wèe nè mini-ŋwɛ̀.

Currently Selected:

Ñwaè' Beâe Koreèn Ce Embenjïì 7: LNT

Highlight

Copy

Compare