Ñwaè' Beâe Koreèn Ce Embenjïì 6
6
1Àmbò wèr ce fà' àbee wèr Nyʉ̀ wèe na, wèr ce bu' mmbo nè wèe enɛ wèe fa mà'shi tɛ rbòŋ Nyʉ̀ ce wèe à koni na li bʉ à cicì ka'. 2Nyʉ̀ à làa mbe yě Ŋwà' enɛ̂,
“Nfè' ce mɛ̀ m ba à rgèe yuu bòŋboŋ nè wɛ̀ à m ghɛɛ,
mɛ̀ fa wa btù' nè wɛ̀.
Nòŋ ce mɛ̀ m ba à rjà' wɛ̀ tɛ à bo lùŋ, yi m ghɛɛ,
mɛ̀ ja' wɛ̀.”
Rìŋ nè enɛ nfè' ce àde' Nyʉ̀ gee yuu bòŋboŋ nè sèe, yu ba sè'ni na. Nfè' ce àde' Nyʉ̀ gee bèe a lûŋ, yu sè'ni na.
3Wèr ce jepsi ŋwɛ̀ mò' ka', fà dì' ŋwɛ̀ mò' bo làa yuu mo' bebep àmbò ler rfà' ka'. 4À ka' ba koni kɛ koni wèr, wèr ce dùŋshi enɛ wèr yu ŋgǎa mfà' nè Nyʉ̀. Wèr ce dùŋshi wa'a à njɛ̀ɛ njì ce wèr à kur ntee sê, a tɛɛ tatap à nfè' ce wèr ce yɛ ŋgɛ', ba à nfè' ce fùp à koo wèr, ker ba à nfè' ce buu à ka' tap nè wèr. 5Bèe a lìp wèr, a fa wèr à shaŋ. E ba à nfè' mò' bèe a gaŋ wèr. E ba à nfè' mò' wèr fa' jorni, e ba à nfè' mò' wèr tʉr nfè' à rbuumì ka', e ba à nfè' mò' wèr tʉr yuu ye ka'. 6Wèr à dùŋshi enɛ wèr yu ŋgǎa mfà' nè Nyʉ̀ à yer ŋgěe rara, ba à buu Nyʉ̀ ce wèr à rìŋ, ba à njɛ̀ɛ njì ce wèr ce kur ntee, ker ba foŋ à njɛ̀ɛ njì ce wèr ce gèe ŋgěe bòŋboŋ nè bèe. Wèr à ruusi ba nè Yʉ' Rara, a koŋ bèe nè mini-ŋwɛ̀. 7Wèr ce suŋ nsuŋ mini à nfè' wɛɛwɛ, a ce gèe buu ba à ŋger Nyʉ̀. Yer ŋgěe yɛɛnì yi yu àmbò buu bìr ce wèr bo mà' bìr àgho nè Nyʉ̀, kèr tɛ'shi yèr nyor àgho. 8E ba à nfè' mò' bèe a naa wèr, e ba à nfè' mò' a coosì wèr. E ba à nfè' mò' bèe a laa buu bbebep àmbò wèr, e ba à nfè' mò' a laa buu bbòŋboŋ. Bèe a lò lor wèr àmbò ŋgǎa mnde' wa'a, wèr ku ce làa yer yu ba yuu mini. 9E ba à nfè' mò' bèe a lor wèr à buu bcicì, geewa'a, bèe a rìŋ wèr à bdì' wɛɛwɛ. E ba à nfè' mò' a yɛ wèr àmbò bgʉ̌ʉ bèe wa'a, geewa'a wèr ku ba btèe. Bèe a fa wèr ŋgɛ', a ke' yʉ ne wèr ka'. 10Wèr yu àmbò bèe ce a ce koosimnse wa'a, geewa'a wèr ce lu'shi à nfè' wɛɛwɛ. Wèr yu àmbò ŋgǎa fùp wa'a, geewa'a wèr ce gèe bèe magòr a ce koni bkù'. Wèr yu àmbò bèe ce a tʉr buu ka' wa'a, geewa'a wèr a tʉr buu wɛɛwɛ.
11Běe à rla' Korèn, wèr à sʉ̀ti yuu mo' ese wèe ka'. Wèr à mʉ̀' yer ntee a lɛ too nè wèe. 12Wèr à cete yer ntee ese wèe ka', yu ba wèe ce wèe à cete ye ntee ese wèr. 13Kʉʉsi nè rbòŋ ce wèr à m ce gèe nè wèe nà, mʉ' wee mntee lɛ btoo foŋ. M ce làa nè wèe àmbò boo wa.
14Wèe fa ba àbee wèe bèe ce a yu ŋgǎa rbyemì ka' ka'. Àde' yuu yɛɛnì ba yuu bebep a koo ŋkar à njɛ̀ɛ kɛ? Yuu ce rraa li tʉr à rgèe a tʉ̀'nji yu kɛ? 15Àde' Krǎis ba Bɛ̀layàl a ba cǔu mo'sir à njɛ̌ɛ kɛ? Àde' ŋwɛ̀ rbyemì tɛɛ kùu a ŋwɛ̀ ce e byemi ka' à njɛ̀ɛ kɛ? 16Àde' Ndap Nyʉ̀ ba yì mnyʉ̀ enjep ŋgòŋ na a ba à yuu mo'sir à njɛ̌ɛ kɛ? Sèe yu ndap nè Nyʉ̀ ce e yu ntèe. Yi ku ba àmbò Nyʉ̀ à làa. E làa enɛ̂,
“M be cu a wǎp mʉ, jɛ̀r a wǎp mʉ,
ba yàp Nyʉ̀ tɛ wowèe a ba yà bèe.
17Banɛ wèe fʉʉ efa wǎp mʉ, tɛɛ jɛɛ.
Wèe fa jòo yuu ce yi yu rara ka' ka',
tɛ m bo koni wèe.
18M be ba tàr nè wèe tɛ wèe ba boo wa, boo mmbaŋrù ba boo bbyèŋge.
Cena à làa Tata ce e tʉr buu wɛɛwɛ.”
Currently Selected:
Ñwaè' Beâe Koreèn Ce Embenjïì 6: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
