Ñwaè' Beâe Koreèn Ce Embenjïì 3

1Wà' wèr ce làa buu ca wa'a tɛ wèe bo rìŋ enɛ wèr yu ba běe mini a? Yi yu wa' ka'. Wà' yi yu enɛ wer à ba fa ba ŋwà' nè wèe tɛ wee wèe saŋ ŋwà' nè wèr tɛ bèe a riŋ àmbò wèr ce fà' a wěe mʉ, àmbò bèe mo' a ke gèe nà a? Yi yu wa' ka'. 2Wèe yu njep wěr mntee àmbò ŋwà' ce a saŋ, ŋwɛ̀ wɛɛwɛ à ce bè', a riŋ yuu ce a saŋ mbo wa'a, 3a ce yɛ bòŋboŋ enɛ wèe yu ŋwà' ce à saŋ ba Jisos Krâis, a ka' tuu wèr àgho. Ŋwà' ca yu ŋwà' ce a saŋ ba nè mdip ŋwà' ka'. A saŋ ba nè Yʉ' Nyʉ̌ ntèe. A saŋ ba mbe lǔr mbɛ̀mbɛr ka', a saŋ ba njep mntee bèe.

4Wèr ce làa buu ca àmbò bèe ce a Jisos Krǎis wèe a yu àbee, a riŋ wernɛ ku ba Nyʉ̀ ce e be jà' wèr tɛ wèr ka' gèe buu ca. 5Wèr tʉr ŋger à rgèe yuu mo' nè yer tu ka'. Yer ŋger yi lò ba ese Nyʉ̀. 6E gèe sèe à ghɛɛtè à ŋgǎa mfà' ce a ce fè'shi àmbò lě' fi. Lě' fi ca yi ce làa enɛ sèe yu' sè'ni ba ese Yʉ' Nyʉ̀, ke' yu' ba ese mncir ce a saŋ mbe ŋwà' ka'. Ncir yi vʉ̀ nè rkwe, Yʉ' Nyʉ̀ yi ce fa rlùŋ.

7Wèe rìŋ nfè' ce Nyʉ̀ à m lɛ̀ mncir a duŋshi yi fòo. E m saŋ mncir mbe lǔr mbɛ̀mbɛr a fa nè Musìs. E ka' ce vʉ̀ nè mncir ca, rraa Nyʉ̀ li raa a yě bsii sê, ce àde' bèe Isrɛ̀l a m ba fyɛ' nè mmir ka'. Ka' rraa anà li m lò a ker ce raa àmbò li m ce raa nà ka' wa'a. Àmbò yi yu sè'ni enɛ rsa' rrʉ̀ʉ ce li m ce vʉ̀ ba nè rkwe li m ce dùŋshi fòo Nyʉ̀ na, 8banɛ rsa' rfi ce li vʉ̀ yi ba nè Yʉ' Rara, li càa lǐ rrʉ̀ʉ à njɛ̀ɛ njì ce e ce dùŋshi fòo Nyʉ̀. 9Ka' ba enɛ rsa' rrʉ̀ʉ ce li m ce gèe bèe a gwe mnsa' Nyʉ̀ nà li m ce dùŋshi fòo Nyʉ̀, banɛ rsa' rfi ce li ce gèe bèe a ba byɛɛnì à bsii Nyʉ̀ li càa lǐ rrʉ̀ʉ à njɛ̀ɛ njì ce e ce dùŋshi fòo Nyʉ̀. 10Àde' sèe laa sè'ni enɛ rraa ce li m ba njep rsa' rrʉ̀ʉ na li ker ce yɛɛti à yuu ka' njobè' sèe ce jɛ̀r sè'ni ba njep rsa' rfi ce li ce raa a caa ŋger. 11Yi yu enɛ àmbò rsa' rrʉ̀ʉ anà li m cu njìsàp ka', a ku ce dùŋshi fòo Nyʉ̀ nà, banɛ rsa' rfi ce li be cu yi nfesè na, li be dùŋshi fòo Nyʉ̀ càa lǐ rrʉ̀ʉ anà.

12À ka' ba njobè' wèr rìŋ buu ca, wèr ce suŋ bèe buu Nyʉ̀ rara sê, a ke' ce sʉ̀ti yuu mo' ka'. 13Wèr yu àmbò Musìs ka'. Musìs à m ce lò cete vi bsii nè cɛ̀' fà dì' bèe Isrɛ̀l a bo yɛ àmbò rraa efa yě bsii anà li ce liiti ka'. 14Yap ntee yi yinì. Kɛ' ese à nfè' anà vʉ ba' sè'ni na, yuu mo' yi ce cete wap bfee. E ke ba à nfè' ce a ce bè' ŋwà' mncir embe ŋwǎ' rʉ̀ʉ nè wowèe, wowèe a ke' ce yu' yuu ce a ce bè' ka'. Bfee ŋwɛ̀ vi ke mʉ̀'ti ba à nfè' ce ŋwɛ̀ anà ba Krǎis a yu àbee. 15Yi yu mini wa'a enɛ kɛ' ese à nfè' anà vʉ ba' sè'ni na, wowèe a ke bè' mncir Musìs, yuu mo' yi ce cete wap bfee, wowèe a ke' riŋ yuu ce a ce bè' ka'. 16Geewa'a, ŋwɛ̀ à ka' beesi yi ntee byemi nè Tata Jisòs banɛ Nyʉ̀ be cà'si yuu ce yi cete ye bfee anà. 17Tata ce sèe ce làa na yu Yʉ'. Fà dì' wɛɛwɛ ce Yʉ' Tata yi ka' ba, banɛ bèe anà a lùŋ. 18À ka' ba njobè' yuu mo' yi ker ce cete sèe mmir ka', banɛ rraa Nyʉ̀ ca li ce raa sèe à nyòr, sèe à ce raa, a kɛ' a ce kupse, kù ce kupse caar, lò ba foŋ àmbò Tata Jisòs, ba ŋgǎa fòo àmbò Krǎis yu nà. Cena yu ba rfà' Tata ce e yu Yʉ'.

Currently Selected:

Ñwaè' Beâe Koreèn Ce Embenjïì 3: LNT

Highlight

Copy

Compare