Ñwaè' Beâe Koreèn Ce Embenjïì 4

1Nyʉ̀ à m tʉr ntee bòŋboŋ nè wèr, a fa wèr rfà' enɛ wèr gee buu ca nè bèe. Yi ka' ba wa'a, wèr à ce gèe li, a ke' ce koosi bsɛ̀ ka'. 2Wèr à mà' buu bbebep ce bèe a ke gèe à bsʉ̀ti njo' rìtu. Wèr ce bo' bèe ka', a ce kupse blǎa Nyʉ̀ ka'. Wèr ce fè'shi buu mini àwaŋ, à bsii Nyʉ̀. Wèr ce gèe wa'a, ŋwɛ̀ wɛɛwɛ à ce kwà'shi bòŋboŋ àmbò wèr. 3Nsuŋ Mbòŋmboŋ ca ka' ba nè bèe mo' àmbò yuu ce a cete, banɛ e yu wa'a ba nè bèe ce a ce bʉ. 4Wowèe a byemi Nsuŋ Mbòŋmboŋ ca ka' njobè' Satàn ce e yu nyʉ̀ enjep ŋgòŋ na à gèe wowèe a fêp. Àde' wowèe a yɛ rraa ce li ce raa mbe wǎp ndù ka'. Rraa ca yu rraa ce li vʉ̀ njo' Nsuŋ Mbòŋmboŋ àmbò fòo ce Krǎis tʉr ce e ku ba àmbò Nyʉ̀ ye ye yu nà. 5Wèr ce fè'shi ba àmbò wêr mnyor ka'. Wèr ce fè'shi nè bèe enɛ Jisos Krǎis yu Tatâ. Wèr yu ŋgǎa mfà' nè wèe ba njo' Jisòs. 6Nyʉ̀ ce e m làa enɛ̂, “Mà'shi tɛ rraa li raa à tʉ̀'nji,” yu ye ce e gèe li rraa li ce raa njep sěe mntee, tɛ sèe bo koni rraa, yɛ fòo Nyʉ̀ àmbò yi ce raa à bsii Krâis.

7Sèe ce sèe tʉr yuu bòŋboŋ ca, sèe yu àmbò mkìŋ nshe. Sèe yu wa'a tɛ yi bo dùŋshi enɛ njɛ̀ɛ ŋger ce yi càa ŋger na, yu yisèe ŋger ka'. Ŋger anà yu ba ŋger Nyʉ̀. 8Ŋgɛ' ce koni wèr à mnjì wɛɛwɛ, wèr à ke' bornì rfà' ca ka'. E ba à nfè' mò' bfee vi jep wèr, ntee yi ke' kwe wèr efa rfà' ca ka'. 9Bèe a ce fa wèr ŋgɛ', wèr à ke' ba mer mŋgi' ka'. Bèe a ce lìp wèr, wèr à ce gwèŋger à nshè, a ke' ce kweŋger ka'. 10Wèr à byɛ̀' rkwe Jisòs nje wěr mnyòr à nfè' wɛɛwɛ, tɛ li ryòŋ li bo yɛɛti nje wěr mnyòr foŋ. 11Àmbò wèr ce cu njep ŋgòŋ na, rkwe li ce rʉ̀ʉ wer à nfyènyʉ à nfè' wɛɛwɛ njo' Krâis, tɛ li ryòŋ li bo yɛɛti nje wěr mnyòr ce vi be lò kweŋger nà. 12Banɛ wèr à byemi yer ba rkwe, tɛ wèe bo koni ryòŋ.

13Wèr à lɛ̀ ntee njep Nyʉ̀ àmbò ŋwɛ̀ ce e m làa mbe Ŋwǎ' Nyʉ̀ enɛ̂, “Mɛ̀ m byemi a ka' lâa.” Banɛ wer wèr foŋ à byemi a ka' lâa. 14Wèr rìŋ wernɛ Nyʉ̀ ce e m fʉr Tata Jisòs efa rkwe be fʉr wèr ce wèr yu bèe Jisòs efa rkwe, lòr wèr, kèr lòr wèe foŋ dù àgho, tɛr à bsii Krâis. 15Wèr ce yɛ ŋgɛ' ca tɛ wèe bo koni sɛ' efa gho, tɛ bèe magòr a koni rbòŋ Nyʉ̀, ce kù'si ye gòr. Yi ka' ba wa'a, bèe magòr a nɛsì ye. 16A mbùu ntee yi ce kwe wèr ka'. Ka' wer mnyor vi kɛ̀' a ce sɛ̀ wa'a, ryǒŋ rfi ce li yu njep wèr nà, li ce top à mnòŋ wɛɛwɛ. 17Ŋgɛ' ce wèr ce yɛ, ce e be cu njìsàp ka' nà, yu àmbò yuu ce yi fɛp wa'a, a ce gèe tɛ sèe bo ghɛɛte à rkoni fòo ce yi be cu nfesè. Fòo anà yi càa ŋgɛ' anà gòr sê. 18Yi ka' ba wa'a, wèr à ke' ce lɛ̀ mer mmir ba mbendù buu ce bèe a ce yɛ nè mmir ka'. Wèr à lɛ̀ mer mmir ba mbendù buu ce àde' ŋwɛ̀ yɛ ka', njobè' buu ce àde' ŋwɛ̀ yɛ, vi be cu nfesè ka'. Vì ce vi be cu nfesè yu vì ce àde' ŋwɛ̀ yɛ ka' nà.

Currently Selected:

Ñwaè' Beâe Koreèn Ce Embenjïì 4: LNT

Highlight

Copy

Compare