Ñwaè' Beâe Koreèn Ce Embenjïì 12

1M be kù ce yu' nyor, ka' sɛ' mò' yu njo ka' wa'a. M be ce yu' nyor sè'ni ce suŋ bèe ba buu ce Tata Jisos Krǎis à m suŋ mɛ̀ à njɛ̀ɛ mlo mo' ker ba vì ce e mʉ̀' ma mmir mɛ̀ yɛ̂. 2Mɛ̀ rìŋ ŋwɛ̀ Jisos Krǎis mò' ce a m lòr ye a du àgho mbe làlà rbuu. Kɛ̀ ŋwɛ̀ anà à m dù ba nè yì nyor ɛ̀, kɛ̀ e m dù ba nè yì nyor ka' ɛ̀, m rìŋ ka'. Ŋwɛ̀ ce e rìŋ ku ba Nyʉ̀ cà'cà'. Yu sè'ni bfè' ncòp-kyèe-à-rrʉ̀ʉ àmbò ca yi m koni. 3M rìŋ mɛnɛ a m lòr mbaŋrùŋwɛ̀ anà a du àgho à ŋgǒŋ Paràdâis. Kɛ̀ e m dù nè yì nyor ɛ̀, kɛ e m dù àgho ka' ɛ̀, m rìŋ ka'. Ŋwɛ̀ ce e rìŋ ku ba Nyʉ̀ cà'cà'. 4E ka' bà' mbo a yu' buu ce àde' e suŋ ka'. Nyʉ̀ à mà'shi enɛ ŋwɛ̀ suŋ buu anà nè bèe ka'. 5M be yu' nyor nè njɛ̀ɛ ŋwɛ̀ ca, ke' ba ba nè yà nyor ka'. Yuu ce àde' m yu' nyor àgho nè yà nyor ku ba wa bgò'sì cà'cà'. 6M ka' ba ce kwà'shi à ryu' nyor, m ba lʉr ka', njobè' m be kù ce làa ba yuu ce yi yu mini. Ka' yi yu wa'a, m be yu' nyor ka' fà dì' ŋwɛ̀ mò' bo kwà'shi àmbò mɛ̀ càa buu ce m ce gèe, ker ba vì ce m ce làa na ka'. 7Nyʉ̀ à m ce kòŋ enɛ m naatu nè ku' buu bbɛ̀ɛ ce e m mʉ̀' ma mmir mɛ̀ yɛ nà ka'. E m fa mɛ̀ yuu mo' nje nyòr, yi ba àmbò msini wa'a, à ba yuu ce à m tuusi Satàn. Yuu anà yi m ce yaŋ mɛ̀ tɛ m bo ce nàa tu ka'. 8Mɛ̀ m loo nè Tata nfè' taar mɛnɛ e fʉr mɛ̀ yuu anà enje nyòr. 9Mɛ̀ ka' loo wa'a, Tata à beesì enɛ̂, “Ya ŋger ce mɛ̀ fa nè wɛ̀ yi ghɛɛte yi ba à rjà' wɛ̀ tɛ à cu nè yuu anà nje nyòr. Ya ŋger yi ce yɛɛti bòŋboŋ ba njep ŋwɛ̀ ce e gò'si.” Banɛ m be yu' nyor nè wa bgò'sì nè rlu'shì-ŋwɛ̀ tɛ ŋger Jisos Krǎis yi bo ba mbe mɛ̌ ndù. 10A mbùu ce mɛ̀ byemi buu ca. Kɛ̀ bgò'sì ɛ̀, kɛ̀ mcɛp ɛ̀, kɛ̀ bjep ce vi vʉ̀ nè mɛ̀ ɛ̀, kɛ̀ yu buu ce vi tap nè mɛ̀ ɛ̀, kɛ̀ yu ŋgɛ' ɛ̀, mɛ̀ byemi buu ca wɛɛwɛ njo' Jisos Krâis, a ce bu' ka'. Mɛ̀ byemi wa'a njobè' e ke ba à nfè' ce m gò'si, m ka' tʉr ŋger.

11M ce làa nè wèe àmbò lʉr wa'a, à gee ba wèe mɛ̀ ka' ce làa wa'a. Yi yu enɛ wèe à ba ce yu' nyor nè mɛ̀ njobè' a ka' ba ce fè'ni mɛ̀ wèr bèe ce a lòr wap btu àmbò ŋgǎa ntuu Jisos Krǎis ce a yu yap jɛɛ nà, m ba ba mbe wǎp njì ka', ka' m yu yuu cicì wa'a. 12Mɛ̀ m gèe buu bghagha' ce vi ke dùŋshi enɛ ŋwɛ̀ yu ŋwɛ̀ ntuu Jisòs nà a wěe mʉ, a ke' borni à nfè' mò' ka'. 13Yuu ce mɛ̀ m gèe nè bcor mo' a ke' gee nè wèe ka', yu kɛ? Yuu ce mɛ̀ m gèe nè wèe ka' ku ba ba enɛ mɛ̀ m ba ntɛ̀r nè wèe ka'. Mɛ̀ gèe fàa. Fòosi nè mɛ̀.

14Mɛ̀ tami nyor à rvʉ̀ cà'ni wèe. M ka' vʉ ca'ni wèe banɛ mɛ̀ cà'ni wèe sè'ni nfè' taar. M be vʉ̀ tɛ m ba ntɛ̀r nè wèe ka' njobè' yuu ce m ce ròo yu ba yè buu ka', m ce ròo ba wèe. Yi yu enɛ boo a fyɛ' à wap mma ba wap bta ka'. Yi yu ba enɛ mma ba btàr a fyɛ' à boo wap. 15Banɛ m be bepsi yà buu wɛɛwɛ njo' wèe, fa yà nyor foŋ nè wèe nè rlu'shì-ŋwɛ̀. M ka' koŋ wèe gòr àmbò m kòŋ nà, wèe koŋ ye mɛ̀ mʉcàr a? 16Wèe ce làa weenɛ̂, “Yi yu mini enɛ e ke vʉ̀ ba ntɛ̀r nè wèr ka'. Yi ku ba ba enɛ e yu kwɛ̀ɛ. Wèr rìŋ enɛ e ye sɛ' efa wèr à mʉ mnjì mo'.” 17Ca yu ba njɛ̀ɛ kɛ? Wà' bèe ce mɛ̀ m tuu mɛnɛ a vʉ yɛ wèe nà, a m vʉ̀ wa'a enɛ m bo bo' wèe koshi buu ese wèe a? 18Mɛ̀ m bu' mmbo nè Taitòs enɛ e vʉ yɛ wèe, a laa nè nfʉr mò' enɛ e du a ye. Wà' Taitòs à m bo' wèe a koshi buu ese wèe a? Wèr Taitòs ku ba ŋwɛ̀ mò'sir, a ce gèe yèr buu nè ntee e mo'sir. 19Seemò' wèe ce kwà'shi enɛ wèr ce làa enɛ wèr yu ŋgǎa ntuu Jisos Krǎis wa'a, a ce tɛ'shi ba yer tu. Yi yu wa' ka'. Wèr ce làa buu ca ba à bsii Nyʉ̀ àmbò bèe Jisos Krâis. Bkar wâ, buu ce wèr ce gèe na, wèr ce gèe vi wɛɛwɛ tɛ wèe bo tɛɛ tatap njep Jisos Krâis. 20M ce wɛp mɛnɛ m be vʉ̀ yɛ wèe, tɛ wèe ba jɛɛ efa yuu ce m ce kwà'shi, tɛ mɛ mɛ̀ ba jɛɛ efa yuu ce wèe ce kwà'shi. M ce wɛp mɛnɛ m be vʉ̀ bà' tɛ mlap ba ŋko'ndoŋ ba mshentee ba ŋgàpni ba mbepsi bèe, ba mnsa'ni, ba nàanyor ker ba bjep vi ba fa wěe mʉ. 21M ce wɛp mɛnɛ m be vʉ̀, tɛ Nyʉ̀ gee tɛ rìtu yi koo mɛ̀ fa wěe bsii, tɛ nyor bep mɛ̀, tɛ m war njo' bèe ce cu rcu rrara ka', a kupse ka' nà. M be war njobè' wowèe a ce sàki, a kʉti à bbɛp.

Currently Selected:

Ñwaè' Beâe Koreèn Ce Embenjïì 12: LNT

Highlight

Copy

Compare