Ñwaè' Beâe Koreèn Ce Embenjïì 11

1M be loo à rlàa mʉ làa blʉr. Banɛ wèe ku fa mʉ nfè' mò' yu'shi blàa anà. 2M ce ko'ndoŋ nè wèe nè njɛ̀ɛ ŋko'ndoŋ ce Nyʉ̀ tʉr. Wèe yu àmbò muunje ce e be riŋ mbaŋrùŋwɛ̀ ka', mɛ̀ kanì mɛnɛ m be gùusi ye nè mbaŋrùŋwɛ̀ mò'sir cà'cà'. Mbaŋrùŋwɛ̀ ca yu Jisos Krâis. 3Àmbò yi yu wa' na, m ce wɛp mɛnɛ Satàn be jepsi btu ese wèe àmbò e m lòr vi bkwɛ̀ɛ a bo' Ef àgho nà, tɛ wèe ker lɛ̀ ntee njep Jisos Krâis, fa wee mnyor nè ye ka'. 4M ce làa wa'a njobè' mɛ̀ yɛ mɛnɛ ŋwɛ̀ mò' à ka' vʉ fe'shi àmbò Jisòs mò' caa efa yì ce wèr à m fè'shi nà, wèe ku byemi. Ŋwɛ̀ mò' ka' laa àmbò yʉ' mo' ce yu yʉ' jɛɛ, wèe ku byemi. Ŋwɛ̀ mò' ka' fe'shi Nsuŋ Mbòŋmboŋ mò' ce e yu jɛɛ efa yì ce wèr à m fè'shi àmbò Jisos Krǎis nà, wèe ku byemi, koo buu ca wɛɛwɛ mmbo mmbaa. 5Wèe ce lòr bèe ce a lòr wap btu enɛ a yu ŋgǎa ntuu Jisòs nà à bèe ce a yuu jɛɛ. Wèe à ka' fe'ni mɛ̀ wèr wowèe m kwa'shì mɛnɛ àde' m ba mbà njì ka'. 6M ka' tɛ rìŋ à rlàa yuu ka', m mɛŋnì yuu Nyʉ̀ ka'. Wèr à gèe ca yi ba rara nè wèe à mnduunjì jɛɛ jɛ̀ɛ jɛɛ.

7À m ba à nfè' ce mɛ̀ m ce fè'shi blǎa Nyʉ̀ nè wèe, mɛ̀ m bipshi blà' efa gho ka'. Mɛ̀ m sùusi yà nyor njep nshè tɛ m bo nàa wèe mbekì. Wà' mɛ̀ m gèe wa'a, à ba ba yuu bebep a? 8Mɛ̀ m ce fà' nè wèe, bcor mo' efà jɛɛ vi ce là' mɛ̀. Banɛ mɛ̀ m ce yɛ̀ɛ ese bcor anà tɛ m bo jà' wèe. 9Yi yu foŋ enɛ à m ba à nfè' sèe à m ce cu nà, mɛ̀ m ka' ba buu yuu, m ke' ba ntɛ̀r nè ŋwɛ̀ mò' ka'. Bèe ce a m vʉ̀ embe cor à ŋgǒŋ Mɛ̀sɛ̀donìyà a m fa mɛ̀ buu ce mɛ̀ m tʉr ka'. Mɛ̀ m làa mɛnɛ wèe la' mɛ̀ ka', m be kè làa mɛnɛ wèe la' mɛ̀ ka', fà dì' m bo ba ntɛ̀r nè wèe ka'. 10M ce làa mini àmbò ŋwɛ̀ Jisos Krǎis enɛ àde' ŋwɛ̀ mò' ce à ŋgǒŋ Àkayà jepsì mɛ̀ fà dì' m yu' nyor à yuu ce mɛ̀ gèe na ka'. 11Wà' m ce gèe wa'a njobè' m kòŋ wèe ka' a? Nyʉ̀ rìŋ enɛ m kòŋ wèe. 12M be kù ce gèe yuu ce m ce gèe sè'ni na, fà dì' bèe ce a ce kòŋ à ryu' nyor enɛ lap rfà' li ku ba àmbò ler nà a bo tʉr njì mò' à ryu' ka'. 13Wowèe a yu ŋgǎa ntuu Jisòs ce mini ka'. Wowèe a yu ŋgǎa ŋkùprì ce a ce yɛɛti foŋ àmbò ŋgǎa ntuu Jisos Krâis. 14Ca yu yuu bɛ̀ɛ ka', njobè' Satàn ye ye e ke lò yɛɛti àmbò ncìndap Nyʉ̀ ce e yu ŋwɛ̀ rraa. 15Yi ŋgǎa mfà' a ka' yɛɛti foŋ ba àmbò bèe ce a ke fà' à ryɛ enɛ bèe a gèe ŋgěe yɛɛnì nà, ker ba yuu bɛ̀ɛ ka'. Yàp ŋgɛ' be lò kù ba àmbò map mfà' mi m ba.

16M ker ce làa enɛ ŋwɛ̀ mò' fa kwà'shi enɛ m yu lʉr ka'. Wèe ka' ce kwà'shi enɛ m yu lʉr, wèe ku ma'shi tɛ m laa nlǎa nyu' nyor àmbò àde' lʉr lâa. 17Yuu ce m ce làa na, à làa Tata enɛ m laa ka'. M ka' ce yu' nyor, m ce làa ba àmbò lʉr. 18Àmbò bèe magòr a ce yu' nyor nè buu enjep ŋgòŋ na, banɛ mɛ mɛ̀ be yu' nyor foŋ. 19Wèe à làa enɛ wèe yu ŋgǎa bfee sê, a ku ce byemi yuu ce blʉr a ce gèe nà nè rlu'shì-ŋwɛ̀. 20Wèe à mà'shi enɛ bèe a gee wèe à wap bkwàa, sop sɛ' efa wèe, nyʉ̀' wèe, ko' wèe nè mkùu mbe tù, lip wèe nè mmbo nje mmìr. 21Rìtu yi ce koo mɛ̀ enɛ wèr à m ba yer bgò'sì, a gee buu ca nè wèe ka'. Koosi nè mnse nè wèr à buu ce wèr à m gèe ka'.

Ŋwɛ̀ à ka' tʉr yuu ce àde' e lip ŋgùŋ àgho, banɛ mɛ mɛ̀ tʉr yuu anà foŋ. M be lìp ŋgùŋ àgho. M ku bii ce làa àmbò lʉr. 22Wowèe a ka' ba bèe Hibrùs, banɛ m yu mò' foŋ. Wowèe a ka' ba' bèe Isrɛ̀l, banɛ m yu mò' foŋ. Wowèe a ka' ba bèe embe ndʉ̀' Abràhâm, banɛ m yu mò' foŋ. 23Wowèe a ka' ba ŋgǎa mfà' nè Jisos Krâis, banɛ mɛ̀ gha' wowèe. (M ce làa sè'ni àmbò ŋgàabaa wa'a.) Mɛ̀ fà' a caa wowèe, a du shaŋ a caa wowèe, bèe a lìp mɛ̀ a caa wowèe, rkwe li rʉ̀ʉ mɛ̀ a nfyènyʉ nfè' àŋgoo. 24Jus a m lìp mɛ̀ nè ŋgwàa ce wowèe a ke lìp bèe àgho ŋkàrà' ncòp-bʉ̀'ʉ-à-mntaar nà, nfè' tâ. 25Bèe enje jɛɛ a m lìp mɛ̀ nè mmbàŋ nfè' taar, bèe a tʉʉshì mɛ̀ nè blùr nfè' mò'sir. Wèr à ka' ce jɛ̀r njep mdip mŋgòrŋgòr mbe bkeŋ bgòrgòr, bkeŋ anà vi bep nè wèr, a coo njep rò nfè' taar. Mɛ̀ m cu njep rdip rgòr kɛ̌' àŋgàptʉ' du ba' àŋgàptʉ' mò'. 26Mɛ̀ m jɛ̀r sê. Mdip mi sɛni lòr mɛ̀, byɛ̀ɛ a fa mɛ̀ ŋgɛ', yà bèe efa mɛ̌ to' a fa mɛ̀ ŋgɛ', bèe enje jɛɛ a fa mɛ̀ ŋgɛ'. Mɛ̀ m yɛ ŋgɛ' à mʉ̀ la', a yɛ ŋgɛ' à rìŋ, a yɛ ŋgɛ' njep rdip rgòr, a ker yɛ ŋgɛ' mbe mmbo bèe ce a bo' bèe enɛ a yu ŋgǎa rbyemì nà. 27Mɛ̀ fà' a tee rlì', a sɛ̂, mmirlo mi gaa mɛ̀ mnòŋ àŋgoo. Njè à yaŋ mɛ̀, ntee yi yuushì, mɛ̀ konì yuu ye ka' nfè' àŋgoo. Mbɛp à m fʉte mɛ̀, mɛ̀ tʉr yuu yar foŋ ka'. 28Kyese àgee buu ca wɛɛwɛ, ya ntɛ̀r yu mkwà'shì ce m ce kwà'shi àmbò bcor wɛɛwɛ à mnòŋ wɛɛwɛ. 29Ŋwɛ̀ à ka' ba gò'sì à buu Nyʉ̀, mɛ̌ kwà'shi àmbò ye, ba àmbò ŋwɛ̀ ce e gò'sì wa'a foŋ. Ŋwɛ̀ à ka' gee yuu bebep, mlù mi koo mɛ̀ sê.

30Ka' ba enɛ m yu' nyor banɛ m be yu' nyor ba à buu ce vi dùŋshi wa bgò'sì. 31Nyʉ̀ ce e yu Tàr nè Tata Jisos Krâis, à ba ye ce bèe a be ce yòŋshi à nfè' sìp, rìŋ enɛ m ce nya' mnde' ka'. 32À m ba à rla' Dàmaskòs ŋwɛ̌ ŋgòr ce e m ce fà' njeptii Àrɛtà à laa bsoogɛ̀ a sir rla' Dàmaskòs tɛ a bo koo mɛ̀. 33Yi ka' ba wa'a, bèe mo' a fa mɛ̀ njep ŋkàa, a torsi njǐ à wendù a suusi njepmbè, mɛ̀ caŋ a dû.

Currently Selected:

Ñwaè' Beâe Koreèn Ce Embenjïì 11: LNT

Highlight

Copy

Compare