Ñwaè' Timotïì Ce Entombïì 4

1Yʉ' Rara yi ce làa rara enɛ be kè ba à nfè' mò' tɛ bèe mo' a ma' yuu ce a m byemi, ce yu'ni ba nè byʉ' ce vi ke bo' bèe, kèr ce yu' ba buu ce mnyʉ̌mkà' vi ce yɛ'ni. 2Yi be kè ba wa'a njobè' ŋgǎa nya' mnde' ce a yu ŋgǎa mbo'ni a be kè yɛ'ni njɛ̀ɛ ryɛ'nì ca. Wowèe a be kè rìŋ jɛɛ jɛ̀ɛ jɛɛ efa yuu bòŋboŋ ba yuu bebep ka' njobè' wap mntee vi yini. 3Wowèe a be kè yɛ'ni enɛ mbaŋrùŋwɛ̀ fa lòr ŋgwa ka', kèr yɛ'ni enɛ njeŋwɛ̀ du bgùu foŋ ka'. Wowèe a be kè yɛ'ni bèe enɛ wowèe a fa ye njɛ̀ɛ byee mo' ka'. Geewa'a, Nyʉ̀ à m gèe byee tɛ bèe ce a byemi a riŋ yuu mini a bo ye ce yòŋshi ye. 4Buu wɛɛwɛ ce Nyʉ̀ à m gee vi yu yɛɛnì, mo' efa gho à ke' ba yì ce ŋwɛ̀ kani ka'. Yi yu enɛ bèe à ka' koni buu ca, a yoŋshì Nyʉ̀. 5Blǎa Nyʉ̀ ba rloo vi gèe buu ca vi ba byɛɛnì à bsii Nyʉ̀.

6Wɛ̀ ka' suŋ buu ca nè bfʉr enjep Jisos Krǎis banɛ à yu ŋwɛ̀ rfǎ' mbòŋmboŋ nè Jisòs, a ce dùŋshi enɛ à ce nyaŋ yò nyor nè blàa ce vi kùu rbyemì, ker ba ryɛ'nǐ rbòŋboŋ ce wɛ̀ ku tɛɛ njo nà. 7Fa tʉr yuu mo' à rgèe nè mghàghar cicì ka'. Mi tʉr yuu mo' à rgèe nè Nyʉ̀ ka'. Yɛ'ni yò nyor à rcu ba rcu ce Nyʉ̀ kòŋ. 8Ŋwɛ̀ à ka' yɛ'ni yì nyor à rgèe mcɛ̌r, mʉ sɛ' ku ba njo. Geewa'a, ŋwɛ̀ à ka' yɛ'ni yì nyor à rkwà'shi ba àmbò buu Nyʉ̀, sɛ' ba njo à buu wɛɛwɛ njobè' njɛ̀ɛ mkwà'shì ca mi kà'ni sèe rcu rbòŋboŋ sè'ni na, ker ba rcu rbòŋboŋ à nfè' ce e bii ka' ba. 9Nlàa ca yu nlǎa mini, rtarnì li ke' ba njo ka', à ba nlàa ce bèe a ba byemi nè yap ntee-ŋwɛ̀. 10A mbùu ce wèr ce fà', a ce faate msòŋ. Wèr ce gèe wa'a njobè' wèr à lɛ̀ mer mmir ba mbendù Nyʉ̀ ce e yu ntèe. E yu Nyʉ̀ ce e be gèe tɛ bèe wɛɛwɛ a bo lùŋ, laŋlaŋ bèe ce a byemi nè ye.

11Làa buu ca ker yɛ'ni vi. 12Fa mà'shi tɛ ŋwɛ̀ mò' lor wɛ̀ àtɛ̀r njobè' à yu ghàrŋwɛ̀ ka'. Ba rdùŋshì nè bèe ce a byemi, à wo blàa, ba a yo ŋgèe, ba à lo rkòŋnì, ba a lo rbyemì, ker ba à lo rcu rrara. 13Tɛ m ka' vʉ̀, lòr yò nfè' ce be' blǎa Nyʉ̀ nè bèe, cep wowèe, ker ce yɛ'ni wowèe. 14Fa mà' bfee rfà' ce Nyʉ̀ à fa nè wɛ̀ ka'. Nyʉ̀ à m fa wɛ̀ bfee ca njo' buu ce e m gèe à nfè' mò', bèe mo' a yu' ese ye a laa àmbò wɛ̀, btu embe cor foŋ a la' mmbo mbe wɛ̌ ndù nà. 15Lɛ̀ ntee à buu ca, ce gee vi tɛ ŋwɛ̀ wɛɛwɛ bo yɛ àmbò à ce kù' à buu Nyʉ̀. 16Kè'ni yo tu, lor nfè' à yuu ce à ce yɛ'ni. Ce gee ba buu ca à nfè' wɛɛwɛ, njobè' wɛ̀ ka' ce gèe vi, banɛ à be tee yo tu efa ŋgɛ', kèr tee btu bèe ce a ce yu' buu ce à ce làa.

Currently Selected:

Ñwaè' Timotïì Ce Entombïì 4: LNT

Highlight

Copy

Compare