Ñwaè' Timotïì Ce Entombïì 3
3
1Nlàa ce m be làa na yu nlàa mini. Nlàa anà yi yu enɛ ŋwɛ̀ à ka' koŋ à rba tu-nta', banɛ ŋgàŋ à kòŋ ba rfǎ' rbòŋboŋ. 2Tu embe cor yi tʉr à rba ŋwɛ̀ ce àde' a taa ye àtu yuu mo' ka'. E be kù tʉr ŋgwa mò'sir, tʉr ntee bobor, tʉr bfee. E fa ba ŋwɛ̌ àwàa ka'. E be ba ŋwɛ̀ ce àde' e sa' bèe yɛɛnì, riŋ à ryɛ'ni bèe yɛɛnì foŋ. 3E tʉr à rba no-ŋkoo ka', ce gèe buu ba à ŋger ka'. E be ce gèe buu nè rbonì-ŋwɛ̀. E tʉr à rba ŋwɛ̀ mntaŋshì ka'. E fa roŋ mbàa ka'. 4Ŋgàŋ tʉr à rba ŋwɛ̀ ce e ce kè' à yì ndap bòŋboŋ, ker ce yɛ'ni boo vi tɛ wowèe a ce yu'ni nè ye, ce gèe ŋgěe bòŋboŋ nè bèe wɛɛwɛ. 5Ŋwɛ̀ à ka' tɛ rìŋ à rkè'ni à yì ndap bòŋboŋ ka', àde' e gee ekɛ ka' ke'ni à cor Nyʉ̀? 6E tʉr à rba ba ŋwɛ̀ rbyemǐ nfi ka', buwa'làr e lo naatu, gwe mnsa' àmbò Satàn à m gwè nà. 7E tʉr à rba ŋwɛ̀ ce bèe ce a yu ŋgǎa cor ka' a be ce làa yɛɛnì àmbò ye foŋ fà dì' bèe a lo tàa ye, tɛ e kwe à taa Satàn ka'.
8Bdikìn foŋ a tʉr à rba bèe ce a ke lòr buu àtɛ̀r ka', kèr ba foŋ bèe ce a nya' mnde' ka'. Wowèe a tʉr à rba bèe ce a ce no mrù' gòr ka', kɛ̀ bèe ce a roŋ mbàa ka'. 9Wowèe a tʉr à ce tɛɛ njep buu ce vi kùu rbyemì ce yu buu ce vi càa bfee ŋwɛ̀ nà nè ntee rara. 10Tɛ wowèe a ka' kè fà' rfà' bdikìn, banɛ a be fyɛ' wowèe bòŋboŋ sê. A ka' fyɛ' wowèe wa'a, yɛ enɛ wowèe a ghɛɛte, wowèe a fa'. 11Bbyèŋge foŋ a tʉr à rba ba bèe ce a ce lòr buu àtɛ̀r ka', ba ŋgǎa mnsa'ni foŋ ka'. A tʉr à rba bèe ce a tʉr ntee bobor, ba foŋ bèe ce a yu mini à buu wɛɛwɛ. 12Bdikìn a tʉr à rba bèe ce a tʉr bbyèŋge àŋgoo ka', ba bèe ce a ce kè' à boo wap ba wap mndap bòŋboŋ. 13Bèe ce a ka' fa' rfà' bdikìn ca bòŋboŋ, banɛ a be nàa wowèe mbekì, wowèe a ce làa àmbò rbyemì ce e nè Jisos Krâis, laa nè ŋger-ŋwɛ̀.
14Àmbò m ce saŋ ŋwà' ca nè wɛ̀ sè'ni na, m ce kwà'shi enɛ ku bɛti nfè' mʉcàr tɛ m vʉ yɛ wɛ̀. 15Geewa'a, m ka' caasi nfè', tɛ ŋwà' ca yi bo gèe tɛ bèe a riŋ njɛ̀ɛ ŋgèe ce a ba gèe à mʉ̀ bèe Nyʉ̀. Bèe Nyʉ̀ ca yu cor Nyʉ̀ ce e yu ntèe. Cor ca yu àmbò rkì ce li ghashi buu ce vi yu mini.
16Àde' bèe a kanì enɛ buu ce vi kùu Nyʉ̀, ce e mʉ̀' misèe mmir sèe à yɛ nà vi buu efa rba bghagha' ka'.
E m vʉ̀ àmbò ŋwɛ̀, bèe a yɛ ye.
Yʉ' Nyʉ̀ yi m dùŋshi enɛ yi yu yɛɛnì.
Bcìndap Nyʉ̀ a m yɛ ye.
Bèe a m fè'shi àmbò ye à bto' wɛɛwɛ.
Ŋgòŋ ca yi m byemi nè ye.
Nyʉ̀ à m lòr ye a du àgho mbe bùu, e cu mbo nè fòo-ŋwɛ̀.
Currently Selected:
Ñwaè' Timotïì Ce Entombïì 3: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
