Ñwaè' Timotïì Ce Entombïì 2

1Yuu entombì ce m ce làa nè wɛ̀ yi yu enɛ wèe loo nè bèe wɛɛwɛ, yoŋshi Nyʉ̀, loo buu ce wèe à buu ese ye. Loo enɛ e ja' bèe mo' foŋ. 2Loo nè nè bkʉʉ ba bèe wɛɛwɛ ce a ce sa' bèe tɛ sèe bo cu nè cumʉnyaŋ-ŋwɛ̀, tɛ ŋgɛ' ba ka', cu ba rcu ce Nyʉ̀ kòŋ, ba běe byɛɛnì à bsii bèe à buu wɛɛwɛ. 3À rloo wa'a yu yuu bòŋboŋ, à ba yuu ce Nyʉ̀ ce e yu yìsèe ŋwɛ̀ rjà' e ke yu' rbòŋ àgho. 4E ke kòŋ à rjà' bèe tɛ wowèe a bo rìŋ yuu ce yi yu mini. 5Nyʉ̀ yu mò'sir, ŋwɛ̀ ce e yu mbetar Nyʉ̀ ba bèe, a ce gèe tɛ bèe a ba àbee a Nyʉ̀ àmbò sèe yu, à ba mò'sir foŋ. Ŋwɛ̀ ca yu Jisos Krǎis ce e m ba ŋwɛ̀ àmbò sèe. 6Jisos Krǎis ca à m fa yì nyor à rtee bèe wɛɛwɛ efa yàp ŋgɛ'. Yuu ce e m gèe na yi ce dùŋshi enɛ Nyʉ̀ à m ce kòŋ à rgèe tɛ bèe wɛɛwɛ a lûŋ. Cena yi ku koni ba à nfè' ce Nyʉ̀ à m lɛ̀. 7A mbùu ce Nyʉ̀ à m ce mɛ̀ enɛ m ba ŋwɛ̀ rfè'shì ker ba ŋwɛ̀ ntuu foŋ. Yuu ce m ce làa na yu yuu mini, m ce nya' ba mnde' ka'. Nyʉ̀ à m ce mɛ̀ wa'a tɛ m bo yɛ'ni bèe enje jɛɛ yuu mini, tɛ wowèe a riŋ foŋ àmbò àde' ŋwɛ̀ byemì nè Jisos Krâis.

8M ce kòŋ enɛ mmbaŋrù ce a yu à bdì' wɛɛwɛ a loo. Wowèe a ce loo, a naa mmbo mrara mbekì, ke' tʉr ntee yayaŋ nè bèe mò', kɛ̀ ba ŋgǎa mntaŋshì ka'.

9M ce kòŋ foŋ enɛ bbyèŋge a yar buu à njǐ yɛɛnì tɛ vi ba yɛɛnì, kè' ba ba buu rŋgòo ka', kè' ba' ba tu rŋgòo ka', kɛ̀ yar ba bsa' kɛ̀ btee kɛ̀ bcàŋ rŋgòo, kɛ̀ bcɛ̀' ce vi lùu ntaa ka'. 10Wowèe a susi nyor ba nè mfǎ' mmbòŋmboŋ, ce yu mfà' ce mi ghɛɛte nè bbyèŋge ce a ce làa enɛ wowèe a rìŋ Nyʉ̀. 11Ka' ba à nfè' ce a ce yɛ'ni bèe, njeŋwɛ̀ cu mʉnyaŋ, cu nè ryu'nì-ŋwɛ̀. 12Mɛ̀ byemi enɛ njeŋwɛ̀ yɛ'ni kɛ̀ tʉr ŋger mbendù mbaŋrùŋwɛ̀ ka'. Njeŋwɛ̀ tʉr à rcu mʉnyaŋ. 13Cena yi yu wa'a njobè' a m boo Adàm entombì nè Êf. 14Yi ba foŋ enɛ ŋwɛ̀ ce a m bo' à m ba Adàm ka'. Ŋwɛ̀ ce a m bo', e bʉ' ncir, à m ba njeŋwɛ̀. 15Geewa'a, njeŋwɛ̀ à ka' tɛɛ tatap njep li rbyemì ba rkòŋnì, gee ŋgěe rara, cu yɛɛnì, banɛ Nyʉ̀ be jà' ye embenjì boo ce e ce bi.

Currently Selected:

Ñwaè' Timotïì Ce Entombïì 2: LNT

Highlight

Copy

Compare