Ñwaè' Timotïì Ce Entombïì 1

1Ŋwà' ca ce saŋ mɛ̌ Pol ce m yu ŋwɛ̀ ntuu nè Jisos Krâis. M yu ŋwɛ̀ ntuu ba à ŋger Nyʉ̀ ce e gèe sèe à luŋ ker ba à ŋger Jisos Krǎis ce e gèe sèe à lɛ mmir mbendù buu ce vi be kè ba. 2M ce saŋ ŋwà' ca nè Timotì ce e yu muu wà ce mini njobè' e byemi nè Jisos Krâis. M ce loo mɛnɛ Tàr ba Jisos Krǎis ce e yu yìsèe Tata tʉr wèe à ntee bòŋboŋ, koosimnse nè wèe, ker fa wèe cumʉnyaŋ.

3Àmbò mɛ̀ m làa nè wɛ̀ à nfè' ce mɛ̀ m ce dù à ŋgǒŋ Mɛ̀sɛ̀donìyà nà, m ker ce làa nè wɛ̀ enɛ à ku cu à rla' Ɛfɛsòs, tɛ à bo làa nè bèe mo' ce a ce yɛ'ni ryɛ'nì mnde' nà enɛ wowèe a borni njɛ̀ɛ ryɛ'nì anà. 4Làa nè wowèe enɛ wowèe a fa lòr yàp nfè' ce suŋ ba mghàghar kɛ̀ ce nàshi ba bfʉr ce bà' àfo ka' ka'. Buu ca vi gèe bèe a ce sɛr ba mnsɛr a ke' ce jà' bèe à rrìŋ buu ce vi yu a kuu mfà' Nyʉ̀ ka'. Bèe a ke rìŋ buu ca ba njobè' wowèe a byemi yuu ce Nyʉ̀ à làa. 5Mbùu ce wɛ̀ ba làa buu ca nè wowèe yu enɛ wowèe a bo kòŋ bèe. Rkòŋnì ca li ba ba à nfè' ce ŋwɛ̀ à ka' tʉr ntee rara, yi ntee yi ke' ce fa ye ŋgɛ' ka' njobè' e gèe ŋgěe bòŋboŋ, a byemi nè mini-ŋwɛ̀. 6Bèe mo' a mà' buu ca a da' nduunjì a du ba àmbùu bde' bcicì. 7Wowèe a kòŋ à rba ŋgǎa ryɛ'ni mncir Nyʉ̀, a ke' riŋ buu ce wowèe a ce làa nè ntee-ŋwɛ̀ enɛ vi yu mini nà ka'.

8Sèe rìŋ enɛ mncir Nyʉ̀ vi yu bbòŋboŋ ce ŋwɛ̀ à ka' gee rfà' ce a ba gèe àgho. 9Sèe rìŋ enɛ Nyʉ̀ à fa mncir ca ba njo' běe bbòŋboŋ ka'. E fa vi njo' bèe ce a tèe btu, a ce bʉ' mncir, ker ba bèe ce a ce yu'ni nè Nyʉ̀ ka', a ba ŋgǎa ŋgèe buu bbebep. E fa vi foŋ njo' bèe ce yap ŋgèe yi yu rara ka', wowèe a ce jàasi buu Nyʉ̀. E fa vi njo' bèe ce a ce yʉshi wap bta ba wap mmâ, ker ba bèe mo' foŋ ce a yu ŋgǎa nyʉshi bèe. 10E fa vi njo' bee ce a ce sàki, ba mmbaŋrù ce a ce nòŋ a mmbaŋrù mo', ba bèe ce a ce yɛ̀ɛ bèe ce fyèni à bkwàa, ba ŋgǎa nya' mnde', ker ba ŋgǎa ntɛɛ njìnsa' mnàŋ, ker ba njɛ̀ɛ ŋgèe wɛɛwɛ ce bèe a ce gèe yi ba jɛɛ efa ryɛ'nì mini. 11Ryɛ'nì mini ca yu ryɛ'nì ce li ghɛɛte a ke' ba jɛɛ efa Nsuŋ Mbòŋmboŋ ce Nyʉ̀ à fa mba mɛ̌ mmbò ka'. Nsuŋ Mbòŋmboŋ ca ce gèe bèe a ce rìŋ fòo Nyʉ̀ ce e yu ŋwɛ̀ bghòo.

12M ce yòŋshi Jisos Krǎis ce e yu yìsèe Tatâ, à ba ye ce e fa mɛ̀ ŋger enɛ m gee rfà' ca. M ce yòŋshi ye njobè' e m yɛ enɛ m yu ŋwɛ̌ mini, a ka' ce mɛ̀ enɛ m fa' nè ye. 13Mɛ̀ m ba ŋwɛ̀ ce mɛ̀ m ce bepsi rlii Jisos Krâis, a ce fa yì bèe ŋgɛ', a ce gèe bsàrbuu nè bèe. Ka' mɛ̀ m ba njɛ̀ɛ ŋwɛ̌ wa'a, Nyʉ̀ à koosìmnse nè mɛ̀ njobè' mɛ̀ m ce gèe buu ca wa'a, a be byemi nè Jisos Krǎis ka', a riŋ enɛ a buu bbebep ka'. 14Jisos Krǎis ce e yu yìsèe Tata à m gèe yuu bòŋboŋ nè mɛ̀ sê. E m gèe mɛ̀ byemì nè ye, a ker koŋ bèe foŋ. Jisos Krǎis e ke fa rbyemì ca ba rkòŋnì nè bèe ce a wowèe a yu ŋwɛ̀ mò'sir. 15Nlàa ca yu nlàa mini, rtarnì li ke' ba njo ka', à ba nlàa ce bèe a ba byemi nè yap ntee-ŋwɛ. Nlàa anà yi yu enɛ Jisos Krǎis à m vʉ̀ njep ŋgòŋ na à rgèe tɛ ŋgǎa ŋgèe buu bbebep a lûŋ. Ŋkʉʉ efa mʉ̀ běe bbebep ca yu mɛ̀. 16Mbùu ce Nyʉ̀ à m koosimnse nè mɛ̀ à m ba tɛ Jisos Krǎis bo dùŋshi bèe enɛ e yu ŋwɛ̀ ce àde' e kur ntee sê. E m gèe wa'a tɛ bèe a bo yɛ àmbò e kur ntee nè mɛ̀ ce m yu ŋkʉʉ efa mʉ̀ ŋgǎa ŋgèe buu bbebep, tɛ m bo ba rdùŋshì nè bèe ce a be byemi nè ye, koni ryòŋ ce nfesè. 17Ha wɛ̌ Nyʉ̀! Ŋkʉʉ ce à ce cu nfesè, ce àde' à kwe ka', ce àde' ŋwɛ̀ yɛ wɛ̀ nè mmir ka', ce nyʉ̀ mò' ker ba caa efa wɛ̀ ka', tɛ bèe a yu'ni nè wɛ̀, tɛ à sa' fòo nfesè. Yi yu wa'a.

18Muu wà ce Timotì, m ce làa buu ca nè wɛ̀. Buu ce m ce làa nè wɛ̀ na yu buu ce vi ghɛɛte à buu ce Nyʉ̀ à m gèe à nfè' mò', bèe a riŋ a laa àmbò wɛ̀ nà. Wɛ̌ ce gèe buu anà, vi bo fa wɛ̀ ŋger à rmà' bìr ce mbòŋmboŋ. 19Kù tɛɛ tatap njep lo rbyemì, lɛ yo ntee rara. Bèe mo' a kani yuu ce yap ntee yi ce suŋ wowèe, a sa'si lap rbyemì. 20Bèe mo' efa mʉ̀ bèe ca yu Hìminàs ba Àlɛ̀ksandà. Mɛ̀ fa wowèe mbà mmbo Satàn tɛ wowèe a bo yɛ ŋgɛ', rìŋ buu, borni efa rbepsi rlii Nyʉ̀.

Currently Selected:

Ñwaè' Timotïì Ce Entombïì 1: LNT

Highlight

Copy

Compare