Ñwaè' Táèsaèlonikaè Ce Entombïì 2

1Bfʉr wâ, wee wèe à rìŋ enɛ rcà'nì ce wèr à m vʉ̀ ca'ni wèe nà li m ba à cicì ka'. 2Wèe rìŋ wɛɛ àmbò wèr a m yɛ ŋgɛ', bèe a jar nè wèr à rla' Filèpâi. Ka' yi m ba wa'a, wèr à m kur ntee à ŋger yèr Nyʉ̀ a suŋ wèe Nsuŋ Mbòŋmboŋ ce e lò ba ese ye, ka' bèe à m ker ku jepsi wèr se wa'a. 3Wèr à ka' vʉ̀ yɛ wèe, a ce fè'shi ànji kɛ̀ nè ntee sii ka', a ce bo' ŋwɛ̀ mò' ka'. 4Nyʉ̀ à m yɛ enɛ wèr à ghɛɛte, a ka' fa Nsuŋ Mbòŋmboŋ ca mba wěr mmbò. Yi ka' ba wa'a, wèr à ce fè'shi blàa ca tɛ nyor bo bòŋ ŋwɛ̀ ka'; wer ce fè'shi tɛ nyor bo bòŋ ba Nyʉ̀ ce e ke fyɛ' wer mntee. 5Wèe rìŋ bòŋboŋ enɛ wèr à m vʉ̀ tɛ wèr bo bu' cùu koni yuu ese wèe ka'. Wèr à m vʉ̀ tɛ wèr bo bo' bèe, koni bkù' ka'. Nyʉ̀ rìŋ wa' foŋ. 6Wèr à m ce ròo enɛ bèe a ku'si wèr ka', ka' wèe ɛ̀, kɛ̀ bèe mo' ɛ̀, wèr à m ce ròo wa' ka'. 7À m ku ba yer dì' enɛ wèr à m ba làa enɛ wèe nɛsi wèr njobè' wèr yu ŋgǎa ntuu nè Jisos Krâis. Wèr à ka' ba a wěe mʉ, a ba ba àmbò ma muu ce e ke gɛ' nè boo vi nà. 8Wèr à m ka' bà kòŋ wèe wa'a, a ke' koŋ enɛ wèr ku suŋ wèe ba Nsuŋ Mbòŋmboŋ ce e lò ese Nyʉ̀ ka', wèr à m kòŋ à rfa wer mnyor nè wèe foŋ, njobè' wèr à m kòŋ wèe sê. 9Bfʉr wâ, wèe ku bii ce kuushi njɛ̀ɛ mfà' ce wèr à m ce gèe à nfè' sèe à m ba wèr à ce suŋ Nsuŋ Mbòŋmboŋ nè wèe nà. Wèr à m ce fà' nètʉ' ba nèmootì fà dì' wèr bo ba ntɛ̀r nè ŋwɛ̀ mò' ka'. 10Wèe rìŋ àmbò Nyʉ̀ ye ye rìŋ foŋ nà enɛ yer ŋgèe ce wèr à m ce gèe nè wèe ce wèe à byemi, yi m ba yɛɛnì. Wèr à m gèe yuu bebep ka'. 11Wèe ku bii ce kuushi enɛ wèr à m gɛ' nè wèe àmbò tar muu e ke gɛ' nè boo vi nà. 12Wèr à m làa ba buu ce vi fa wèe ŋger kèr gèe tɛ wee mntee vi ce fʉte. Wèr à m cep wèe enɛ wèe gee ba ŋgèe ce Nyʉ̌ kòŋ. Ku ba ye ce e kɛ' wèe tɛ wèe bo ye rbòŋ ba fòo efa yi kʉʉ.

13Mbùu mò' ce wer ke yòŋshi Nyʉ̀ à nfè' wɛɛwɛ yu njobè' wèr à m fè'shi blǎa Nyʉ̀ nè wèe, wèe à yu' a byemi. Wèe à m byemi enɛ blàa ca à m ba blǎa ŋwɛ̀ mò' ka', à m ba ba blǎa Nyʉ̀. Yi yu mini wa'a. Wèe à ka' ce byemi blàa ca wa'a, vi ce kupsè me myòŋ. 14Yuu ce yi m koni wèe, ku ba yuu ce yi m koni ŋgǎa cor ce a yu à ŋgǒŋ Jùdiyà, ce a yu bèe Jisos Krâis. Yè bèe a m fa wèe ŋgɛ' àmbò Jus a m fa wowèe ŋgɛ' foŋ nà. 15Jus ca yu bèe ce a m yʉ Tata Jisòs, a ker yʉshi ŋgǎa ncep ntuu Nyʉ̀. Wowèe a m fa wèr ŋgɛ', a juu wèr, a ce gèe ŋgèe ce yi bòŋ Nyʉ̀ ka', a ker baa bèe wɛɛwɛ. 16Wowèe a m ce jepsi wèr efa rfè'shi blǎa Nyʉ̀ nè bèe enje jɛɛ. A m ce gèe wa'a a ce jepsi bèe enje jɛɛ anà efa ryu' nsuŋ ce e be gèe tɛ wowèe a lûŋ. Àmbò wowèe a ce gèe wa' nà, yàp buu bbebep à ku ce kù'. À ka' ba àlʉ̀simbùu Nyʉ̀ à ma' ŋgɛ' mbe wǎp ndù.

17Bfʉr wâ, kɛ̌' à nfè' wèr à m vʉ̀ ca'ni wèe, sèe à lo a gàpni nà, nfè' à be du se ka. Sèe à m gàpni ba enjep ntee ka, sèe à m ku gapni ba efa nyòr. Wèr à canì efa ryɛ wèe, a ce kòŋ se enɛ wèr à ba vʉ̀ tɛ sèe ker yɛni. 18Wèr à m ghèter se enɛ wèr à ba koni fɛŋ vʉ̀ cà'ni wèe. Mɛ̌ Pôl, mɛ̀ ghetèr nfè' àŋgoo sê, Satàn à ka' jepsi wèr efa rvʉ̀. 19Yuu ce àde' wèr kwa'shì àgho, lu'shi àgho, ker naatu àgho kùntombì nè yìsèe Tata Jisòs à nfè' ce e be vʉ̀ nà, yu ba kɛ caa efa wèe? 20Wèe yu bèe ce wèr be nàa tu, kèr lu'shi àgho à nfè' anà.

Currently Selected:

Ñwaè' Táèsaèlonikaè Ce Entombïì 2: LNT

Highlight

Copy

Compare