Ñwaè' Beâe Koreèn Ce Entombïì 9

1M tʉr ŋger à rgèe yuu ce mɛ̀ ka' koŋ à rgèe. M yu ŋwɛ̀ ntuu nè Jisos Krâis. Mɛ̀è m yɛ Jisos Krǎis ce e yu Tata nè sèe nè ma mmir. Wèe yu ya bo rfà' efa rfà' ce mɛ̀ fà' nè Tatâ. 2Bèe mo' a ka' tɛ rìŋ enɛ m yu ŋwɛ̀ ntuu nè Jisos Krǎis ka', mɛ̀ rìŋ mɛnɛ wèe rìŋ wa'a njobè' wèe yu ncòo ce e gèe bèe a riŋ enɛ m yu ŋwɛ̀ ntuu nè Tatâ.

3Blàa ce m be làa sè'ni na a blàa ce m ce làa nè bèe ce a ce tarni enɛ m yu ŋwɛ̀ ntuu nè Tatâ. 4Mbò wèr tʉr ŋger à rkoo byee ker ba buu mno ese bèe njo' rfà' ce wèr ce gèe nè wowèe a? 5Mbò wèr tʉr ŋger à rlòr wer bbyèŋge ce a yu ŋgǎa rbyemì, tɛ wèr wowèe ce kar àmbò Pità ba ŋgǎa ntuu mo' foŋ, ker ba bfʉr Tata Jisòs a ce gèe nà a? 6Wà' bèe ce àde' a fa', tar buu enjep mmbò ka' ce yeŋger, ku ba wèr Bànabàs a? 7Wà' àde' ŋwɛ̀ soogɛ̀ ce tàr buu enjep mmbò ka' ce yeŋger a? Wà' àde' ŋwɛ̀ nfà' byee lo buu efa rye byee ce e fà' a? Mbò bèe ce a ke cìŋ nà' a ke kaa mmbee nà' ce a ce cìŋ, no a? 8M ce làa buu ca, à ke' ku làa ba mɛ̀ ka', ncir Nyʉ̀ yi làa wa' foŋ. 9A saŋ mbe ŋwà' mncir ce Nyʉ̀ à m fa nè Musìs enɛ̂, “Fa kur cùu nà' ce e ce bu' msaŋ ka'.” Nyʉ̀ à m ce làa buu ca a ke' ce làa ba àmbò nà' ka'. 10E m ce làa ba àmbò sèe. Ŋwɛ̀ nfà' mnsuu à ba rìŋ enɛ e be tʉr ŋgʉ̀' mò' efa byee ce e fà', ŋwɛ̀ rkep riŋ foŋ enɛ e be tʉr ŋgʉ̀' mò' efa byee anà. 11Wèr à ka' fa' a wěe mʉ, bye buu ce à yʉ' njep wěe mntee, yi ke' ba yɛɛnì enɛ wèr à ba koni buu ce vi be gèe tɛ wèr cu rcu ryɛɛnì ese wèe a? 12Bèe mo' a ka' tʉr ŋger à rlàa enɛ wèe ja' wowèe, rìŋ nè enɛ bèe ce wèe à ba jà' entombì yu wèr. Ka' yi yu wa'a, wèr à be laa enɛ wèe ja' wèr ka', wèr à kòŋ à ryɛ ŋgɛ' fà dì' wèr bo jepsi bèe efa ryu' Nsuŋ Mbòŋmboŋ àmbò Jisòs ka'. 13Kuushi nè enɛ bèe ce a ke fà' mbe Ndàp Nyʉ̀ a ke ye efa buu ce bèe a fa rfa àgho mbe Ndàp Nyʉ̀, bèe ce a ke fà' mbe dǐ' ntòo rfa a ke ye ŋgʉ̀' mò' efa buu ce a taŋshi taŋshì àgho. 14Tata à m làa foŋ enɛ bèe a fa ŋgǎa rfè'shì buu ce àde' vi gee wowèe a cu rcu rbòŋboŋ.

15Ka' mɛ̀ tʉr ŋger à rlàa enɛ wèe ja' mɛ̀ wa'a, mɛ̀ be laa wa' ka'. M ce saŋ ŋwà' ca nè wèe sè'ni wa'a, a ke' ce saŋ tɛ wèe bo jà' mɛ̀ ka'. Ka' ba enɛ ŋwɛ̀ mò' gee tɛ nàatu ce m ce nàa njobè' m ce fè'shi blǎa Nyʉ̀ a ke' ce koo buu ese wèe ka' nà, lo ba yuu cicì, m boŋlàr kwe kwe. 16Àde' m naa tu njobè' blǎa Nyʉ̀ ce m ce fè'shi nè wèe ka' njobè' Nyʉ̀ à m làa nè mɛ̀ enɛ m fe'shî. Ndòo be co' mɛ̀ ce m ka' tɛ fè'shi ka'. 17À m ba kwa'shi ba mɛ̀ enɛ m be fè'shi blǎa Nyʉ̀ nè bèe, mɛ̀ m ba koo blà' ese wowèe. Yi ke' ba wa'a ka'. M ku ce gèe ba rfà' ce Nyʉ̀ à m fa mba mɛ̌ mmbò. 18Njɛ̀ɛ sɛ' ce àde' m konì efa rfà' ca yu ba kɛ? Yà sɛ' ku ba ba enɛ m fe'shi Nsuŋ Mbòŋmboŋ nè bèe à cicì. A mbùu ce m ce làa mɛnɛ bèe a fa là' mɛ̀ àmbò ŋwɛ̀ rfè'shì ka'.

19M yu ŋkwàa nè ŋwɛ̀ mò' ka'. Ka' m yu ŋkwàa nè ŋwɛ̀ mò' ka' wa'a, mɛ̀ gèe yà nyor àmbò ŋkwàa nè bèe wɛɛwɛ tɛ m bo so bèe magòr nè Jisos Krâis. 20Mɛ̌ cu wèr Jus wèe, gee ŋgèe àmbò wowèe wa'a, tɛ m bo so wowèe nè Jisos Krâis. Ka' mncir Musìs vi kur mɛ̀ ka' wa'a, mɛ̌ cu wèr bèe ce mncir ca vi kur wowèe, gee ŋgèe àmbò mncir ca vi kur lɛ mɛ̀ foŋ wa'a. M ce gèe wa'a, tɛ m bo so bèe anà nè Jisos Krâis. 21Mɛ̌ cu wèr bèe ce mncir vi kur wowèe ka', gee ŋgèe àmbò wowèe wa'a, tɛ m bo so wowèe nè Jisos Krâis. M ce gèe wa'a, ke' ba enɛ mɛ̀ lòr mncir ce Nyʉ̀ à m fa àtɛ̀r ka'. M ce yu'ni nè mncir Jisos Krǎis sê. 22Mɛ̌ cu wèr bèe ce map mkwà'shì mi ku bii fa wowèe ŋgɛ', m ku ba àmbò wowèe wa'a tɛ m bo so wowèe nè Jisos Krâis. Mɛ̌ lò ku gee yà nyor àmbò bèe a yu, tɛ m bo ghèter à mnduunjì jɛɛ jɛ̀ɛ jɛɛ, gèe tɛ wowèe a lûŋ. 23M ce gèe buu ca wa'a, tɛ bèe a bo yu' Nsuŋ Mbòŋmboŋ tɛ mɛ mɛ̀ koni bghònì ce nsuŋ anà e ke gèe bèe a konì. 24Mbò wèe rìŋ enɛ e ke ba nfè' mcaŋnì, ŋgàa mcaŋnì a caŋ wa'a, lo koo blà' bsìp ka' a? Banɛ wèe caŋ bòŋboŋ tɛ wèe bo koo blà'. 25Ŋwɛ̀ wɛɛwɛ ce e ke kòŋ à rcaŋ, e ke yɛ'ni à rcaŋ bòŋboŋ sê. E lò gee wa'a tɛ e bo koo blà' ce vi ke cu nfesè ka'. Blà' visèe à ba blà' ce vi be cu nfesè. 26Mɛ̀ ka' ce caŋ ya, a ke' ce caŋ ba à nji ka', a ku ce kè' ba kùntombì tɛ m bo caŋ mìsi. M ce mà' dʉ̀' a ke' ce mà' ba àmbò ŋwɛ̀ ce e ce mà' à bjiji ka'. 27M ce fa ŋgɛ' nè yà nyor, a gee e kʉtì à ŋkwàa fà dì' m ce fè'shi nè bèe mò', lò gwè, bɛ blà' ka'.

Currently Selected:

Ñwaè' Beâe Koreèn Ce Entombïì 9: LNT

Highlight

Copy

Compare