Ñwaè' Beâe Koreèn Ce Entombïì 8
8
1M be làa yuu àmbò byee ce bèe a ce gèe taŋshì àgho nè mnyʉ̀ enjep ŋgòŋ na nà. Sèe rìŋ seenɛ sèe wɛɛwɛ tʉr bfee. Bfee anà vi lò gee ŋwɛ̀, e naa tu. Yu ba rkòŋnì ce li ke kupshi bèe. 2Ŋwɛ̀ ce e kwà'shi enɛ e rìŋ buu sê, ŋgàŋ à be riŋ buu àmbò e ba rìŋ ka'. 3Ŋwɛ̀ à ka' koŋ Nyʉ̀ banɛ Nyʉ̀ rìŋ ye.
4À ka' ba àmbò nye byee ce bèe a ce gèe taŋshì àgho nè mnyʉ̀ enjep ŋgòŋ na nà, sèe à rìŋ enɛ njɛ̀ɛ mnyʉ̀ anà yu buu bcicì njobè' vi tʉr myòŋ ka'. Sèe rìŋ yisèe enɛ Nyʉ̀ ku ba mò'sir cà'cà'. 5Ka' buu mò' yu gòr mbe bùu ba njep nshè na ce bèe a ce too enɛ mnyʉ̀ wa'a, ker ce lòr buu anà àmbò vi yu lɛ btàr nè wowèe wa'a, 6sèe à rìŋ yisèe enɛ Nyʉ̀ ku ba mò'sir cà'cà', E yu Tàr nè sèe. Yu ye ce e m gèe buu wɛɛwɛ, a ker gee sèe foŋ enɛ sèe bo ba yì bèe. Sèe ku tʉr Tata mò'sir ce yu Jisos Krâis. Nyʉ̀ à m gèe buu wɛɛwɛ ba njì enjep ye. Yu ye ce e fa sèe ryòŋ.
7Yu ba ŋgǎa rbyemì wɛɛwɛ ce a rìŋ enɛ mnyʉ̀ enjep ŋgòŋ na yu ba buu bcicì ka'. Geewa'a, bèe mo' a yu ce a m ce loo nè mnyʉ̀ ca, e lò ba à nfè' ce wowèe a ce ye byee ce a fa nè mnyʉ̀ ca, a ku riŋ yap enɛ byee anà yu ba byee mnyʉ̀. Wowèe a ce ye, yap ntee yi ce fa wowèe ŋgɛ', wowèe a ce kwà'shi enɛ wowèe a gèe yuu bebep. 8Sèe à rìŋ seenɛ àtà byee vi gee sèe sèe ba jɛɛ à bsii Nyʉ̀ ka'. Sèe ka' tɛ ye ka', yì anà yi tʉr yuu mo' à rgèe ka'. Sèe ka' ye, yì anà yi gee sèe sèe ba jɛɛ ka'. 9Ka' sèe rìŋ wa'a, ŋwɛ̀ lor nfè' fà dì' njɛ̀ɛ ŋger ce Nyʉ̀ à m fa nè ye enɛ e ye buu nà, yi lo gèe tɛ bfʉr mo' ce map mkwà'shì mi ce fa wowèe ŋgɛ' nà, a lo gwè ka'. 10Ŋwɛ̀ ce yi ntee yi ka' ku bii fa ye ŋgɛ', ka' yɛ àmbò wɛ̀ ce wɛ̀ tʉr bfee ce ye byee mbe ndàp njɛ̀ɛ mnyʉ̀ ca, mbò cena yi be fa ye ŋger à rye byee anà a? 11E ka' ye, banɛ wɛ̀ ce wɛ̀ tʉr bfee nà, wɛ̀ bepsi nfʉrò ce Jisos Krǎis à m kwe nè ye. 12Wɛ̀ ka' gee yuu bebep nè bfʉr wo, tɛ yap ntee yi ce fa wowèe ŋgɛ' wa'a, banɛ wɛ̀ gèe yuu bebep nè Jisos Krâis. 13M ka' yɛ mɛnɛ m be ye njɛ̀ɛ byee anà tɛ nfʉrà gee yuu bebep, gwè, banɛ m be kèr ye vi ka'.
Currently Selected:
Ñwaè' Beâe Koreèn Ce Entombïì 8: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
