Ñwaè' Beâe Koreèn Ce Entombïì 10

1Bfʉr wâ, m kòŋ mɛnɛ wèe à ba kuushi buu ce vi m koni visèe bta à nfè' ce wowèe a m ce dà' à rìŋ nà bòŋboŋ. Mmbà' vi m ce kè'ni wowèe. Wowèe a m tuu ma rdip mo' ce a m ce too enɛ rdip rbeer nè mkùu. 2Àmbò wowèe a m ce dù àmbùu mmbà', a ker tuu rdip rbeer ca, cena yi m ba nè wowèe àmbò njɛ̀ɛ bàptir mò' ce e m gèe wowèe a ba bèe Musìs. 3Wowèe wɛɛwɛ a m ye byee ce Nyʉ̀ à m mà'ri embe bùu, 4a no mdip ce mi m fʉʉ ba enje ryɛɛ. Ryɛɛ anà à m ba Jisos Krǎis ce e m ce jɛ̀r a wowèe. 5Ka' wowèe a m yɛ buu ca nè map mmir wa'a, bèe magòr efa wowèe a m gèe buu ce ntee yi boŋ Nyʉ̀ ka'. Yi ka' ba wa'a, wowèe a kweŋgèr, bgʉ̀ʉ vi saŋsì nyor à rìŋ.

6Buu ca à ba gèe tɛ see sèe foŋ riŋ enɛ sèe à ba kòŋ buu bbebep àmbò visèe bta a m kòŋ nà ka'. 7Wèe fa gèe rloo nè mnyʉ̀ enjep ŋgòŋ na àmbò bèe mò' efa wowèe a m gèe nà ka'. A saŋ mbe Ŋwǎ' Nyʉ̀ enɛ̂, “Bèe a m cu à nshè a ye byee, a no buu, a nati mbekì a bii bii nè blaŋ.” 8Sèe fa ce sàki àmbò bèe mo' efa wowèe a m sàki nà ka'. Wowèe a m sàki wa'a, bèe ncʉ̀kì-ncòp-taar-à-mmbaa a kweŋgèr à nǒŋ mo'sir. 9Sèe fa mòoshi Tata àmbò bèe mo' efa wowèe a m mòoshi nà ka'. Mnyo vi m tashi wowèe, wowèe a kweŋgèr. 10Sèe fa ce rʉ̀'ŋger àmbò bèe mo' efa wowèe a m rʉ̀'ŋger nà ka'. Ncìndap Nyʉ̀ ce e ke yʉshi bèe nà à m yʉshi wowèe.

11Buu ce vi m koni bèe elǔuŋgòŋ, yu buu ce Nyʉ̀ à m bɛɛ wowèe àgho. A m saŋ buu ca tɛ sèe ce sèe ce cu ba à nfè' ce ŋgòŋ yi ce mì na, bo rìŋ, lòr nfè' fà dì' buu anà koni sèe foŋ ka'. 12Banɛ ŋwɛ̀ ce e ce kwà'shi enɛ e tɛɛ tatap, lor nfè' fà dì' e gwe ka'. 13Njɛ̀ɛ rmòoshì ce li ka' vʉ nè wèe ku ba njɛ̀ɛ rmòoshì ce li vʉ̀ nè bèe mo' foŋ. Nyʉ̀ ce e yu mini be mà'shi tɛ li vʉ càa ye ŋger ka'. Rmòoshì li ka' vʉ nè wèe banɛ e be fa wèe ŋger tɛ wèe tɛɛ tatap, so rmòoshì anà.

14Bkar wâ, banɛ m ce làa nè wèe enɛ wèe fa tʉr yuu mo' à rgèe nè mnyʉ̀ enjep ŋgòŋ na ka'. 15M ce làa nè wèe ce wèe rìŋ buu. Wèe kwa'shi ka enɛ yuu ce m ce làa nè wèe yi yu mini lɛ. 16E ke ba à nfè' sèe ce ye byee Nyʉ̀, see loo, yoŋshi ye à ndoŋ mrù' ce see ke no. Sěe ce no enjep ndoŋ anà yi ce dùŋshi enɛ sèe Jisos Krǎis wèe yu àbee njo' vi blɛɛ. Sěe ce bɛ'shi byee, yi ce dùŋshi foŋ enɛ sèe wowèe yu àbee njo' yì nyor. Mbò yi yu wa' a? 17Ka' sèe ce sèe ce ye efa byee anà, sèe yu àŋgoo wa'a, ntu' brɛ̌d ku ba mò'sir. Cena yi dùŋshi enɛ sèe wɛɛwɛ yu ŋwɛ̀ mò'sir.

18Kwà'shi nè àmbò ndèe bèe Isrɛ̀l. E ke ba à nfè' bèe mo' efa wowèe a ce ye byee ce a taŋshi taŋshì àgho nè Nyʉ̀, a Nyʉ̀ wèe a ba ŋwɛ̀ mò'sir. 19Yuu ce m ce làa yi yu ba enɛ kɛ? Wà' nyʉ̀ mò' enjep ŋgòŋ na, kɛ̀ byee ce a ke taŋshi taŋshì àgho nè njɛ̀ɛ nyʉ̀ ca ɛ̀, e ke ba yuu gòr a? 20Yi yu wa' ka'. Bèe ce a rìŋ Nyʉ̀ ka' a ke taŋshi yap taŋshì ba nè mnyʉ̌mkà'. Wowèe a ke taŋshi taŋshì ca ba nè Nyʉ̀ ka'. M ce kòŋ mɛnɛ wèe mnyʉ̌mkà' wèe ba ŋwɛ̀ mò'sir ka'. 21Àde' ŋwɛ̀ no enjep ndoŋ Tata Jisos Krâis, ker no enjep ndoŋ mnyʉ̌mkà' à njɛ̌ɛ kɛ? Àde' ŋwɛ̀ ye byee ce yu ba byee Tata Jisos Krâis, ker ye byee ce yu ba byee mnyʉ̌mkà' à njɛ̌ɛ kɛ? 22Sèe lor nfè' fà dì' sèe gee yuu mo' ce ntee yi bep Tata Nyʉ̀ nè sèe ka'. Wà' sèe tʉr ŋger a caa ye a?

23Wèe tʉr ŋger à rgèe buu wɛɛwɛ. Ka' wèe tʉr ŋger ca wa'a, yu buu wɛɛwɛ ce àde' vi ja' bèe ka'. Yi yu mini enɛ wèe tʉr ŋger à rgèe buu wɛɛwɛ. Ka' yi yu mini enɛ wèe tʉr ŋger à rgèe buu ca wa'a, yu buu wɛɛwɛ ce àde' vi gee bèe a tɛɛ tatap njep buu ce yu vi Tata Jisos Krǎis ka'. 24Ŋwɛ̀ wɛɛwɛ gee yuu ce àde' yi ja' ŋwɛ̀ mò'. Ŋwɛ̀ fa gèe ba yuu ce yi ku bòŋ ba ye cà'cà' ka'.

25Wèe fa mà'shi tɛ ye ntee yi ce fa wèe ŋgɛ' à rye nyàa ce wèe a yuu efa ntaa ka'. Wèe fa kwà'shi enɛ wèe ka' gee wa'a ba yuu bebep ka'. 26M ce làa wa'a njobè' a saŋ mbe Ŋwǎ' Nyʉ̀ enɛ̂, “Ŋgòŋ ca wɛɛwɛ yu yi Nyʉ̀, ker ba buu wɛɛwɛ ce vi yu njo.” 27Ŋwɛ̀ ce e yu ŋwɛ̀ rbyemì ka', à ka' be wɛ̀ enɛ à vʉ tɛ wèe ye ye byee, wɛ̀ ka' dû, à ye njɛ̀ɛ byee wɛɛwɛ ce e ka' fa wɛ̀. Fa mà'shi tɛ yo ntee yi lo kɛ̀' ce fa wɛ̀ ŋgɛ' ka'. 28Ka' yi yu wa'a, ŋwɛ̀ mò' à ka' suŋ wɛ̀ enɛ byee ce à ce ye anà yu byee ce a taŋshi taŋshì àgho, à fa ye ka'. Fa ye ka' njobè' ŋwɛ̀ anà ka' yɛ àmbò à ce ye, e kwa'shì yi enɛ wɛ̀ gèe ba yuu bebep. 29Fa ye ka' njo' mkwà'shì mi ŋwɛ̀ anà, ke' ba njo' mo ka'. Seemò' ŋwɛ̀ mò' be làa enɛ̂, “Àde' m bornì efa rgèe yuu mo' njobè' ŋwɛ̀ mò' ce kwà'shi enɛ yuu anà yi yu bebep njokɛ? 30M ka' ce yòŋshi Nyʉ̀ à byee ce m ce ye, bèe mo' a laa bebep àmbò mɛ̀ à njɛ̌ɛ kɛ?” 31Ŋwɛ̀ ka' laa wa'a, m beesì mɛnɛ̂, “Yuu wɛɛwɛ ce wɛ̀ ka' ce gèe, kɛ̀ à ce ye ye ɛ̀, kɛ̀ à ce no no ɛ̀, gèe ba à njɛ̀ɛ njì ce bèe mo' a ka' yɛ, tɛ wowèe a bo kù'si Nyʉ̀.” 32Lòr nfè' fà dì' à gee yuu mo' ce yi gee tɛ ŋwɛ̀ mò' gwê, kɛ̀ yu Jus ɛ̀, kɛ̀ yu bèe enje jɛɛ ɛ̀, kɛ̀ yu ŋgǎa cor ɛ̀, fa kè mòo ka'. 33Mɛ mɛ̀ ce ghèter à rgèe tɛ nyor boŋ ŋwɛ̀ wɛɛwɛ à buu wɛɛwɛ ce m ce gèe. Mɛ ke kwà'shi ba à yuu ce àtà yi ja' ba mɛ̀ cà'cà' ka'. Mɛ ke kwà'shi ba àmbò yuu ce àtà yi ja' bèe wɛɛwɛ, tɛ wowèe a bo lùŋ efa buu bbebep.

Currently Selected:

Ñwaè' Beâe Koreèn Ce Entombïì 10: LNT

Highlight

Copy

Compare