Ñwaè' Beâe Koreèn Ce Entombïì 7

1M be bèesi buu ce wèe à m saŋ a bipshi nè mɛ̀ nà. Ŋwɛ̀ à ka' tɛ lòr ŋgwa ka' yi ku ba yɛɛnì. 2Ka' yi yu wa'a, yi bòŋ enɛ mbaŋrùŋwɛ̀ tʉr ŋgwa yì, tɛ njeŋwɛ̀ tʉr nduu yì, fà dì' wowèe a lo gwè rmòoshì, ce sàki ka'. 3Nduu fa shè ŋgwa embe bkuu ka'. Ŋgwa ye ye fa shè nduu yì ka'. 4Àde' ŋgwa ŋwɛ̀ cu nè yi tu ka'. Ŋwɛ̀ ce e tʉr ŋger mbe yě ndù yu nduu yì. Àde' nduu ŋwɛ̀ cu nè yi tu ka'. Ŋwɛ̀ ce e tʉr ŋger mbe yě ndù yu ŋgwa yì. 5Nduu ŋwɛ̀ fa kani bkuu ŋgwa, kɛ̀ ŋgwa kani bkuu nduu ka'. A ye a ka' tɛ tarshi bkuu ka' banɛ a ye a ba byemi àbee enɛ a be gèe wa' ka', tɛ a bo lòr nfè' anà gèe ba rloo. Wee lò ker tarshi bkuu fà dì' Satàn mooshi wèe tɛ wèe gwe rmòoshì njobè' wèe à mòo à rcu wa' làr ka'. 6M ku ce fa ca ba àmbò ntaŋ, ke' ba enɛ a ncir ka'. 7À ba ba yi àmbò mɛ̀, bèe wɛɛwɛ à ba kù cu ŋkʉ̀ àmbò mɛ̀. Ka' m ce làa wa'a, mɛ̀ rìŋ mɛnɛ Nyʉ̀ à fa bèe ŋger jɛɛ jɛ̀ɛ jɛɛ. E fa ŋwɛ̀ mo' ŋger enɛ e fa' nè ye à njì mò', a ker fa mò' ŋger enɛ e fa' nè ye à njì mò'.

8Mɛ̌ làa ca sè'ni ba nè bkʉ̀ ker ba byepkʉʉ. Yi yu bòŋboŋ enɛ wowèe a ku cu nè yap tu àmbò mɛ mɛ̀ cu na. 9Yi ka' ba wa'a, wowèe a ka' moo à rcu wa' làr, mbaŋrùŋwɛ̀ lor ŋgwa yì, njeŋwɛ̀ yɛ nduu yì a ye a cu. Yi yu àndèe ce mbaŋrùŋwɛ̀ ka' lor ŋgwa, njeŋwɛ̀ ye ye du bgùu nè ce a ku cu wa'a tɛ ntee njeŋwɛ̀ yi ce lò mbaŋrùŋwɛ̀ sê, tɛ ntee mbaŋrùŋwɛ̀ yi ce lò njeŋwɛ̀ sê.

10Yuu ce m ce làa nè bèe ce a dù bgùu wɛɛ yi yu enɛ njeŋwɛ̀ fa fʉʉ ese nduu yì ka'. Mɛ̀ làa cena nè wèe ba nè ya tu ka'. Blàa ca yu blàa ce vi vʉ̀ ba ese Tatâ. 11Njeŋwɛ̀ ka' fʉʉ bgùu, e fa kèr yɛ nduu mò' ka'. Ka' ba enɛ e yɛ nduu mò', e kʉtì ba a nduu yì cà. Yi yu foŋ enɛ mbaŋrùŋwɛ̀ fa jùu ŋgwa yì ka'. 12À ka' ba àmbò mmbaŋrù ce a tʉr bbyèŋge ce a yu ŋgǎa rbyemì ka', ker ba bbyèŋge ce a tʉr bduu ce a yu ŋgǎa rbyemì ka', m be fa wowèe ncep. Ncep ca à kwà'shi ba mɛ̀, ke' ba enɛ à fa Tata Nyʉ̀ ka'. Mbaŋrùŋwɛ̀ ce e yu ŋwɛ̀ rbyemì ka' tʉr ŋgwa ce e yu ŋwɛ̀ rbyemì ka', ŋgwa yì anà ku koŋ enɛ a ye a cu, e fa jùu ye ka'. 13Yi yu foŋ enɛ njeŋwɛ̀ ka' tʉr nduu ce e yu ŋwɛ̀ rbyemì ka', nduu anà koŋ enɛ a ye a ku cu, e fa fʉʉ bgùu ka'. 14Nyʉ̀ à gèe enɛ mbaŋrùŋwɛ̀ ce e yu ŋwɛ̀ rbyemì ka' koni bghònì ese ye njo' ŋgwa yì ce e yu ŋwɛ̀ rbyemì. E ker gee foŋ enɛ njeŋwɛ̀ ce e yu ŋwɛ̀ rbyemì ka' koni bghònì ese ye njo' nduu yì ce e yu ŋwɛ̀ rbyemì. Yi ka' tɛ bà ba wa' ka', boo wap à ba ba boo bbebep, geewa'a, wowèe a yu brara. 15Mbaŋrùŋwɛ̀ ce e yu ŋwɛ̀ rbyemì ka', ka' koŋ enɛ a ŋgwa a gapni, àde' a ye a ku gapni. Njeŋwɛ̀ ce e yu ŋwɛ̀ rbyemì ka', ka' koŋ enɛ a nduu yì a gapni, àde' a ye a ku gapni. A ye a ka' gapni banɛ ŋwɛ̀ ce e yu ŋwɛ̀ rbyemì, kɛ̀ yu mbaŋrùŋwɛ̀ ɛ̀, kɛ̀ yu njeŋwɛ̀ ɛ̀, e bʉ' ncir Nyʉ̀ ka'. Nyʉ̀ à kɛ' sèe enɛ sèe bo cu rcu ce li yu nè rfʉtè-ŋwɛ̀. 16Wɛ̌ ŋgwa, wɛ̀ rìŋ nè kɛ àmbò àde' Nyʉ̀ lo ja' nduu wò njo' wɛ̀? Wɛ̌ nduu, wɛ̀ rìŋ nè kɛ àmbò àde' Nyʉ̀ lo ja' ŋgwa wò njo' wɛ̀?

17Yɛ nè enɛ ŋwɛ̀ wɛɛwɛ ku gee ba yuu ce Nyʉ̀ à fa ye ŋger enɛ e gêe. Ŋwɛ̀ wɛɛwɛ ku ba àmbò e m ba tɛ Tata Nyʉ̀ ka' kɛ' ye. A yuu ce m ce yɛ'ni à bcor wɛɛwɛ. 18Ŋwɛ̀ ka' ba ce a m gèe ye bʉ̀ tɛ Nyʉ̀ ka' kɛ' ye, ŋgàŋ fa kèr ròo nduunjì mo' enɛ a gee ye e kʉti mbɛ̀'-nsʉ̀r ka'. Ŋwɛ̀ à m ka' ba ba mbɛ̀'-nsʉ̀r tɛ Nyʉ̀ ka' kɛ' ye, e fa gèe bʉ̀ ka'. 19Kɛ̀ ŋwɛ̀ à gèe bʉ̀ ɛ̀, kɛ̀ ŋwɛ̀ à gèe bʉ̀ ka' ɛ̀, yì anà yi tʉr yuu mo' à rgèe ka'. Yuu ce yi yu gòr yi yu ba enɛ ŋwɛ̀ lɛ mncir Nyʉ̀. 20Yi ka' ba wa'a, banɛ ŋwɛ̀ wɛɛwɛ ku ba àmbò e m ba tɛ Nyʉ̀ ka' kɛ' ye. 21Wɛ̀ m ka' ba ba ŋkwàa à nfè' ce Nyʉ̀ à m kɛ' wɛ̀, à fa bu' ka', ka' ba ne enɛ wɛ̀ koni fɛŋ à rfʉʉ efa bkwàa, à fʉʉ yo yu. 22Mɛ̀ làa wa'a, njobè' ŋwɛ̀ ce e m ka' ba ba ŋkwàa à nfè' ce Nyʉ̀ à m kɛ' ye, e fʉʉ sè'ni efa buu bbebep njobè' a Tata a yu àbee. Yi yu foŋ enɛ ŋwɛ̀ ce e m ba ŋkwàa à nfè' Nyʉ̀ à m kɛ' ye ka', yu sè'ni ba ŋkwàa Jisos Krâis. 23Wèe yu bkwàa Jisos Krǎis njobè' e m yuu wèe à ntaa nlùuluu. Wèe fa ba bkwàa ba nè bèe ka'. 24Bfʉr wâ, banɛ ŋwɛ̀ wɛɛwɛ ku ba a Nyʉ̀, ce cu àmbò e m ce cu à nfè' Nyʉ̀ à m kɛ' ye.

25À ka' ba àmbò bèe ce a be du bgùu kɛ̀ bèe ce a be lor bbyèŋge ka', ka' Nyʉ̀ à fa mɛ̀ blàa mo' enɛ m laa nè wowèe ka' wa'a, m be suŋ wowèe yuu ya ce mɛ̌ kwà'shi. M ce làa wa'a àmbò ŋwɛ̀ ce àtà wèe yu' yuu ce m ce làa, njobè' Tata Jisos Krǎis ce e m koosimnse nè mɛ̀.

26À ka' ba njobè' ŋgɛ' ce e yu sè'ni na, m ce kwà'shi mɛnɛ yi yu bòŋboŋ enɛ ŋwɛ̀ ku cu àmbò e yu. 27Ŋwɛ̀ ka' tʉr ŋgwa, e fa tà' nduunjì à rjùu ye ka, ŋwɛ̀ ka' tɛ tʉr ŋgwa ka', e fa tà' nduunjì à rlòr ŋgwa ka'. 28Ka' mɛ̀ làa wa'a, ŋwɛ̀ ka' lor ne ŋgwa, banɛ e gèe yuu bebep ka'. Muu ŋgòŋgò ka' du bgùu banɛ e gèe yuu bebep ka'. Wèe à rìŋ enɛ bèe wɛɛwɛ ce a ke cu à nduu a ŋgwa a ke yɛ ŋgɛ' njep ŋgòŋ na sê. Mɛ̀ yɛ ya mɛnɛ ŋwɛ̀ à ba cu ŋkʉ̀ fà dì' e bo yɛ njɛ̀ɛ ŋgɛ' ca ka'.

29Bfʉr wâ, yuu m ce làa yi yu enɛ nfè' Nyʉ̀ à fa sèe yu nlʉ̀'shi. Banɛ kɛ' e sè'ni na, bèe wɛɛwɛ ce a tʉr bbyèŋge, a cu àmbò a yu lɛ bkʉ̀ wa'a. 30Tɛ bèe ce e koosimnse a cu àmbò a ce koosi lɛ mnse ka' wa'a. Tɛ bèe ce a ce lu'shi a cu àmbò bèe ce a ce lɛ lu'shi ka' wa'a. Tɛ bèe ce a yu ŋgǎa ntaa a cu àmbò bèe ce a tʉr lɛ buu ntaa ka' wa'a. 31Tɛ ŋwɛ̀ ce e tʉr rfà' à rgèe njep ŋgòŋ na, kɛ̀ yu ba njɛ̀ɛ rfà' kɛ, cu àmbò ŋwɛ̀ ce e tʉr lɛ mkwà'shì à buu anà ka' wa'a, njobè' ŋgòŋ ca yi ce mì.

32Mɛ̀ kòŋ mɛnɛ buu mò' ba ce vi be fa wèe ŋgɛ' ka'. Ŋwɛ̀ ce e cu ŋkʉ̀ e ke kwà'shi àmbò buu ce Tata Jisòs à kòŋ enɛ e gee tɛ nyor boŋ ye. 33À ka' ba yi àmbò ŋwɛ̀ ce e tʉr ŋgwa, e ke kwà'shi àmbò buu enjep ŋgòŋ ce ròo enɛ e gee nyor boŋ ŋgwa yì. 34Yi ba wa'a, banɛ yi ntee yi gàp nyor à buu bbaa. Boo mŋgòŋgò ba bbyèŋge ce a tʉr bduu ka', a ke kwà'shi àmbò buu Tatâ. Wowèe a lò lor wâp mntee ba wâp mnyor wɛɛwɛ fa nè Nyʉ̀. Bbyèŋge ce a tʉr bduu a lò kwa'shi ba àmbò buu enjep ŋgòŋ na njobè' wowèe a kòŋ enɛ a gee tɛ nyor boŋ bduu wap.

35Mɛ̀ làa buu ca tɛ m bo jà' wèe jà'. Mɛ̀ kòŋ mɛnɛ m lɛ wèe ba ntɛ̀r mbendù nyor ka'. Yuu mɛ̀ kòŋ yi yu ba enɛ wèe gee buu ce vi yu bbòŋboŋ a ba byɛɛnì tɛ yuu mo' yi bo ba ce àtà yi jepsì wèe efa rfà' nè Tata ka'.

36À ka' ba àmbò mbaŋrùŋwɛ̀ ce e fa kwàŋ nè muunje, mbaŋrùŋwɛ̀ anà ka' yɛ enɛ e be lòr muunje ca ka' njobè' e kòŋ à rcu ŋkʉ̀ tɛ e bo fà' nè Nyʉ̀ bòŋboŋ, yi bep ka'. E ka' moo à rcu làr njo' ntee njeŋwɛ̀ yi ce lò ye, e ka' koŋ e lor ŋgwa yì. E ka' gee wa'a, banɛ e gèe yuu bebep ka'. 37Mbaŋrùŋwɛ̀ ka' kwa'shi nè yi tu enɛ e be lòr muunje anà ka', ce mbò à làa ŋwɛ̀ mò' nè ye ka', e ka' cu ŋkʉ̀, riŋ enɛ e be kèr kwà'shi yuu mo' àmbò njeŋwɛ̀ ka', banɛ e gèe bòŋboŋ. 38Banɛ mbaŋrùŋwɛ̀ ce e lòr ŋgwa, e gèe yɛɛnì. Mbaŋrùŋwɛ̀ ce e lòr ŋgwa ka', e gèe yuu bòŋboŋ a caa mbaŋrùŋwɛ̀ ce e lòr ŋgwa.

39Yi yu enɛ njeŋwɛ̀ ka' du bgùu banɛ e be kù cu a nduu yì kè càa kwe. Ka' ba ne enɛ nduu yì à kwe, banɛ e tʉr ŋger à ryɛ nduu mò', ce yu ba ŋwɛ̀ ce e tɛɛ njep mʉ̀ buu Tatâ. 40Mɛ̀ yɛ ya mɛnɛ e ka' cu nè yi tu, e yu' rbòŋ sê. Mɛ̀ byemi mɛnɛ yuu mɛ̀ làa na, yi vʉ̀ ba ese Yʉ' Nyʉ̀.

Currently Selected:

Ñwaè' Beâe Koreèn Ce Entombïì 7: LNT

Highlight

Copy

Compare