Ñwaè' Beâe Koreèn Ce Entombïì 6

Mɛ̀ tʉr yuu à rlàa àmbò mnsa' ce wěe dù àgho mbe kôr. 1Wà' yi yu bòŋboŋ enɛ ŋwɛ̀ rbyemì ka' tʉr mnsa' a ŋwɛ̀ rbyemì mò', e lor ye du àgho mbe kor enɛ bèe ce a yu byɛɛnì ka' a sa' a? Mbò wèe à ba sa' wee mnsa' a wěe mʉ àmbò bèe Nyʉ̀ a? 2Mbò wèe à rìŋ enɛ bèe Nyʉ̀ a be kè sa' ŋgòŋ ca a? Ka' ba enɛ ŋgòŋ ca be kè sa' wèe, wà' banɛ wèe à ghɛɛte à rsa' mʉ mnsa' ce vi yu a wěe mʉ ka' a? 3Mbò wèe rìŋ enɛ sèe be kè sa' bcìndap Nyʉ̀ a? Yi ka' ba wa'a, yi ka' ba ekɛ àmbò buu ce vi kùu lisèe rcu enjep ŋgòŋ. 4Banɛ mʉ mnsa' vi ba a wěe mʉ, wèe du àgho mbe kôr, fa nè bèe ce cor e ke lòr à yuu ka', enɛ a sa' nè wèe njokɛ? 5Mɛ̀ làa cena tɛ rìtu yi bo koo wèe. Wà' ŋwɛ̀ mò' ce e tʉr bfee yu a wěe mʉ ce mfʉr mò' ka' tʉr mnsa' a nfʉr mò', e sa' mnsa' anà nè wowèe ka' a? 6Mbùu njokɛ ce nfʉr mò' e lò lor mò' du àgho mbe kor du tɛɛ kùntombì nè bèe ce a byemi nè Jisos Krǎis ka'?

7Yi yu mini enɛ ŋwɛ̀ rbyemì mò' ka' ce lòr mò' ce dù àgho mbe kôr, banɛ wèe à gwè. Yi yu àndèe enɛ wèe à ba borni ye yu, lèse fàa ce bèe a gèe nè wèe tɛ a fip wèe, nè ce wèe lor wowèe dù àgho mbe kôr. 8Wèe à gèe wa' ka'. Yuu wèe à gèe ye, yi yu enɛ ŋwɛ̀ mò' ce gèe fàa nè mò', mò' à ce fìp mò', ka' wèe wɛɛwɛ yu bfʉr wa'a.

9Mbò wèe rìŋ weenɛ àde' bèe ce a yu byɛɛnì ka' a niŋ mbe dǐ' kʉʉ Nyʉ̀ ka' a? Wèe fa bo' wee btu ka'. Rìŋ nè enɛ bèe ce a ce sàki ba bèe ce a ce loo nè mnyʉ̀ enjep ŋgòŋ na, ba bèe ce a ce koo bbyèŋge bèe mo', kɛ̀ mmbaŋrù mo' ɛ̀, ba mmbaŋrù ce a ce koo mmbaŋrù mo', 10ka' byɛ̀ɛ ɛ̀, kɛ̀ ŋgǎa ŋko'ndoŋ ɛ̀, kɛ̀ no ŋkoo wèe ɛ̀, kɛ̀ ŋgǎa mcɛpni ɛ̀, kɛ̀ ŋgǎa fàpshi buu à ŋger ɛ̀, àde' a niŋ mbo ka'. 11À m ba entombì, bèe mo' efa wèe a ce gèe njɛ̀ɛ ŋgèe ca. À ka' ba sè'ni na, Tata Nyʉ̀ à su'sì wèe, a ker gee wèe à ba jɛɛ, a ba byɛɛnì à ŋger Jisòs Krǎis ker ba à ŋger Yʉ' yìsèe Nyʉ̀.

12Yi yu mini enɛ yuu mo' yi yu ce àde' m buu efa rgèe ka'. Geewa'a, yu buu wɛɛwɛ ce vi ce jà' ka'. Ka' yuu mo' yi yu ce àde' m buu efa rgèe ka' wa'a, àtà m ke' byemi mɛnɛ yuu mo' yi tʉr ŋger mbe mɛ̌ ndù tɛ m lo ba ŋkwàa nè yuu anà ka'. 13Àde' à laa wɛnɛ̂, “Byee vi yu njo' rbʉ̀, rbʉ̀ li ba njo' byee.” Ka' yi yu mini wa'a, Nyʉ̀ be gèe tɛ rbʉ̀ ba byee a lo mì. À ka' ba yi àmbò nyor, Nyʉ̀ à m gèe nyor tɛ bèe a bo lòr ce sàki àgho ka'. Nyʉ̀ à m gèe nyor tɛ ŋwɛ̀ bo gèe rfà' àgho nè Tata Jisos Krâis. Tata Jisos Krǎis à ce kè'ni nyor anà. 14Nyʉ̀ be lòr yi ŋger fʉr sèe àgho efa rkwe àmbò e m fʉr Tata Jisos Krǎis efa rkwe nà. 15Mbò wèe rìŋ enɛ wêe mnyor yu ŋgʉ̀' mò' efa nyor Jisos krǎis a? Banɛ àde' ŋwɛ̀ lor yì nyor ce yu ŋgʉ̀' mò' efa nyor Jisos Krâis, gee tɛ e ba ŋgʉ̀' mò' efa nyor kwàrà a? Ka'! Àtà yi ba wa' ka'. 16Mbò wèe rìŋ enɛ ŋwɛ̀ ka' lor yì nyor gee e ba ŋgʉ̀' mò' efa nyor kwàrà banɛ a ye a yu sè'ni ba ŋwɛ̀ mò'sir a? A saŋ mbe Ŋwǎ' Nyʉ̀ enɛ̂, “Mbaŋrùŋwɛ̀ ba njeŋwɛ̀ ca a be ba nyor mò'sir.” 17Ŋwɛ̀ ce e ka' gee yì nyor ba ŋgʉ̀' mò' efa nyor Tata Jisos Krǎis banɛ Jisos Krǎis a ŋwɛ̀ anà a yu ŋwɛ̀ mò'sir à yʉ'.

18Caŋ nè bsàkì. Yuu bebep mo' ce ŋwɛ̀ e ke gèe e ke tʉr yuu mo' à rgèe nè yì nyor ka'. À ka' ba yi àmbò ŋwɛ̀ ce e ce sàki, e ce bepsi ba yì nyor. 19Mbò wèe rìŋ enɛ wêe mnyor yu ndap Yʉ' Rara a? Yʉ' Rara anà yi vʉ̀ ese Nyʉ̀ a ce cu njep wèe. Mnyor ce wèe tʉr yu wêe mnyor ka'. 20Nyʉ̀ à m yuu wèe à ntaa nlùuluu. Banɛ wèe lor wêe mnyor gee rfà' àgho ba nè ye cà'cà' tɛ e bo sa' fòo àgho.

Currently Selected:

Ñwaè' Beâe Koreèn Ce Entombïì 6: LNT

Highlight

Copy

Compare