Ñwaè' Beâe Koreèn Ce Entombïì 5

1Mɛ̀ yu' mɛnɛ bèe mo' efa wěe mʉ a ce sàki. Njɛ̀ɛ sàkì ca yu njɛ̀ɛ yì ce àde' e ba ka', ka' à mʉ̀ bèe ce a rìŋ Nyʉ̀ ka'. Mɛ̀ yu' mɛnɛ ŋwɛ̀ mò' efa wěe mʉ ce koo ŋgwa yì tâ. 2Àde' wèe ce nàa tu à njɛ̌ɛ kɛ ce ŋwɛ̀ mò' efa wěe mʉ ka' ce gèe njɛ̀ɛ yuu ca. Wèe à ba ce war war. Wèe fʉr ŋwɛ̀ ca efa wěe mʉ.

3-4Ka' m yu ànjìsàp efa wèe wa'a, sèe ku ba àbee à yʉ'. À rlii Tata Jisos krâis, mɛ̀ sa' war yuu ce ŋwɛ̀ ca ce gèe, a teni mnsa' anà àmbò m yu lɛ a wěe mʉ wa'a. Gèe nè ba yuu ce m be suŋ wèe na. Kaari nè àbee mbe dǐ' mo'sir. Ya yʉ' yi be kù ba a wěe mʉ. 5Wee kaari wɛɛ, lor ŋwɛ̀ anà fa mbà mmbo Satàn à ŋger Tata Jisòs, tɛ e bo yɛ ŋgɛ', tɛ Nyʉ̀ bo jà' li ryòŋ à nòŋ ce Tata Jisos krǎis be kʉti njep ŋgòŋ na.

6Yè nàatu anà bòŋ ka'. Mbò wèe rìŋ enɛ àde' yuu bebep e mò'sir yi bepsì cor nsìp a? 7Banɛ wèe fʉr yuu bebep ca efa wěe mʉ tɛ wèe bo ba brara. Yi yu mini enɛ wèe yu war brara njobè' a m taŋshi taŋshì nè Jisos Krǎis ce e yu yìsèe njèe taŋshì. 8Yi ka' ba wa'a banɛ sèe cu rcu ce mini. Njɛ̀ɛ buu bbebep àmbò bcena vi fa ba a sěe mʉ ka'. Ŋwɛ̀ fa tʉr mkwà'shǐ mbebep nè nfʉr yì ka'. Ŋwɛ̀ fa gèe bsàrbuu ka'.

9Mɛ̀ m saŋ mbe ŋwà' ce mɛ̀ m saŋ nè wèe nà enɛ wèe fa kè kar wèe bèe ce a ce sàki ka'. 10Mɛ̀ m làa cena a ke' ce làa ba àmbò bèe ce a mɛŋni Jisòs ka'. Bèe ce a ke sàki, ce ko'ndoŋ, ce yɛ̀ɛ, ker ce loo nè mnyʉ̀ enjep ŋgòŋ na, a ku ba sèe wowèe njep ŋgòŋ na. Tɛ à ka' buu efa rkar wèe njɛ̀ɛ bèe ca wèe, banɛ à be fʉʉ enjep ŋgòŋ na dù fà mo'. 11Ncep ce mɛ̀ m fa wèe e m ba ba enɛ wèe fa kar wèe ŋwɛ̀ ce e ce làa enɛ e yu nfʉr, a ker ce sàki ka'. Kɛ̀ yu ŋwɛ̀ ŋko'ndoŋ ɛ̀, kɛ̀ nyɛ̀ɛ ɛ̀, kɛ̀ yu ŋwɛ̀ ce e ce loo nè mnyʉ̀ enjep ŋgòŋ na ɛ̀, kɛ̀ yu ŋwɛ̀ ce e ce cɛp bèe ɛ̀, kɛ̀ yu no ŋkoo ɛ̀, wèe wowèe fa kè kar ka'. Fa kè ye byee wèe njɛ̀ɛ bèe anà wèe ka'.

12-13À ka' ba yi àmbò bèe ce a mɛŋni Jisòs, m tʉr ŋger mo' à rsa' wowèe ka'. Nyʉ̀ a ŋwɛ̀ ce e ke sa' njɛ̀ɛ bèe ca. Yu ba yisèe dì' à rsa' ŋgǎa côr, yɛ enɛ wowèe a gèe bòŋboŋ kɛ̀ bebep lɛ. Yà bèe, banɛ wèe gee àmbò a saŋ mbe Ŋwǎ' Nyʉ̀. A saŋ mbo enɛ̂, “Fʉr nè ŋwɛ̌ mbembep efa wěe mʉ.”

Currently Selected:

Ñwaè' Beâe Koreèn Ce Entombïì 5: LNT

Highlight

Copy

Compare