Ñwaè' Beâe Koreèn Ce Entombïì 4

1Yi bòŋ enɛ wèe à ba yɛ wèr àmbò ŋgǎa mfà' nè Jisos Krâis. Wèe à ba rìŋ enɛ Nyʉ̀ à m lòr buu ce vi yu à bsʉ̀ti a fa mba wěr mmbò enɛ wèr yɛ'ni bèe. 2Yuu gòr ce masà e ke kòŋ ese ŋwɛ̀ rfà' yi yu enɛ e ba mini nè ye. 3À ka' ba yi àmbò mɛ̀, a ka' ce sa' mɛ̀, kɛ̀ ce sa' wèe ɛ̀, kɛ̀ ce sa' ba kor ɛ̀, m lor ya yu yì anà à yuu ka'. Ka' mɛ̀ foŋ, mɛ̌ ke sa' ya tu ka'. 4Mɛ̀ ke' rìŋ ya yu yuu bebep mo' ce mɛ̀ gèe ka'. Yi ke' ba enɛ àde' m sa' mnsa' embe mɛ̌ tù, teni enɛ mɛ̀ so ka'. Ŋwɛ̀ ce àde' e sa' wa mnsa' teni, a Tatâ. 5Yi ka' ba wa'a, banɛ wèe fa ce sa' bèe tɛ nfè' mnsa' ka' ghɛɛ ka'. Be ba à nòŋ ce Tata Jisòs à kʉti, tɛ e gee buu ce bèe a gèe à tʉ̀'nji vi yɛɛti àwaŋ. E be kè gèe tɛ mkwà'shì bèe mi yɛɛti àwaŋ foŋ. Yu à nòŋ anà ce Nyʉ̀ be kè yòŋshi ŋwɛ̀ wɛɛwɛ àmbò a ba yòŋshi.

6Bfʉr wâ, mɛ̀ làa buu ca nè wèe, a lor Àpolòs ba ya tu nyor àmbò rdùŋshì wa'a, tɛ wèe bo yɛ'ni ese wèr à rcu, àmbò a saŋ mbe Ŋwǎ' Nyʉ̀ fà dì' ŋwɛ̀ mò' efa wěe mʉ bo nàa tu nè ŋwɛ̀ mò', lòr mò' à yuu cicì ka'. 7Ŋwɛ̀ ce e gèe wɛ̀ à ŋwɛ̌ ŋgòr à gèe nda? Yuu ce à tʉr ce wɛ̀ koni ba ese Nyʉ̀ ka', yu kɛ? Nyʉ̀ à ka' fa wɛ̀ buu ca, wɛ̀ ka' ce nàa tu àmbò wɛ̀ tʉr lɛ buu ca ba à yo ŋger wa'a njokɛ? 8Wà' wèe tʉr buu wɛɛwɛ a? Wà' wèe yu ŋgǎa mbàa a? Wèr yu yer yu bkʉʉ ka', wèe à lor wee btu àmbò bkʉʉ. M ce kòŋ mɛnɛ wèe à ba ba bkʉʉ ghup tɛ sèe bo sa' bsìp? 9M ce kwà'shi enɛ dì' ce Nyʉ̀ à fa nè wèr ce wèr yu ŋgǎa ntuu, yu dì' elʉ̀simbùu. Wèr yu àmbò bèe ce mnsa' mi koo wowèe, yi ka' tɛɛ sè'ni enɛ a be yʉ wowèe, a lor wowèe a tɛr àwaŋ tɛ bcìndap Nyʉ̀ ba bèe enjep ŋgòŋ na a bo kaari ce fyɛ'. 10Wèr yu blʉr njo' Jisos Krâis. À ka' ba yi àmbò wèe, wèe à tʉr bfee njep Jisos Krâis. Wèr tʉr ŋger ka', wèe à tʉr ye ŋger. Wèe yu bèe ce bèe a ce yu'ni nè wèe, wèr à ba yer bèe ce bèe a ce jàasi. 11Njè ku bii yaŋ wèr vʉ ba' sè'ni na, ntee-mdip yi ku bii lùu wèr, wèr à ce yar ba bkàkǎ cɛ̀'. E ba à nfè' mò', a lip wèr. Wèr tʉr rla' ka'. 12Wèr ce fà' nè mer mmbo, ka' ce yeŋger. Bèe a ce cɛp wèr, wèr ce làa yer nè wowèe enɛ Nyʉ̀ ghoni wowèe. Bèe a ce fa wèr ŋgɛ' wèr ce kur ntee, ce làa yuu ka. 13Bèe a ce làa buu bbebep nè wèr, wèr ce kʉsi ba blǎa bbòŋboŋ nè wowèe. Bèe a ce lòr wèr àmbò yuu cicì ce ŋgòŋ yi ker ce kòŋ à ryɛ ka'. A ku bii lòr wèr àmbò bkùp buu wa'a, vʉ ba' ntìni.

14M ce saŋ buu ca nè wèe tɛ rìtu yi bo koo wèe ka'. M ce fa wèe ba ncep njobè' wèe yu boo wa ce mɛ̀ kòŋ magòr. 15Ka' bèe ce a ce fa wèe ncep à rcu àmbò bèe Jisos Krǎis a yu gòr wa'a, yè ta ku ba mò'sir. Yu ba mɛ̀ ce mɛ̀ m ba àmbò tàr nè wèe njobè' mɛ̀ m fè'shi Nsuŋ Mbòŋmboŋ nè wèe tɛ wèe ka' kè ba bèe Jisòs Krâis. 16Yi ka' ba wa'a mɛ̀ loo nè wèe enɛ wèe ku gee ba yuu ce m ce gèe. 17A mbùu ce mɛ̀ tuu Timotì enɛ e vʉ yɛ wèe tɛ e bo kèr suŋ wèe àmbò ŋgěe bòŋboŋ ce m ce gèe njobè' m ce dù àmbùu Jisos Krâis. Timotì yu muu wà ce mɛ̀ kòŋ, njobè' wèr ye yu ŋwɛ̀ mò'sir njep Tata Jisos Krâis. E ke fà' nè yi ntee-ŋwɛ̀. Buu ce e be suŋ wèe yu buu ce m ce yɛ'ni à bcor ce vi yu à bdì' wɛɛwɛ. 18Bèe mo' efa wěe mʉ a ce kwà'shi enɛ m be kʉti vʉ̀ yɛ wèe ka', a ce nàa tu. 19Nfè' mʉcàr tɛ m vʉ yɛ wèe, ce Tata Nyʉ̀ à ka' kôŋ, tɛ m bo rìŋ mɛnɛ ŋger Nyʉ̀ yi yu njep ŋgǎa nàatu ca kɛ̀ wowèe a ku ce bu' ba cùu lɛ. 20Kʉʉ Nyʉ̀ yu ba cǔu bu' ka', yu ba ŋger. 21Wèe ce kòŋ ba yì efɛ? Wèe ce kòŋ enɛ m vʉ ba nè ŋgwàa kɛ̀ nè rkòŋnì ba ntee bobor?

Currently Selected:

Ñwaè' Beâe Koreèn Ce Entombïì 4: LNT

Highlight

Copy

Compare