Ñwaè' Beâe Koreèn Ce Entombïì 15
15
1Bfʉr wâ, tɛ m kuushi wèe àmbò Nsuŋ Mbòŋmboŋ ce mɛ̀ m fè'shi nè wèe nà. Nsuŋ ca yu nsuŋ ce wèe à m yu' a byemi, a tɛɛ njo. 2Wèe ka' ku tɛɛ njo tatap, wèe luŋ njo' nsuŋ ca. Yi ka' tɛ ba wa' ka' banɛ wèe à m byemi ba à cicì. 3Yuu tatap ce mɛ̀ m suŋ wèe à m ba yuu ce a m suŋ mɛ̀ foŋ. Nsuŋ anà yu enɛ Jisos Krǎis à m kwe njo' yìsèe buu bbebep àmbò a m saŋ mbe Ŋwǎ' Nyʉ̀ enɛ yi be ba nà. 4E m kwe, a tuŋ ye, mnòŋ vi ka' bǎ' btaar, e fʉʉ efa rkwe àmbò a m saŋ mbe Ŋwǎ' Nyʉ̀. 5E ka' fʉʉ efa rkwe a duŋshi yì nyor nè Sɛfàs, a ker lo a duŋshi yì nyor nè yì bèe ce ncòp-baa-à-rrʉ̀ʉ. 6À ka' kèr ba à nfè' mò', e duŋshì yì nyor nè bèe ce a m ce dù a yě mbùu. Bèe anà a m càa bèe mjèe tâ. Bèe magòr efa wowèe a cu btèe, ka' bèe mo' a kweŋger wa'. 7À ka' kèr ba à nfè' mò' e duŋshì yì nyor nè Jɛ̂ms, a ker lo a duŋshi yì nyor nè yi ŋgǎa ntuu. 8À ka' ba àlʉ̀simbùu e duŋshì yì nyor nè mɛ̀ à njɛ̀ɛ njì ce àde' ŋwɛ̀ à m ba kwa'shi ka'.
9M yu ŋwɛ̌ ŋkɛ' efa mʉ̀ bèe wɛɛwɛ ce a yu ŋgǎa ntuu nè Jisòs. Mɛ̀ ghɛɛte à njɛ̀ɛ ŋwɛ̀ ce àde' bèe a ba lòr mɛ̀ enɛ m yu ŋwɛ̀ ntuu nè Jisòs ka' njobè' mɛ̀ m fa ŋgɛ' nè ŋgǎa côr. 10À ka' ba njobè' Nyʉ̀ à m tʉr ntee bòŋboŋ nè mɛ̀, e gee mɛ̀ ba njɛ̀ɛ ŋwɛ̀ ce m yu sè'ni na. Yuu ce e m gèe nè mɛ̀ anà yi m bʉ à cicì ka' njobè' mɛ̀ m fà' a caa bèe wɛɛwɛ ce a m ba ŋgǎa ntuu nè Jisòs. Yi ke' ba ba enɛ mɛ̀ m fà' nè ya ŋger ka'. À m ba njobè' Nyʉ̀ à m tʉr mɛ̀ à ntee bòŋboŋ, a ka' fa mɛ̀ ŋger anà. 11Yi ka' ba wa'a, kɛ̀ à fè'shi ba mɛ̀ ɛ̀, kɛ̀ à fè'shi ba bèe mo' ce a yu ŋgǎa ntuu nè Jisòs foŋ ɛ̀, wèr wɛɛwɛ ku ce fè'shi ba yuu yi mo'sir kuu Jisos Krâis, à ba yuu ce wèe à byemi foŋ.
12Nsuŋ Mbòŋmboŋ ce wèr ce fè'shi nè bèe yu enɛ Jisòs à m fʉʉ efa rkwe. Wèr à ka' ce fè'shi wa'a, bèe mo' efa wèe a ce làa yap enɛ bèe a be kè fʉʉ efa rkwe ka' njokɛ? 13Yi ka' ba enɛ bèe a be kè fʉʉ efa rkwe ka', banɛ Jisòs Krǎis à m fʉʉ efa rkwe foŋ ka'. 14Yi ba ba enɛ Jisos Krǎis à m fʉʉ efa rkwe ka', yi ba ba enɛ blàa ce wèr ce fè'shi nè wèe na vi yu à cicì, le rbyemì li ba foŋ à cicì. 15Yi ba ba foŋ enɛ wèr à nya' mnde' a kuu Nyʉ̀, njobè' wèr à suŋ bèe enɛ Nyʉ̀ à m fʉr Jisos Krǎis efa rkwe. 16Bèe ce a kweŋger a ka' tɛ kè fʉʉ efa rkwe ka', banɛ Nyʉ̀ à m fʉr Jisos Krǎis efa rkwe foŋ ka'. 17Nyʉ̀ à m ba fʉr Jisos Krǎis efa rkwe ka' yi ba ba enɛ le rbyemì li yu à cicì, yè buu bbebep à ku bii mbe wěe btù. 18Yi ba ba wa'a, yi ba ba enɛ bèe ce a m byemi nè Jisos Krǎis foŋ, a kweŋger nà a bʉ à cicì. 19Sèe à ka' ce lɛ̀ mmir mbendù Jisos Krǎis enɛ e be kù jà' sèe ba njep ŋgòŋ na cà'cà', banɛ sèe yu bèe ce a ba koosimnse nè sèe càa bèe enjep ŋgòŋ na wɛɛwɛ.
20Yi yu mini enɛ Jisos Krǎis à m fʉʉ efa rkwe. Efa mʉ̀ bèe ce a m kweŋger, a ye ce e m kɛ̀' a fʉʉ efa rkwe. 21Rkwe li m vʉ̀ njep ŋgòŋ na njo' yuu ce ŋwɛ̀ mò'sir à m gèe. Bèe a be kè fʉʉ efa rkwe foŋ njo' yuu ce ŋwɛ̀ mò'sir à m gèe. 22Yi yu enɛ bèe wɛɛwɛ a ce kweŋger njobè' a yu ràrà Adàm, a ba enɛ Nyʉ̀ be kè fʉr bèe ce a yu a Jisòs wèe àbee efa rkwe. 23Ŋwɛ̀ wɛɛwɛ be kù fʉʉ efa rkwe à nfè' ce Nyʉ̀ à lɛ. Jisos Krǎis a ŋwɛ̀ ce e m fʉʉ efa rkwe entombì. Be kè ba à nfè' ce Jisos Krǎis à kʉti nà, tɛ yì bèe a fʉʉ efa rkwe. 24Yì anà yi mì wɛɛ, tɛ ŋgòŋ yi mî, tɛ Jisos Krǎis so mnyʉ̌mkà' ker ba bèe wɛɛwɛ ce a ce sa', lòr yi kʉʉ fa nè Nyʉ̀ ce e yu yì Tâ. 25Tɛ Jisos Krǎis ka' kè fa yi kʉʉ nè yì Tâ, e be kù sa' dù bà' à nfè' ce Nyʉ̀ be so bèe ce a bàa ye, lɛ̀ wowèe wɛɛwɛ njep yě tìi. 26Ŋwɛ̀ bbàa ce elʉ̀simbùu ce Nyʉ̀ be kè so, yu rkwe. 27A saŋ mbe Ŋwǎ' Nyʉ̀ enɛ̂, “Nyʉ̀ à lɛ̀ buu wɛɛwɛ njep yě tìi.” Ka' buu wɛɛwɛ be kè ba njeptii Jisos Krǎis wa'a, yi yu rara enɛ Nyʉ̀ be kè ba njeptii Jisos Krǎis foŋ ka' njobè' yu ba ye ce e gèe buu ca wɛɛwɛ à ba njeptii Jisòs. 28Buu ca wɛɛwɛ e ba njep yě tìi tɛ ye Jisos Krǎis ce e yu Muu Nyʉ̀ lɛ yì nyor njeptii Nyʉ̀, tɛ Nyʉ̀ ce e lɛ̀ buu wɛɛwɛ njeptii Jisos Krǎis bo tʉr ŋger mbendù buu wɛɛwɛ.
29Yi ba ba mini enɛ bèe ce a kweŋger a be fʉʉ efa rkwe ka', a ka' ce bàptir bèe àtu bèe ce a m kweŋger njokɛ? 30Yi ka' tɛ bà ba enɛ bèe ce a kweŋger a be fʉʉ efa rkwe ka', wèr à ba kù ce yɛ ŋgɛ' nfè' sìp njokɛ? 31Bfʉr wâ, m ku ba ŋwɛ̀ rkwe à nfè' wɛɛwɛ. Mɛ̀ làa wa'a njo' nàatu ce m ce nàa nè wèe njobè' sèe yu àbee sèe Jisos Krǎis ce e yu yìsèe Tatâ. 32Mɛ̀ m ba à rla' Ɛfɛsòs, běe àfo a fa mɛ̀ ŋgɛ' sê. Bèe a m lò beeŋger a vʉ mbe mɛ̌ ndù, a ce gèe ŋgèe àmbò mnyàa wa'a. Yi m ba ba enɛ bèe a be fʉʉ efa rkwe ka', yà sɛ' à ba ba kɛ? Yi ba ba wa'a, yi ba ba bòŋboŋ enɛ m laa nè wèe enɛ̂, “Sèe yeŋger ce noŋger njobè' ku bɛti nfè' mʉcàr tɛ sèe kweŋger.”
33Fa mà'shi nè tɛ ŋwɛ̀ mò' bo' wèe ka'. Wèe ka' ce kar wèe bèe ce a ce gèe ŋgěe bebep, wèe ku lo gee ŋgěe bebep foŋ. 34Borni mkwà'shì blʉr, borni efa rgèe buu bbebep. Mɛ̀ yɛ mɛnɛ bèe mo' efa wèe a rìŋ Nyʉ̀ ka' koo mʉcàr. M ce làa wa' tɛ rìtu yi bo koo wèe.
35Àde' ŋwɛ̀ mò' bipshì enɛ̂, “Àde' bèe ce a kweŋger a fʉʉ efa rkwe à njɛ̌ɛ kɛ? Wowèe a be fʉʉ efa rkwe ba nè njɛ̀ɛ nyor ce e yu à njɛ̌ɛ kɛ?” 36Ŋwɛ̀ ce e ka' bipshi wa'a, banɛ ŋgàŋ yu lʉr. Mbò wɛ̀ rìŋ enɛ a ke byè ŋgʉ̀ yuu njep nshè e bʉtè wɛɛ ka' fʉʉ a? 37E ba à nfè' ce yuu ce wɛ̀ byè anà yi fʉʉ, a ku', yi ba jɛɛ efa ŋgʉ̀ yuu ce wɛ̀ byè, kɛ̀ yu ŋgʉ̀ kwaa ɛ̀, kɛ̀ ŋgʉ̀ kɛ ɛ̀. 38Nyʉ̀ e lò gee yuu anà yi tʉr njɛ̀ɛ nyor ce e kòŋ enɛ yi ba tʉr. E lò gee buu jɛɛ jɛ̀ɛ jɛɛ vi tʉr nyor jɛɛ jɛ̀ɛ jɛɛ. 39Buu ce vi tʉr myòŋ vi tʉr nyor njɛ̀ɛ mò'sir ka'. Nyor ŋwɛ̀ yu jɛɛ efa yì nyàa, nyor siŋ à ba jɛɛ efa yì nca. 40Nyor buu embe bùu yu jɛɛ efa nyor buu enjep ŋgòŋ. Rbòŋ buu embe bùu li yu jɛɛ efa rbòŋ buu enjep ŋgòŋ. 41Nyʉ̀ ce e ke saŋ, tʉr rbòŋ li, ŋwɛɛ yi tʉr rbòŋ li, mkàŋsì mi tʉr rbòŋ lap, lap rbòŋ anà li ba jɛɛ jɛ̀ɛ jɛɛ.
42Yi ku ba foŋ enɛ nyor ce bèe a be kè fʉʉ àgho efa rkwe be kè ba jɛɛ. A ke tuŋ ŋwɛ̀, nyor bʉtè. E fʉʉ efa rkwe, yì nyor anà ker bʉte ka'. 43A ke tuŋ ŋwɛ̀, nyor ce kè' mbòŋmboŋ ka', tʉr ŋger ka'. E fʉʉ efa rkwe, yì nyor ba mbòŋmboŋ, tʉr ŋger. 44E ke ba à nfè' ce a ce tuŋ ŋwɛ̀, e tʉr ba njɛ̀ɛ nyor ce sèe tʉr na. E ba à nfè' ce e fʉʉ efa rkwe e tʉr ba nyor ce à yʉ'. Nyor mò' ka' ba ce e yu nyor ce sèe tʉr na, banɛ nyor mò' ku ba ce e yu nyor ce à yʉ'. 45A saŋ mbe Ŋwǎ' Nyʉ̀ enɛ̂, “Ŋwɛ̀ entombì ce a m too enɛ Adàm nà à m bèeŋger à yuu tèe.” Adàm embenjì ce yu Adàm elʉ̀simbùu yu yi ba yʉ' ce yi ke fa bèe ryòŋ. 46Nyor ce à yʉ' a yì ce e ke ba entòmbì ka', yì ce e ke ba entombì e ke ba nyor ce sèe tʉr na tɛ nyor ce à yʉ' ka' ba. 47Nyʉ̀ à m boo ŋwɛ̀ entombì ba nè nshe, ŋwɛ̀ embenjì à vʉ yi ba embe bùu. 48Bèe enjep ŋgòŋ wɛɛwɛ a ku ba àmbò ŋwɛ̀ entombì ce a m boo nè nshe, bèe embe bùu a ku ba àmbò ŋwɛ̀ ce e m sùu embe bùu. 49Sèe ce sèe yu sè'ni àmbò ŋwɛ̀ ce Nyʉ̀ à m boo nè nshe, sèe be kè ba àmbò ŋwɛ̀ ce e m sùu embe bùu à nòŋ mo'.
50Bfʉr wâ, m ce suŋ wèe enɛ àde' njɛ̀ɛ nyor ce sèe tʉr na niŋ mbe dǐ' kʉʉ Nyʉ̀ ka'. Àde' yuu ce yi ke kwe yi ye bti' yuu ce yi ke cu nfesè ka'. 51Yɛ̂, m be suŋ wèe yuu ce wèe à m be riŋ ka'. Sèe wɛɛwɛ be kè kweŋger ka'. Sèe wɛɛwɛ be kè kupse kupse. 52Sèe be kè kupse nfè' mò'sir. Tɛ ŋwɛ̀ ka' kè bʉ̀r rlir sèe à kupse nè wɛɛ. Be ba à nfè' elʉ̀simbùu tɛ rsòŋ li lâa, tɛ buu ca koni. Li be kè làa, tɛ bèe ce a m kweŋger a fʉʉ efa rkwe nè njɛ̀ɛ nyor ce àtà e ke kwe ka', tɛ sèe ce a cu btèe, kupse. 53Visèe mnyor ce vi ke kwe bʉte na, vi be kè kù kʉti ba a njɛ̀ɛ mnyor ce vi ke kwe ka', bʉte ka'. 54Be kè ba à nfè' ce visèe mnyor vi kʉti à njɛ̌ɛ wa'a, tɛ yuu ce a m saŋ mbe Ŋwǎ' Nyʉ̀ enɛ̂, “A so rkwe” nà, yi ghɛɛte njo.
55“À wɛ̌ rkwê, yo ŋger yi yû?
À wɛ̌ rkwê, yò nsìi yû?”
56Nsìi rkwe yu buu bbebep, ŋger buu bbebep à ba mncir. 57Sèe yoŋshi Tata Nyʉ̀ ce e ke fa sèe ŋger à rso buu bbebep, ker ba rkwe, njì enjep Jisos Krâis. 58Bfʉr wa ce mɛ̀ kòŋ sê, yi ka' ba wa'a, tɛɛ nè tatap, ke' ce ci'ti ka', ce fa' nè Tata Jisos Krǎis nè ye ntee-ŋwɛ̀ à nfè' wɛɛwɛ, njobè' wèe rìŋ enɛ rfà' ce wèe ce gèe nè Tata Jisos Krǎis li be kè bʉ à cicì ka'.
Currently Selected:
Ñwaè' Beâe Koreèn Ce Entombïì 15: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
