Ñwaè' Beâe Koreèn Ce Entombïì 14

1Wèe lɛ rkòŋnì kùntombì nè buu wɛɛwɛ, lɛ ntee foŋ a bfee ce Nyʉ̀ à fa nè bèe, laŋlaŋ bfee ce e fa nè bèe à rcep yi ntuu. 2Ŋwɛ̀ ka' ce làa njɛ̀ɛ li ce e m be yɛ'ni ka', banɛ e ce làa ba nè bèe ka', e ce làa ba nè Nyʉ̀ njobè' àde' ŋwɛ̀ mò' yu' yuu e ce làa ka'. E ce làa buu ce à bsʉ̀ti à ŋger Yʉ' Nyʉ̀. 3Ŋwɛ̀ e ke cep ntuu Nyʉ̀, yi ja' bèe, fa bèe ŋger, ker gee mntee bèe vi fʉtè. 4Ŋwɛ̀ e ke làa li ce e m be yɛ'ni ka', ja' ba yi tu. Ŋwɛ̀ e ke cep ntuu Nyʉ̀, ja' ŋgǎa cor wɛɛwɛ. 5Mɛ̌ kòŋ mɛnɛ wèe wɛɛwɛ laa njɛ̀ɛ bli ce wèe à m be yɛ'ni ka'. Ka' yi yu wa'a, yi yu àndèe enɛ wèe cep ntuu Nyʉ̀, nè ce enɛ wèe ku ce laa ba li ce wèe à m be yɛ'ni ka'. Ŋwɛ̀ ce e ce cep ntuu Nyʉ̀ à càa ŋwɛ̀ ce e ce làa li ce e m be yɛ'ni ka'. Ka' ba enɛ ŋwɛ̀ mò' ce beesi buu ce ŋwɛ̀ anà à làa à li ce e m be yɛ'ni ka' na, vi ka' ja' côr. 6Bfʉr wâ, m ka' vʉ à rcà'ni wèe, laa nè wèe ba à li ce mɛ̀ m be yɛ'ni ka', wà' àde' yì anà yi ja' wèe a? Ka' ba enɛ mɛ̀ vʉ̀ a suŋ wèe yuu mo' fi, kɛ̀ a gee buu Nyʉ̀ vi ba rara nè wèe ɛ̀, kɛ̀ a cep ntuu Nyʉ̀ nè wèe, kɛ̀ a yɛ'ni wèe ɛ̀, yì anà yi be jà' wèe. 7Kwà'shi ka nè àmbò ndoŋ ce a ke fyɛp, ker ba rluŋ ce a ke bu', ce mi tʉr myòŋ ka'. Ŋwɛ̀ ka' fyɛp ndoŋ à nji, kɛ̀ bu' rluŋ à nji ɛ̀, àde' ŋwɛ̀ riŋ yuu ce e fyɛp, kɛ̀ yuu ce e bu' à njɛ̌ɛ kɛ? 8Ŋwɛ̀ ka' fyɛp rsòŋ bìr à nji, wà' àde' bèe a ba'shì nyor du bìr a? 9Yi yu nè wèe wa' foŋ. Wèe à ka' ce làa nè bèe ba à li ce a rìŋ ka', àde' wowèe a yu' yuu ce wèe ce làa à njɛ̌ɛ kɛ? Yi ka' ba wa'a, banɛ wèe ce bʉsi yè mbɛp à cicì. 10Bli vi yu njep ŋgòŋ na jɛɛ jɛ̀ɛ jɛɛ, li mò' à ke' ba ce ŋwɛ̀ buu efa ryu' ka'. 11M ka' tɛ yu' li ce ŋwɛ̀ ce làa ka', banɛ ŋgàŋ yu ŋwɛ̀ nfuu nè mɛ̀, mɛ mɛ̀ à ba ŋwɛ̀ nfuu nè ye. 12A mbò à rlàa bli ce wèe à be yɛ'ni ka', yi ku ba wa'a. Banɛ wèe à ka' ce kòŋ enɛ Yʉ' Nyʉ̀ yi fa wèe bfee à rfà' nè Nyʉ̀, wèe koŋ gòr ba njɛ̀ɛ bfee ce àde' vi gee tɛ cor du kùntombì.

13Banɛ ŋwɛ̀ ka' ce làa buu nè bèe à njɛ̀ɛ li ce e m be yɛ'ni ka', ŋgàŋ loo enɛ Yʉ' Nyʉ̀ yi fa ye bfee à rbèesi buu anà à li ce àde' bèe a yu'. 14Ŋwɛ̀ ka' ce loo nè Nyʉ̀ à njɛ̀ɛ li anà banɛ ŋgàŋ ku ce loo ba enjep ntee, a ke' riŋ yuu ce e ce loo ka'. 15Yuu ce àde' ŋwɛ̀ gee yi yu enɛ kɛ? Yi yu enɛ ŋwɛ̀ loo nè Nyʉ̀ à li ce e m be yɛ'ni ka', ker loo à li ce e rìŋ, ŋwɛ̀ yop nè Nyʉ̀ à li ce e m be yɛ'ni ka', ker yop nè ye à li ce e rìŋ. 16Ŋwɛ̀ ka' ce loo ce yòŋshi Nyʉ̀ à njɛ̀ɛ li ce e m be yɛ'ni ka', àde' ŋwɛ̀ ce e rìŋ buu Nyʉ̀ bòŋboŋ ka' gee ekɛ ka' byemi à yuu ce e làa, laa enɛ̂, “Yi yu wa'a”, ce àmbò e ce yu' yuu ce ŋgàŋ à làa ka'. 17Wɛ̀ ka' ce loo à njɛ̀ɛ li anà, ce yòŋshi Nyʉ̀ àmbò kɛ, àde' yì anà yi ja' ŋwɛ̀ mò' ka'. 18M ce yòŋshi Nyʉ̀ njobè' m ce làa bli ce mɛ̀ m be yɛ'ni ka', a caa wèe wɛɛwɛ. 19Ka' yi yu wa'a, m ka' ba niŋ côr, m koŋ mɛnɛ m laa mbʉ̀ làa ta à li ce bèe a rìŋ, tɛ m bo yɛ'ni bèe, nè ce enɛ m laa mmbʉ̀ làa ncʉ̀kì à li ce àde' ŋwɛ̀ yu' ka'.

20Bfʉr wâ, wèe fa ce kwà'shi buu àmbò wèe yu lɛ bbonte wa' ka'. Wèe ba àmbò bbonte ba à njì ce wèe be ce kwà'shi buu bbebep ka'. Kwà'shi nè buu ba àmbò bleebèe. 21A saŋ mbe Ŋwǎ' Nyʉ̀ enɛ̂,

“Tata Nyʉ̀ à m làa enɛ̂, ‘M be tuusi bèe ce a ce làa li mò' jɛɛ,

tɛ a du suŋ wa blàa nè yà bèe.

Ka' m be gèe wa'a,

yà bèe ca a be yu' yuu ce mɛ̀ làa nè wowèe ka'.’ ”

22Yi yu enɛ à rlàa li mò' ce ŋwɛ̀ à m be yɛ'ni ka', yu ba ncòo nè bèe ce a byemi nè ye ka', ke' ba ba enɛ yu ncòo ba nè bèe ce a byemi wɛɛ ka'. À rcep ntuu Nyʉ̀ yu ncòo ba nè bèe ce a byemi nè ye, ke' ba enɛ yu ncòo ba nè bèe ce a byemi nè ye ka' ka'. 23Wèe ce kwà'shi enɛ àde' yi ba à njɛ̌ɛ kɛ ce bèe a ka' niŋ côr, ŋwɛ̀ wɛɛwɛ ku ce làa ba à li ce e m be yɛ'ni ka'? Bèe mo' ce a be riŋ buu Nyʉ̀ bòŋboŋ ka', ker ba bèe ce a be byemi ka', a ka' niŋ, àmbò a be kwà'shi yap enɛ wèe ce baa baa a? 24Bèe a ka' niŋ côr, ŋwɛ̀ wɛɛwɛ ce cep ntuu Nyʉ̀, njɛ̀ɛ bèe ca a ka' niŋ, yuu ce wowèe a yu' yi be gèe tɛ wowèe a yɛ yàp buu bbebep, kèr gèe tɛ yap ntee ye sa' wowèe, 25kèr gèe tɛ buu ce wowèe a m ce sʉ̀ti njep ntee nà vi yɛɛti àwaŋ, tɛ wowèe a gʉ'shi, yòŋshi Nyʉ̀, làa nè yap cùu enɛ̂, “Nyʉ̀ yu a wěe mʉ nè mini-ŋwɛ̀.”

26Bfʉr wâ, yuu ce m ce làa àlʉ̀simbùu du kuu buu ce mɛ̀ suŋ na yi yu ba enɛ wèe ka' niŋ côr, ŋwɛ̀ wɛɛwɛ tami nyor à rgèe yuu ce Nyʉ̀ à fa ye bfee à rgèe. Ŋwɛ̀ ce e rìŋ à ryòp yɛɛ, e yôp, ŋwɛ̀ ce e rìŋ à ryɛ'ni bèe blǎa Nyʉ̀, e yɛ'nì, ŋwɛ̀ ce e rìŋ à rsuŋ bèe buu ce Nyʉ̀ à gèe vi ba brara nè ye, e sûŋ, ŋwɛ̀ ce e rìŋ à rlàa nè bèe à njɛ̀ɛ li ce e m be yɛ'ni ka', e lâa, ŋwɛ̀ ce e rìŋ à rbèesi blàa ce ŋwɛ̀ ca à làa à li anà, e beesî. Sèe gee buu ca wɛɛwɛ ba à njɛ̀ɛ njì ce àde' buu anà ja' ŋgǎa côr. 27Wèe ka' niŋ côr, bèe ce a rìŋ à rlàa li ce wowèe a m be yɛ'ni ka', a ka' ba a wěe mʉ àŋgoo sê, wowèe a fa làa bsìp ka'. Bèe a mmbaa kɛ̀ bèe a mntaar ɛ̀, efa wowèe a ka' lâa, yi ba yɛɛnì. Mò' e làa mìsi wɛɛ, mò' ka' lâa, ker ba enɛ a ka' ce làa, ŋwɛ̀ mò' beesi blàa anà à li ce àde' bèe a yu'. 28Ŋwɛ̀ ka' tɛ ba ce àde' e beesì ka, banɛ bèe anà a fa làa mbe cor ka'. Wowèe a ku ce laa nè Nyʉ̀ ba enjep ntee. 29bèe a mmbaa kɛ̀ bèe a mntaar ɛ̀, a ka' suŋ bèe buu ce Nyʉ̀ à gèe wowèe a rîŋ, banɛ bɛr bèe a fyɛ' ka enɛ buu wowèe a làa anà vi yu mini lɛ. 30Nyʉ̀ ka' ker gee ŋwɛ̀ mò' ye ye riŋ yuu mo' ce àde' e suŋ bèe, banɛ ŋwɛ̀ ce e ba ce làa nà fa ye njì foŋ tɛ e lâa. 31Wèe ka' ce gèe wa'a banɛ ŋwɛ̀ wɛɛwɛ be tʉr fɛŋ à rlàa à nfè' yì ka'. Wèe ka' ce gèe wa'a banɛ bèe a be rìŋ buu gòr sê, kèr tʉr ntee à buu Nyʉ̀. 32Bèe ce a ke suŋ bèe buu ce Nyʉ̀ à gèe wowèe à rîŋ, a ke tʉr ŋger à rfà' nè bfee ce Nyʉ̀ à fa wowèe anà bòŋboŋ. 33-34Nyʉ̀ e ke fa wowèe njɛ̀ɛ ŋger ca njobè' e kòŋ bjep ka'. E kòŋ bèe ce a tʉr cumʉnyaŋ. Àmbò yi yu à bcor wɛɛwɛ, banɛ wee bbyèŋge a ka' niŋ côr, a fa làa yuu ka', njobè' ncir Nyʉ̀ yi byemi enɛ wowèe a ka' niŋ côr, a lor yàp nyor njep nshè àmbò ncir Nyʉ̀ yi làa. 35Wowèe a ka' ce kòŋ à rrìŋ yuu mo', wowèe a bipshì nè bduu wap à mlà'. Yu yuu ncoosi tu nè bbyèŋge à rlàa yuu mbe mʉ̀ côr. 36Wèe ka' kani, banɛ wèe à ba rìŋ enɛ blǎa Nyʉ̀ vi ku kɛ' ba nè wèe kɛ̀ mi nè wèe ka'. 37Ŋwɛ̀ ce e kwà'shi enɛ e tʉr bfee à rsuŋ bèe buu ce Nyʉ̀ à gèe e rîŋ, a ker ce kwà'shi enɛ Yʉ' Nyʉ̀ yi fa ye bfee à rgèe buu mo' foŋ, à ba rìŋ enɛ buu ce mɛ̀ suŋ nè wèe na yu buu ce à làa Tata Jisòs enɛ sèe gêe. 38Ŋwɛ̀ ka' kani yuu ce mɛ̀ làa na wèe kanì vi blàa foŋ. 39Bfʉr wâ, yi ka' ba wa'a, m ce làa nè wèe enɛ wèe à ba lɛ̀ ntee gòr ba à rsuŋ bèe buu ce Nyʉ̀ à gèe wèe à rîŋ. Yi ka' ba ne wa'a, wèe fa kani enɛ bèe mo' efa wěe mʉ ce a rìŋ à rlàa à li ce a m be yɛ'ni ka' nà a fa làa ka'. 40Wèe gee buu wɛɛwɛ à njǐ yɛɛnì.

Currently Selected:

Ñwaè' Beâe Koreèn Ce Entombïì 14: LNT

Highlight

Copy

Compare