Ñwaè' Beâe Koreèn Ce Entombïì 13

1Ŋwɛ̀ ka' riŋ à rlàa bli enjep ŋgòŋ na, ker laa bli ce bcìndap Nyʉ̀ a ke làa, ke' koŋ bèe ka', banɛ ŋgàŋ ku ba àmbò mbee ce e ke làa ŋooŋ-ŋooŋ nà. 2Ŋwɛ̀ ka' tʉr ŋger à rcep ntuu Nyʉ̀, ker tʉr ŋger à rrìŋ buu Nyʉ̀ ce vi yu à bsʉ̀ti, ker riŋ buu wɛɛwɛ, ker byemi nè Nyʉ̀ btatap sê, ce àde' e lâa, rtùu li co'tì embe dì' li tɛɛ, du tɛɛ à dǐ' jɛɛ, e ka' tɛ kòŋ bèe ka', banɛ e ku ba ŋwɛ̀ cicì. 3Ŋwɛ̀ ka' lor yì buu wɛɛwɛ gapshi nè bèe, ker ma'shi enɛ bèe a koo ye too nè mor, e ka' tɛ kòŋ bèe ka', sɛ' mò' ba njo ka'. 4Ŋwɛ̀ ce e kòŋ bèe e ke kur ntee, ker ce gèe ŋgěe bòŋboŋ. Ŋwɛ̀ anà e ke ba ŋwɛ̀ ŋko'ndoŋ ka'. E ke yu' nyor kɛ̀ naa tu ka'. 5Ŋwɛ̀ anà e ke gèe ŋgěe bebep nè bèe ka', e ke weti ka', e ke cɛpŋger ka', e ke lɛ̀ yuu bebep njep ntee ka'. 6Ŋwɛ̀ anà e ke yu' rbòŋ à yuu bbebep ka', e ke yu' rbòŋ ba à yuu ce yi yu mini. 7Àde' yuu mo' yi caa rkòŋnì ka'. Rkòŋnì li ke yɛ fàa ŋwɛ̀ ka', li ke kwà'shi bòŋboŋ àmbò bèe mo', ker tɛɛ tatap à nfè' wɛɛwɛ. 8Bfee ce Nyʉ̀ à fa nè bèe mo' à rcep yi ntuu vi be kè càa, tɛ bfee ce e fa nè bèe mo' à rlàa bli ce a m be yɛ'ni ka', vi mî, tɛ bfee ce e fa nè bèe mo' à rrìŋ buu, vi ker ba ka'. À ka' ba yi àmbò rkòŋnì, àde' li ke mi ka'. 9Sèe rìŋ buu à bbɛbɛ', a ce cep ntuu Nyʉ̀ à bbɛbɛ'. 10Be ba à nfè' ce Nyʉ̀ à gèe sèe à riŋ buu wɛɛwɛ tɛ buu ca mî.

11À m ba à nfè' mɛ̀ m ba munte, mɛ̀ m ce làa buu àmbò munte, a ce kwà'shi buu àmbò munte, a riŋ buu àmbò munte, mɛ̀ ka' ba nleeŋwɛ̀, a borni buu bbonte. 12Sèe ce yɛ buu sè'ni na là'rì là'rì. Be kè ba à nfè' mò' tɛ sèe yɛ vi bòŋboŋ. Sèe rìŋ buu à bbɛbɛ' sè'ni na, be ba à nfè' anà, tɛ sèe riŋ buu wɛɛwɛ àmbò Nyʉ̀ ye ye à rìŋ sèe nà. 13Buu vi yǔ btaar ce vi be cu. Mo' yu rbyemì, mo' à ba rkè' ce sèe ce kè' enɛ Nyʉ̀ gee yuu ce e m kà', mo' à ba rkòŋnì. Yuu gòr efa mʉ̀ buu ca yu rkòŋnì.

Currently Selected:

Ñwaè' Beâe Koreèn Ce Entombïì 13: LNT

Highlight

Copy

Compare