Ñwaè' Beâe Koreèn Ce Entombïì 12

1Bfʉr wâ, m ce kòŋ mɛnɛ wèe riŋ buu mò' kuu bfee ce Yʉ' Nyʉ̀ yi ke fa nè bèe. 2À m ba à nfè' wèe à m ku bii à tʉ̀'nji, Satàn à m ce bo' wèe à mnduunjì jɛɛ jɛ̀ɛ jɛɛ, a gee wèe à ce cà'ni mnyʉ̀ enjep ŋgòŋ na ce vi ke làa ka'. 3Banɛ m ce kòŋ enɛ wèe riŋ enɛ Yʉ' Nyʉ̀ yi ka' ba njep ŋwɛ̀, àde' ŋgàŋ laa enɛ̂, “Ndòo co' Jisòs” ka'. Yʉ' Nyʉ̀ yi ka' tɛ ba njep ŋwɛ̀ ka', àde' ŋgàŋ laa enɛ̂, “Jisòs yu Tatâ” ka'.

4Yʉ' Nyʉ̀ yi ke fa bèe bfee jɛɛ jɛ̀ɛ jɛɛ à rgèe buu. Ka' yi yu wa'a, Yʉ' anà yi ku ba yi mo'sir. 5Mfà' ce bèe a ke gèe mi ku ba jɛɛ jɛ̀ɛ jɛɛ foŋ. Ka' yi yu wa'a, Tata Jisòs ce a ce fà' nè ye ku ba mò'sir. 6Mfà' mi yu jɛɛ jɛ̀ɛ jɛɛ ce bèe a ke gèe, à ku ba Nyʉ̀ mò'sir ce e fa bèe wɛɛwɛ bfee à rgèe mfà' anà. 7Bfee Yʉ' Nyʉ̀ yi ke yɛɛti njep bèe à mnduunjì jɛɛ jɛ̀ɛ jɛɛ tɛ ŋwɛ̀ bo lòr bfee anà jà' bèe Nyʉ̀ àgho. 8Yʉ' Nyʉ̀ yi ke fa bèe mo' bfee à rfa bèe ncep mbòŋmboŋ, ker fa bèe mo' bfee à rfè'shi blǎa Nyʉ̀ à njɛ̀ɛ njì ce àde' bèe a riŋ Nyʉ̀ bòŋboŋ. Yʉ' ca yi ku ba yi mo'sir. 9Yi ke fa bèe mo' bfee à rlɛ̀ ntee à buu Nyʉ̀, ker fa bèe mo' bfee à rgèe ŋgǎa byaŋ a ke'se. Ku ba Yʉ' yi mo'sir ce yi gèe buu ca wɛɛwɛ. 10Yi ke fa bèe mo' bfee à rgèe buu bghagha', ker fa bèe mo' bfee à rcep ntuu Nyʉ̀. Yi ke fa bèe mo' bfee à rrìŋ buu ce vi lò ese Yʉ' Nyʉ̀, ker riŋ vì ce vi lò ese Yʉ' Nyʉ̀ ka'. Yi ke fa bèe mo' bfee à rlàa bli ce a m be yɛ'ni ka', ker fa bèe mo' bfee à rsuŋ bèe buu ce a làa à bli anà. 11Yʉ' Nyʉ̀ anà yi ke fa bèe ŋger à rgèe buu ca wɛɛwɛ. Yi ke fa ŋwɛ̀ wɛɛwɛ yuu ce yi ce kòŋ à rfa.

12Yi ku ba àmbò nyor e ke ba mò'sir, mŋgʉ̀' nyor vi ku ba jɛɛ jɛ̀ɛ jɛɛ nà. Mŋgʉ̀' nyor ca vi ke tarshi nyor àbee, gee nyor mò'sir. Jisos Krǎis ku ba wa' foŋ. 13Ka' bèe mo' efa sèe a yu Jûs, bèe mo' a ba bèe enje jɛɛ, bèe mo' a ba bkwàa, bèe mo' a ba bkwàa ka' wa'a, sèe wɛɛwɛ à m kʉti ŋwɛ̀ mò'sir à nfè' ce a m bàptir sèe nè Yʉ' Nyʉ̀. Ku ba Yʉ' Nyʉ̀ ca ce Nyʉ̀ à m fa nè sèe wɛɛwɛ enɛ yi niŋ njep visěe mntee.

14Nyor e ke tʉr ŋgʉ̀' nyor mò'sir ka', e ke tʉr mŋgʉ̀' nyor jɛɛ jɛ̀ɛ jɛɛ. 15Kùu yi ka' laa enɛ̂, “M yu ŋgʉ̀' mò' efa nyor ka, njobè' m yu bo ka',” wà' banɛ kùu yi buu efa rba ŋgʉ̀' mò' efa nyor a? 16Tù' yi ka' laa enɛ̂, “M yu ŋgʉ̀' mò' efa nyor ka', njobè' m yu rlir ka',” wà' àde' blàa anà vi gee tù' yi buu efa rba ŋgʉ̀' mò' efa nyor a? 17Nyor à m ba ku ba rlir, ŋwɛ̀ à m ba ce yu' buu ba nè kɛ? Nyor à m ba ku ba tù', ŋwɛ̀ à m ba ce yu' rʉ̀ʉ yuu ba nè kɛ? 18Gee ne wa'a, yi yu enɛ Nyʉ̀ à m gèe mŋgʉ̀' nyor jɛɛ jɛ̀ɛ jɛɛ vi ce fà' buu jɛɛ jɛ̀ɛ jɛɛ àmbò e m kòŋ. 19Nyor wɛɛwɛ à m ba ku ba ŋgʉ̀' nyor mò'sir, yì anà à ba ba nyor ka'. 20Yi yu enɛ mŋgʉ̀' nyor vi yu jɛɛ jɛ̀ɛ jɛɛ wa'a, nyor à ku ba mò'sir.

21Banɛ àde' rlir li laa nè bo enɛ̂, “M tʉr yuu mo' à rgèe nè wɛ̀ ka'” ka'. Àde' tu foŋ yi laa nè mkùu enɛ̂, “M tʉr yuu mo' à rgèe nè wèe ka'” ka'. 22Mŋgʉ̀' nyor mo' ce sèe ce yɛ yisèe enɛ vi tʉr mfà' ka' nà, vi ka' buu, sèe yu' rbòŋ ka'. 23Mŋgʉ̀' nyor ce sèe ce kwà'shi enɛ vi ku ba à cicì nà, a vì ce see ke gɛ' àgho sê. Mŋgʉ̀' nyor ce see ke kòŋ enɛ vi yɛɛti àwaŋ ka', a vì ce see ke tɛ'shi bòŋboŋ. 24See ce tɛ'shi wa'a, ma'shi mŋgʉ̀' nyor bbòŋboŋ vi yɛɛtì àwaŋ. Yi yu wa'a njobè' Nyʉ̀ à m gèe visèe mnyor à njɛ̌ɛ enɛ mŋgʉ̀' nyor ce vi ke yɛɛti à vǐ bcicì nà, vi ba vì ce a be gɛ' àgho sê. 25Àmbò yi yu wa'a, banɛ mŋgʉ̀' nyor wɛɛwɛ vi ku ce fa' àbee njobè' mŋgʉ̀' nyor wɛɛwɛ ku tʉr yuu à rgèe nè ŋgʉ̀' nyor mò'. 26Ŋgʉ̀' nyor mò' ka' ce yɛ ŋgɛ', banɛ mŋgʉ̀' nyor wɛɛwɛ vi be yɛ ŋgɛ'. Ŋgʉ̀' nyor mò' ka' ce yu' rbòŋ banɛ mŋgʉ̀' nyor wɛɛwɛ vi be yu' rbòŋ.

27Wèe yu nyor Jisos Krâis, ŋwɛ̀ wɛɛwɛ à ba ŋgʉ̀' mò' efa nyor anà. 28Nyʉ̀ à fa bèe embe cor bfee jɛɛ jɛ̀ɛ jɛɛ enɛ a gee rfà' àgho. Rfà' entombì ce e fa nè bèe mo' li yu enɛ wowèe a ba ŋgǎa ntuu Jisos Krâis, lì embenjì li ba enɛ bèe mo' a ba ŋgǎa ncep ntuu Nyʉ̀. Lì embenjì mo li ba enɛ bèe mo' a yɛ'ni vi blàa nè bèe, rmo' li ba enɛ bèe mo' a gee buu bbɛ̀ɛ, rmo' li ba enɛ bèe mo' a gee tɛ ŋgǎa byaŋ a ke'se, rmo' li ba enɛ bèe mo' a ja' bèe, rmo' li ba enɛ bèe mo' a sa' bèe, rmo' li ba enɛ bèe mo' a laa bli ce wowèe a m be yɛ'ni ka'. 29Wà' bèe wɛɛwɛ a yu ŋgǎa ntuu Jisòs a? Wà' bèe wɛɛwɛ a yu ŋgǎa ncep ntuu Nyʉ̀ a? Wà' bèe wɛɛwɛ a yu ŋgǎa ryɛ'nì a? Wà' bèe wɛɛwɛ a yu ŋgǎa rgèe buu bghagha' a? 30Wà' Nyʉ̀ à fa bèe wɛɛwɛ bfee à rgèe tɛ ŋgǎa byaŋ a ke'se a? Wà' bèe wɛɛwɛ a ke làa bli ce a be yɛ'ni ka' a? Wà' bèe wɛɛwɛ a rìŋ à rsuŋ bèe buu ce bèe mo' a làa à bli ce a m be yɛ'ni ka' a? 31Wèe lɛ ntee à rkoni bfee ce vi be gèe tɛ wèe ja' cor gòr, caa bfee mo'.

Banɛ m be suŋ wèe yuu ce yi càa buu ca wɛɛwɛ sè'ni.

Currently Selected:

Ñwaè' Beâe Koreèn Ce Entombïì 12: LNT

Highlight

Copy

Compare