Ñwaè' Beâe Koreèn Ce Entombïì 11

1Kù ce gee nè ba yuu ce m ce gèe àmbò mɛ mɛ̀ ce gèe ba buu ce Jisos Krǎis à m ce gèe.

2Mɛ̀ yòŋshi wèe njobè' wèe ce kuushi buu ce mɛ̀ m yɛ'ni wèe, a ker ce gèe buu anà yɛɛnì sê. 3Mɛ̌ kòŋ tɛ wèe riŋ bòŋboŋ enɛ Jisos Krǎis yu tu nè mbaŋrùŋwɛ̀, mbaŋrùŋwɛ̀ à ba tu nè njeŋwɛ̀, Nyʉ̀ à ba tu nè Jisos Krâis. 4Ka' ba à nfè' ce mbaŋrùŋwɛ̀ ce gèe rloo, ker ba à nfè' ce e ce cep ntuu Nyʉ̀, e ka' sop rtaa mbe tù banɛ e coosi Jisos Krǎis ce e yu tu nè ye. 5Njeŋwɛ̀ ye ye ka' ce gèe rloo, kɛ̀ ce cep ntuu Nyʉ̀ ɛ̀, ke' seŋ rtaa mbe tù ka' banɛ e coosi mbaŋrùŋwɛ̀ ce e yu tu nè ye. Njeŋwɛ̀ ka' tɛ seŋ rtaa mbe tù ka' banɛ e yu àmbò njeŋwɛ̀ ce a kwàa ye tu wa'a. 6Njeŋwɛ̀ ka' kani à rseŋ rtaa mbe tù banɛ e ba bòŋlàr koo tu anà koo. À ka' ba enɛ yu rìtu nè njeŋwɛ̀ à rkwàa tu kɛ̀ koo tu ɛ̀, banɛ njeŋwɛ̀ seŋ rtaa mbe tù. 7Yi yu bòŋboŋ enɛ mbaŋrùŋwɛ̀ sop rtaa mbe tù ka', njobè' e yu rfeese Nyʉ̀, a ba fǒo Nyʉ̀, njeŋwɛ̀ à ba fǒo mbaŋrùŋwɛ̀. 8Sèe rìŋ enɛ Nyʉ̀ à m lòr nfàŋ njeŋwɛ̀ a boo mbaŋrùŋwɛ̀ àgho ka'. E m lòr nfàŋ mbaŋrùŋwɛ̀ a boo njeŋwɛ̀ àgho. 9Nyʉ̀ à m boo mbaŋrùŋwɛ̀ a fa nè njeŋwɛ̀ ka', e m boo ba njeŋwɛ̀ a fa nè mbaŋrùŋwɛ̀. 10A mbùu ce njeŋwɛ̀ à ba seŋ rtaa mbe tù fà dì' ntee yi bo yaŋ bcìndap Nyʉ̀ ka'. 11À ka' ba yi àmbò sèe ce sèe ce cu sèe Tata Jisos Krǎis wèe, njeŋwɛ̀ yu nè yi tu ka', mbaŋrùŋwɛ̀ à ba nè yi tu ka'. 12Nyʉ̀ à m lòr nfàŋ mbaŋrùŋwɛ̀ a boo njeŋwɛ̀ àgho, njeŋwɛ̀ ye ye à ba ŋwɛ̀ ce e ke bi mbaŋrùŋwɛ̀. Buu ca wɛɛwɛ à m gèe ba Nyʉ̀. 13Kwà'shi ka nè enɛ wà' yi yu yɛɛnì enɛ njeŋwɛ̀ gee rloo nè Nyʉ̀ ce e seŋ rtaa mbe tù ka' lɛ. 14Bèe wɛɛwɛ a ku riŋ enɛ mbaŋrùŋwɛ̀ ka' ko'si tu, banɛ e coosi yi tu. 15À ka' ba yi nè njeŋwɛ̀, tu ko'si à ba yuu bòŋboŋ njobè' Nyʉ̀ à m fa ye nyʉ̀'tu sàsap tɛ e bo tɛ'shi yi tu àgho. 16Ŋwɛ̀ mò' à ka' ba ce e ce sɛr yi enɛ buu ca yu wa' ka', banɛ ŋgàŋ à ba rìŋ enɛ wèr ce gèe ba buu ca, bcor wɛɛwɛ vi ce gèe wa' foŋ.

17Yuu ce m be fa wèe ncep àgho na yu ba yuu ce m be yòŋshi wèe àgho yòŋshi ka'. E ke ba à nfè' wèe à vʉ̀ àbee à rgèe rloo nè Nyʉ̀, wèe ce gèe ba ŋgěe bebep caa ŋgěe bòŋboŋ. 18Yuu entombì ce mɛ̀ yu' yi yu enɛ e ke ba à nfè' ce wèe à vʉ̀ àbee à rgèe rloo nè Nyʉ̀, ŋgàpni yi ba a wěe mʉ. Mɛ̀ yɛ mɛnɛ seemò' yi yu mini wa'a. 19Yi yu yɛɛnì enɛ ŋgàpni yi ba a wěe mʉ, njobè' e ke ba ne à nfè' ce ŋgàpni yi niŋ wa'a, wèe ka' yɛ bèe ce a yuu běe mini. 20Mɛ̀ yɛ mɛnɛ wee ke vʉ̀ àbee, vʉ ba à rye byee Tata Nyʉ̀ ka'. 21Mɛ̀ làa wa'a njobè' e ke ba à nfè' ce a ce ye byee, ŋwɛ̀ ku ce ye vi byee, ke' ce kwà'shi àmbò bèe mo' ka'. Yi lò ba wa'a, njè ce yaŋ bèe mò', bèe mò' a no mrù' mi koo wowèe.

22Njɛ̀ɛ yuu ce yi koni wèe na yu ba njɛ̀ɛ kɛ? Mbò wèe tʉr mndap ce wee ke fʉʉ embo wèe à banì yeŋger, a ker noŋger a? Yi yu bòŋboŋ enɛ wèe lor cor Nyʉ̀ à yuu cicì ker gee tɛ rìtu yi koo bèe ce a buu byee ba buu mno ka'. Yuu ce m be làa nè wèe yu kɛ? Wà' m be yòŋshi wèe a? Ka', àde' m yoŋshì wèe ka'.

23Mɛ̀ m yɛ'ni wèe buu ce Tata à m gèe mɛ̀ rîŋ. Buu anà yu enɛ, à m ba nètʉ' ce a be fyèni Tata Jisòs nà, e lor brɛ̂d, 24a yoŋshi Nyʉ̀, a bɛ'shi, a laa enɛ̂, “Ca yu yà nyor ce mɛ̀ fa a wěe btù. Ce gee nè àmbò sèe ce gèe na tɛ wèe bo ce kuushi mɛ̀.” 25Wowèe a ka' ye wɛɛ, e lor ndoŋ a laa enɛ̂, “Ndoŋ ca tɛɛ àtu lě' fi ce Nyʉ̀ à ye a bèe nè wa blɛɛ. Kuushi nè mɛ̀ à nfè' wɛɛwɛ ce wèe ka' ce no enjep ndoŋ ca.” 26Banɛ ka' ba à nfè' efɛ ce wèe ce ye byee ca, ce no enjep ndoŋ ca, wèe ce suŋ bèe àmbò rkwe Tata Jisòs, caar tɛ e ke vʉ̀. 27Banɛ ŋwɛ̀ ce e ka' tɛ ye brɛ̌d ca, ker ce no enjep ndoŋ ca à njǐ yɛɛnì ka', banɛ ŋgàŋ à lòr nyor ba blɛɛ Tata à yuu cicì. 28Tɛ ŋwɛ̀ ka' ye brɛ̌d ca, kèr no enjep ndoŋ ca, ŋgàŋ fyɛ' yì nyor bòŋboŋ ka' gee wa'a. 29Ŋwɛ̀ ce e ka' ye brɛ̂d, ker no enjep ndoŋ ca, ke' ce kuushi enɛ buu ca tɛɛ àtu nyor ba blɛɛ Tata Jisòs ka', banɛ ŋgàŋ à lòr ndòo mbe yě tù. 30A mbùu ce bèe magòr a wěe mʉ a sɛ̀, bèe mo' a ce yaŋ, bèe mo' a kweŋgèr. 31Sèe ka' fyɛ' visèe mnyor ka' ye brɛ̌d ca, ker no enjep ndoŋ ca, Nyʉ̀ sa' sèe àmbò bèe ce a gèe yuu bebep ka'. 32Tata Nyʉ̀ e ke sa' sèe wa'a ce nàshi sèe nàshi fà dì' sèe bo kè gwè mnsa', yɛ ŋgɛ' à nfè' ce e be sa' ŋgòŋ nà ka'. 33Bfʉr wâ, yi ka' ba wa'a, ka' ba à nfè' wèe à vʉ̀ àbee à rye byee Nyʉ̀, bèe mo' a fa kù kɛ̀' ce ye entombì nè bèe mò' ka'. 34Njè ka' ce yaŋ ŋwɛ̀, banɛ ŋgàŋ ye byee mbe yě ndàp ka' vʉ̂, fà dì' wèe vʉ àbee lò gèe ŋgěe bebep tɛ Nyʉ̀ sa' wèe ka'.

M be fa wèe ncep à buu mo' foŋ, à nfè' ce m ka' vʉ ca'ni wèe.

Currently Selected:

Ñwaè' Beâe Koreèn Ce Entombïì 11: LNT

Highlight

Copy

Compare