1 Kolinita 5
5
Kaliva sa'eyana Kolinita tovetumagana agaidiya gikelele.
1Atu venuwa'ata koyona ganogalina, higa kaliva sa'eyana omi tovetumagana ami yo'o agaimiya tamana vavinena gidudauvedi. Kaliva keke Yaubada hidahalamaneni-ma adi hawata hisena, higa kaliva keke wagana buye hinadauda. Tu bana kalivai-nadi omi agaimiya ma tovetumagana nonogana wagana buye himimiyami buye hidauda. 2Ha! Hidedemi yami ekelesiya kalivana gikoyo-mo'a tu omi'iyao ma taumiyao wagakahikahimi va ita omi to'ekelesiya yami wanuwahuya. Keke gakahikahi tu tagiya lakahina ma gilubodami. Kadu gilubodami be bana kalivai-nadi ana egana wanayawelina be keke bana omi buye wanavaga'auta. 3Tu iya'eku ma keke hinafamiya gadamiyami tu nuwaku ma ahe gi'ela agaimiya. Ada vaita iya omi buye kadamiyami amine, iya mena kalivai-nadi yana dewa koyo-mo'ena ma ahe gavedewayaugina be matahiwadi ginanuhagana. 4-5#1Ti 1:20Omi Kaiwabu Yesu ana eganeya wanavaga'auta ana toveya, ada nuwaku ahe gina'ela agaimiya fa'ina iya omi buye kanavaga'auta amine, kadu Kaiwabu Yesu yana faiwala ide buye kana'ayauneni yo bana kalivai-nadi ana egana kanayawelina ada Setani againe kanahegenauwena. Setani againe kanahegenauwena be higa vita moya'aina againe wowona gina'ivebwavina. Wowona ana ivebwavi againe kaliva dibuna koyona ana nuwanuwa ginayawowola-yo alu'aluwana Yaubada ginakibababalena Kaiwabu yana vedewayauga ana toveya.
Tovetumagana udo'udona wanawavina.
6Atu taumiyao wagakahikahimi ma keke gidalubodani. Fa'ina dewa koyona agaimiya gidadauda. Isi gaitoma kabi'ona tu falawa hinagene ginauna tu beledi matatabuna gitubuga amine, meda kaliva sa'eyanaga yana dewa koyona ginanauna moya'aimi agaimiya ginadamadamana. 7#Yem 12:21; Yo 1:29Yami dewa koyona vaita isi amine gitubutubuga-ma wanahegena be beledi keke isi buye hidavilani-ma amine wanayamumu. E, Keliso yami koyona ahe givaihegena fa'ina wayegayega. Tafalolo ana egana Abamaduviviya ana toveya yadi sifi kabi'ona himununa be gi'alika amine, meda Keliso yada sifi ide fa'ideya gi'alika be yada koyona ginavaihegena fa'ina. 8#Yem 12:15Keliso yana alika ide fa'ideya yada wavemwamwala kananuwanuwa'udu'uduna higa badi miYuda Abamaduviviya ana toveya beledi isi buye hivilana-ma hihege-'owona amine, meda ide tobohiyadeyao adi kivekoyo ana nuwanuwa kadu yada dewa koyona matatabuna kanahege-'owona be kananuwanuwa sa'eyana kadu kananuwanuwa velemo'ena.
9Kadu tobohiyakweyao, yami leta boi ga'etoladina-ma againe gagahemi gagayo, “Keke kaliva vevine udo'udodiyao buye wanamiyami.” 10Badi Yaubada keke hidahalamaneni-ma fa'idiya keke gadagahe, higa badi udo'udodiyao o matadi gi'alalaka ada kikai'afudiyao, o ka'i balauma agaidiya hivetuvetumagana amanadi. Ka'i nuwanuwami babi ana kaliva koyodiyao matatabudi wananuyabuyabudi digo, hami wanana? Au hida babi wanahegena, fa'ina melala moya'aina agaidiya koyona gidadauda. Keke amifaiweya. 11#Ef 5:3,7Tu yaku nuwanuwa ga'etoladina-ma higa vaita hai kaliva tauna givewagana tovetumagana tu mali vevine buye hidauda o matana gi'alalaka o balauma agaidiya givetuvetumagana o kaliva giveyainedi o gufa koyona giyuyu-fa'ila o ka'i lokoloko gikiki'afuna, medema kalivai-nadi keke buye wanamiyami. E, keke bana yami manuweya wanavega'auleni be buye wana'a.
12-13 #
2Veh 17:7
Tu badi Yaubada keke hidahalamaneni-ma fa'idiya keke gadagahe, fa'ina badi kalivai-dina iya keke ganavedewayaugidi. Mema keke aku vehimeya. Au Yaubada badi kalivai-dina ginavedewayaugidi. Tu hai Yaubada yana kaliva sa'eyana ginakoyo, medema omi tovetumagana wanavedewayaugina, fa'ina mema ami vehimeya. Fa'ina Veyao Tuwaina ana buki gigahe amine wanahuluva gigayo,
Kaliva sa'eyana omi Yaubada yana yo'ogaga agaimiya ginakoyo amine o, wanawavina be ginana.
Fa'ina bana kaliva wagana buye hidauda-ma wanawavina be ginana.
Currently Selected:
1 Kolinita 5: viv
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
