1 Kolinita 6

Tovetumagana miya-kawokawowodiyao agaidiya hikotukotu

fa'ina Folo gidakeyedi.

1Tu tobohiyakweyao kadu ganagahe. Ka'i tamo hakwadi omi tovetumagana agaimiya tobohiya buye wanavekwageya amine, gavadi-yo usimana-yo miya-kawokawowodiyao agaidiya wakotu? Gavai'ona-yo keke tovetumagana ami yo'o agaidiya uda'aliyeni-yo hidavedewayaugini? Medema yami dewa keke gidalubodani. 2Yaubada yana yo'ogaga ada vehimeya omi keke ma'i wadahalamaneni? Aimo tova mulina ide Yaubada yana yo'ogaga badi tomiyababi moya'aidi kanavedewayaugidi. Ka'i omi tovetumagana aimo tomiyababi moya'aidi wanavedewayaugidi, au makewa tova adamoya mena gaitoma kabi'ona fa'ina amifaiweya wanavedewayauga. 3Kadu Yaubada yana yo'ogaga ada vehimeya sa'eyana ma'i wanuwenuwena o keke? Ide lobama ana tovenuwa'ata kanavedewayaugidi ma'i wahalamanena o keke? Ka'i mena faisewa lakahina aimo lobameya wana'abina, au makewa amifaiweya hida babi ana gaitoma fa'ina wanavehimeya. 4Mene tamo kaliva adi egana keke lakahina omi tovetumagana agaimiya o keke? Ka'i nuwanuwami babi ana gaitoma fa'ina buye wanavekwageya amine, mena kaliva adi egana kabi'ona omi matamiya ma badi agaidiya wadakotu. Badi kaliva kabi'odiyao nonogana adifaiweya hinavedewayaugimi. 5Au hidedemi gagahe be wanawowomumu fa'ina. Omi vaita keke tonuwahuya-yo badi tovetumagana hivekwageya-ma keke wadavedewayaugidi. Mene tamo kaliva tonuwahuya gimimiyami o keke? 6Vaita yami vekwageya fa'ina tovetumagana yami yo'o agaidiya wadalukahihiyeni be ginahavaina fa'ina, tu keke. Au tovetumagana sa'eyana tobohiyana yana koyona fa'ina gisimana ada badi Yaubada keke hidavetumaganeni-ma hivedewayaugidi. Medema keke gidalubodani.

7 # Md 5:39-40; 1Te 5:15 Tu omi tovetumagana buye wavekwavekwageya-yo wasimasimana ma keke hagihagina Yaubada matane. Au mema huluva koyona ma vaita keke Yaubada yana eda againe wadanunaudadana. Ka'i tobohiya sa'eyana againiya ginakivekoyo tu una'atuvefa'ilena, au medema gilubodana. Kadu ka'i tamo ya mani o ya lokoloko ginaki'afuna tu una'atuvefa'ilena, au medema gilubodana. 8Tu omi'iyao ma keke tobohiyamiyao yadi kivekoyo wada'atuvefai'ileni. Au taumiyao tobohiyamiyao wakikivekoyodi, badi agaidiya wakikai'afu. E, tobohiyamiyao nonogana hidedemi wahuluhuluva.

9-10 # Ef 5:5; Ha 22:15 Wanogali! Badi tova moya'aina hihuluhuluva koyona amanadi keke-mo'a Yaubada yana abageya yana yo'ogaga buye hinaluku. Keke wananuwanuwafani. Hida kalivai-dina keke hinaluku higa udo'udodiyao,

o badi balauma agaidiya hivetuvetumagana,

o kaliva vavinena gikiloweni tu mali vevine buye hidauda, meda anafaiweya kwamayoku mali kaliva buye hidauda,

o badi kaliva hivetuvetubo o ka'i vevine hivemavemai,

o kikai'afudiyao o badi matadi gi'alalaka,

o badi gufa koyona ana yu-fa'ila againe hivekwavakwava,

o toveyaina o tomunugakai'afu,

e hida kaliva koyodiyao adi loi keke Yaubada yana abageya yana yo'ogaga buye hinaluku. 11#Ta 3:3-7Boi tuwaina aimo keke wadavetumagana ana toveya, tufoimi mena kaliva koyodiyao adi loi amine wahuluhuluva. Tu Kaiwabu Yesu Keliso ana eganeya kadu yada Yaubada Alu'aluwana yana faiwala againe ahe watowa be wayegayega, Yaubada yana yo'ogaga fa'ina ahe gisevehailemi be Yesu Keliso againe wahawahegemi, ada omi kaliva yegayegamiyao Yaubada matane.

Wowoda kana'itave'avina be againe Yaubada ana egana

kanakilakahina.

12Tu tufoimi wagahe wagayo, “Keke tamo gavadi hawahawatana iya fa'ikuya. Au dewa moya'aina akufaiweya.” Au wagahe velemona tu keke dewa moya'aina agaidiya yamumu kananuhagani. Taumadi dewa moya'aina akufaiweya tu dewa tufona keke ganahuluvini be dewai-nadi keke ginavehimeyeku fa'ina. 13#1Te 4:3-4Kadu tufoimi wagahe wagayo, “A'a kamoda ana giba, ada kamoda gidadauda be a'a kana'ana fa'ina.” Hidedemi wagahe tu aimo tova mulina Yaubada yana vehimeya againe a'a ginahavaina, kadu kamoda ginahavaina. Tu wowoda ma keke gidadauda be kana'udo'udo fa'ina, keke. Wowoda gidadauda be Kaiwabu yana giba fa'ina, kadu Kaiwabu givehivehimeyena be gidadauda yamumuna. 14#Lo 8:11; 2Ko 4:14Yaubada yana faiwala againe Kaiwabu wowona alikeya gisivemididina, kadu meda anafaiweya ide ginasivemididida. 15#1Ko 12:27Wanogali! Omi wowomi Yesu Keliso wowona talaina. Wowoku Keliso wowona talaina fa'ina, keke wowoku kwamayoku yamayamadadana wowona buye ganave'atutamo'aini, keke-mo'a. 16#Aba 2:24Hai kaliva wowona kwamayoku yamayamadadana wowona buye hinave'atutamo'aina, medema wowodi au givesa'eya ma ma'i wahalamanena o keke? Meda Veyao Tuwaina ana buki kaliva kwamayoku yadida fa'ina gigahe gigayo,

Badi adi'iselu hinavewowotamo'ai.

17Tu hai kaliva nuwana Kaiwabu nuwana buye ginave'atutamo'aina, medema Kaiwabu buye hive'aluwatamo'ai.

18Dewa udo'udona wanavekwaulaugena. Mali dewa koyona keke kaliva wowona ginakivekoyoni, tu kaliva yana dewa udo'udona againe tauna wowona ginakivekoyona. 19#1Ko 3:16Ka'i mene wahalamanena omi wowomi Alu'aluwa Mahalina yana manuwa? Higa Bana Yaubada omi agaimiya gihawahegeni-yo nuwahinagemiya gimimiyami. Wowomi keke taumiyao yami giba. Omi Yaubada yana giba. 20#1Fi 1:18-19Fa'ina fata lakahina againe gitutuvehobumi be yana giba fa'ina. Hidema fa'ina keke wowomi dewa koyona againe wanahawahegeni, au wowomi wana'itave'avina be yami dewa hagihagina againe kaliva Yaubada ana egana hinakilakahina.

Currently Selected:

1 Kolinita 6: viv

Highlight

Copy

Compare