1 Kolinita 4

Yaubada anakaibe yana tofaisewa yamumuna o koyona

fa'ina gina'itanuwenuwedi.

1Tu ime yami tovehawala ma fa'imeya ka'i gavaimi wananuwanuwa? Wananuwanuwa vaita ime Keliso yana tofaisewa kadu Yaubada yana nuwanuwa sevasevauyana ana to'itave'avina, higa yana nuwanuwa fa'ina anakivetuvetunumi. 2Omi wahalamanena hai kaliva to'itave'avina yadi faisewa gi'abina, medema gilubodana be yana wa'idibumuhiga ana vehimeya gida'itave'avina. 3Kaiwabu anakaibe yaku faisewa yamumuna o koyona ma ginalagana. Ka'i omi tovetumagana wanalagaku o ka'i vedewayauga amine kaliva hina'itanuwenuweku o, keke hidema fa'ina gadanuwanuwa lakahina. Kadu keke tauku gadalagaku. 4Keke tamo yaku faisewa ana koyona fa'ina vita ase'asekuya gada'ayauneni, tu hidedemi ga'ayaunena omi keke amifaiweya wadahalamaneni ka'i iya gagahe velemo'ena o ka'i keke. Kaiwabu anakaibe ase'aseku gihalamanena be gina'itanuwenuweku. 5Kaiwabu babiya ginayewa'ela ana toveya gaitoma sevasevauyana uyu'uyuyune gidadauda-ma kabu'avane ginaseyemaunena, kadu kaliva yada nuwahinage gina'ivemogatalina. Ada medema tovai-nadi gaveyao yadi faisewa yamumuna, medema sa'eyana sa'eyana Yaubada Tauna ginahawaveyamumuyedi. Hidema fa'ina Kaiwabu yana tova wanabodana. Keke tova hidevama kaliva yadi faisewa ka'i hagihagina o ka'i koyona ma wanalagani.

MiKolinita taudiyao adi egana hiyakahina fa'ina Folo gidakeyedi.

6Tobohiyakweyao, iya'eku Afolosi ami tonagona ama'iselu fa'imeya ahe galukahihi. Yama faisewa Yaubada fa'ine omi hinafamiya ahe galukahihiyena. Kadu hawata kaliva adi ailaga fa'ina galukahihiyena. Ama'iselu ama egana aba'ita fa'ina gayakahina be ami tonagona moya'aima fa'imeya wananuwanuwa tunutunugina. Nuwanuwaku gahe sa'eyana ana nuwanuwa wanahalamane-hagihagiyena higa “Hawata Yaubada bonana eto'etoladina againe wana'itave'avina.” Ka'i yana hawata wana'itave'avina amine, keke tonagona sa'eyana fa'ine wana'alatutula tu tonagona sa'eyana wanakihobuyeni. 7Tobohiyaku, hakwadi gigahe-yo vaita o kikaiwabu tu tobohiya keke kikaiwabuna? Hai ya nuwahuya o ya gava'adi moya'aina inubana? Yaubada againe. Yaubada againe uvaina fa'ina, keke unaselakalaka vaita tauni ya nuwanuwa againe udavaini.

8 # Ha 3:17 Wa'itami, omi mene gahalamanemi gaitoma moya'aina amifaiweya. E, ahe wavekaliva. Ime Folo Afolosi aimo fanifanimeyao tu omi ahe wakaiwabu. Taumadi makewa iya nuwanuwaku higa vaita omi wadakaiwabu velemo'ena be ime kadu omi buye kadakaiwabu. 9Fa'ina iya ganuwanuwa vaita Yaubada gidavehimeya be ime afositolo kaliva kabisomeyao amine adamiyami. Givehimeya be tuwaina tolugaviya nibaidiyao tufoidi hikive'avidi ada hinauwedi wai hinagoyedi be hinaluve'alikadi amine, mali kaliva ime wai hinagoyema be kaliva moya'aidi matadiya analika. E, tomiyalobama kadu tomiyababi hi'ita'ita-kwanekwanema vaita ime kaliva kowakowameyao. 10Ime Keliso bonana alulumamalena fa'ina, kaliva matadiya ime tokwavakwava tu omi Keliso yana kaliva fa'ina mene vaita yami wanuwahuya lakahina. Ime kowakowameyao tu omi mene vaita ve tumagana againe fifiwalamiyao. Omi higa vaita kikaiwabumiyao tu ime kabisomeyao kaliva matadiya. 11#2Ko 11:23-27Ime kabisomeyao kaliva matadiya fa'ina tuwaina be anunauwena tova adamoya mafu gilaulauma, agoma gitaitaina, kaleko koyona a'ose'osena. Kaliva himunumunukoyokoyoma kadu ime togatogadadanimeyao. 12#Af 18:3; Lu 6:28Yama laumamala fatana keke adavivaini. Tova moya'aina taumeyao nimameya afififaisewa toyogina be amaga ama kevakeva ana mani ananuhagana fa'ina. Kaliva hihawave'avima againe, badi fa'idiya ave'o'ola be Yaubada ginanuwakabubuyedi. Kaliva hikivekoyoma againe, a'atuvefa'iledi. 13Kaliva ama egana hihawavekabi'oyena digo, bona bikabikana amine bonadi afatana. E, tuwaina be hinunauwena hida bai-nadi ime vaita yogo amine yo'o matatabudi matadiya. Yogo uledi vevine melaleya higiligilina-ma amine, ime kaliva hihawave'iyohoyohoyema.

Folo miKolinita gihawavenatunedi be tavagine

hinanunudadana fa'ina.

14Natukweyao, keke hidede amine gadadakeyemi-yo ganakivewowomumumi fa'ina. Au omi vaita natu'ase'asekweyao amine fa'ina hidede amine ga'etoladi be ganakivetuvetunumi fa'ina. 15Kaliva keke sa'eyadi vaita agetoga amine himiyamiyanemi, tu tamamiyao keke moya'aidi. Iya akukaibe tamami fa'ina Venuwa'ata Yamumuna agaimiya gamidilumamalena be Yesu Keliso yana yo'ogaga agaidiya waluku, ada au hidede amine ga'ivetubugimi. 16#Fl 3:17Omi higa natukweyao fa'ina, gagahegahevagadonemi be tavagikuya wananunudadana. 17#Fl 2:22Nuwanuwaku tavagikuya wananunudadana fa'ina, Timoti agaimiya ga'iveninisena. Bana'e natu'ase'aseku Kaiwabu yana yo'o agaidiya, kaliva bonabona'abina. Bana ga'iveninisena be iya Yesu Keliso yana kaliva yaku dewa fa'ina nuwami ginatalafolena, mena dewai-nadi tovetumagana yadi yo'o moya'aidi fafali tulina tulina agaidiya gavehavehawala amine.

18Atu tufoimi wanuwanuwa vaita aku tovelugagaga Timoti ga'iveninisena tu iya tauku keke gana'ela gana'itami fa'ina wanuwanuwalaka. 19Tu Kaiwabu ginahawahegeku amine, tova kabi'ona omi agaimiya gana'ela be tauku ganahalamanena ka'i badi hiselakalaka kalivai-dina ma Yaubada yana faiwala againe hififaisewa o ka'i higahegahe-kawowo. 20#1Ko 2:4Wa'ita, Yaubada yana yo'ogaga kalivai-dina adi iya'iyaya keke gahegahe au dewa hagihagina ana seyemauna Yaubada yana faiwala againe giyemuyemu amanadi. 21Gavaimi wanuwanuwa? Ka'i kaliva natuneyao tagadi kuluna gitafitafidi-ma amine gana'ela be ganakivetuvetunumi? O ka'i yami dewa ahe wa'ihagihagiyena fa'ina, yaku wanuwayamumu gana'ela be bona bikabikana amine ganagahegahemi? Aimo taumiyao.

Currently Selected:

1 Kolinita 4: viv

Highlight

Copy

Compare