Рут 2
2
Рутниң Боазниң етизида башақ териши
1Наоминиң ери Әлимәләкниң уруқ-әвладидин Боаз исимлиқ бай һәм абройлуқ бир туққини бар еди.
2Бир күни Рут Наомиға:
— Етизға берип башақ теришимгә мақул болсиңиз, маңа илтипат көрситидиған бирәр адәмниң кәйнидә жүрүп, башақ терәй, — деди.
— Мәйли, барғин қизим, — деди Наоми.
3Рут етизға берип, омичиларниң кәйнидин меңип, чүшүп қалған арпа башақлирини тәрди. Бу етиз дәл Боазниң еди.
4Рут етизда башақ териватқанда, Боаз Бәйтләһәмдин кәлди. У омичиларға:
— Пәрвәрдигар силәргә яр болғай! — дәп салам бәрди.
— Пәрвәрдигар сизгә бәхит ата қилғай! — дәп салам қайтурди уларму.
5Боаз омичиларға җавапкар кишидин:
— Әву кимниң қизи екән? — дәп сориди.
6У:
— У моаблиқ қиз екән, Наоми билән биргә Моабтин кәпту. 7У мәндин омичиларниң кәйнидин меңип, арпа бағлиридин чүшүп қалған башақларни теривелишни сориди. Сәһәрдин бери териватиду, кәпидә пәқәт бир аз арам алди, — дәп җавап бәрди. 8Боаз Рутниң йениға берип, униңға:
— Әй қизим, гепимгә қулақ салғин! Башқиларниң етизиға берип, башақ териш хиялида болмиғин. Бу йәрдә аял хизмәткарлиримниң қешида тәргин. 9Омичилар қәйәрдә ома ориса, сән аяллар билән биргә шу йәргә барғин. Әр омичилиримға сени бозәк қилмаслиқни тапилаймән. Уссисаң, улар тошқузуп қойған комзәкләрдин су елип ичкин, — деди.
10Рут Боазниң алдида тизлинип, бешини йәргә тәккүзүп:
— Немишкә мәндәк бир мусапирға илтипат көрситип, бунчивала ғәмхорлуқ қилисиз? — деди.
11Боаз униңға:
— Сән тул қалғандин кейин, қейинанаңға вападар болғанлиғиңни аңлидим. Сениң ата-анаң вә жутуңдин кетип, бу ят хәлиқ ичигә қандақ келип қалғанлиғиңдин толуқ хәвирим бар. 12Қилған яхшилиқлириңни Пәрвәрдигар өзәңгә яндурғай. Сән қанити астида паналиқ издигән Пәрвәрдигар, йәни исраиллар етиқат қилип кәлгән Худа саңа мол илтипатини яғдурғай, — деди.
13Рут униңға:
— Ғоҗам, сиз маңа бәк чоң яхшилиқ қилдиңиз, гәрчә мән сизниң хизмәткарлириңиздин болмисамму, маңа шундақ мулайим сөзләрни қилип, көңлүмгә тәсәлли бәрдиңиз, — дәп җавап қайтурди.
14Тамақ вақти болғанда, Боаз Рутқа:
— Қени, кәлгин, нанға еғиз тәккин. Аччиқсуға тәккүзүп йегин, — деди.
Рут омичилар билән биллә олтарди. Боаз униңға қомачтин елип бәрди. У тойғичә йеди вә ашуруп қойди. 15Рут орнидин туруп йәнә башақ тәргили кәткәндә, Боаз әр омичилириға:
— У бағланған бағламларниң арисида жүрүп тәрсиму уни тосимаңлар вә көңлини рәнҗитмәңлар. 16Һәтта униң үчүн бағламлардин азирақ суғуруп чиқирип қоюңлар. Уни әйиплимәңлар, — дәп тапилиди.
17Шуниң билән Рут кәч киргичә етизда башақ тәрди. У терип кәлгән арпа башақлирини соқуведи, йерим халтидәк дан чиқти. 18Рут арписини көтирип, шәһәргә қайтип кәлди вә қейинанисиға қанчилик арпа тәргәнлигини көрсәтти һәм ешип қалған тамиғини елип униңға бәрди. 19Наоми униңға:
— Бунчивала көп арпини қәйәрдин терип кәлдиң? Сән кимниң етизида иш қилдиң? Саңа ғәмхорлуқ қилған шу кишигә Худа бәхит бәрсун! — деди.
Рут қейинанисиға өзиниң Боазниң етизида ишлигәнлигини ейтип бәрди. 20Наоми роһланған һалда:
— Бизгә вә өлүп кәткән әрлиримизгә өз мәрһәмитини көрсәткән Боазға Пәрвәрдигар зор бәхит яғдурсун! — дәп дуа қилди. У йәнә:
— У киши бизниң йеқин туққанлиримизниң бири болиду. Униң бизгә қараш җавапкарчилиғи бар, — деди. Рут:
21— У йәнә мениң таки ома аяқлашқичә өз омичилириниң кәйнидин башақ теришимгә рухсәт бәрди, — деди.
22Наоми келинигә:
— Қизим, шундақ қилғин! Боазниң аял хизмәткарлири билән биллә ишлигин. Әгәр башқа кишиләрниң етизлириға барсаң, сени бозәк қилиши мүмкин, — деди.
23Шундақ қилип Рут арпа, буғдайлар орулуп болғанға қәдәр, Боазниң аял хизмәткарлири билән биргә башақ тәрди. У қейинаниси билән биллә туривәрди.
Currently Selected:
Рут 2: HZUTCYR
Highlight
Share
Copy
Want to have your highlights saved across all your devices? Sign up or sign in
Uyghurche Muqeddes Kitab Jemiyiti