Рут 3
3
Рутниң Боаз билән көрүшүши
1Бир мәзгил өткәндин кейин, Наоми келини Рутқа:
— Һәй қизим, мән саңа башпана болидиған бир әр тапай, сән әнди өй-очақлиқ болғин. 2Сән аял хизмәткарлири билән биргә етизда ишлигән Боазниң бизгә туққан екәнлигини билисәнғу. Сөзүмни аңлиғин! Бүгүн кәчтә у хаманда арпа соруйду. 3Сән үсти-бешиңни жуюп, өзәңгә хуш пурақлиқ нәрсиләрни чечип, чирайлиқ кийимлириңни кийип, хаманға барғин. Лекин у сениң у йәргә барғанлиғиңни билмисун. У алди билән яхши ғизалансун. 4Униң ятидиған йерини көрүвалғин. У йетип болғанда, чандурмай берип, йотқинини ечип, униң аяқ тәрипидә йетивалсаң, у саңа немә қилиш керәклигини ейтиду, — деди.
5— Сиз немә десиңиз мән шуни қилимән, — дәп җавап қайтурди Рут.
6Шуниң билән Рут хаманға берип қейинанисиниң дегинидәк қилди. 7Боаз йәп-ичип болғандин кейин, көңли азадә болуп раһәтләнди вә хаман догисиниң кәйнидә йетип, уйқиға кәтти. Рут тивиш чиқармай, Боазниң йотқининиң аяқ тәрипини ечип, шу йәрдә ятти. 8Түн йерими болғанда, Боаз туюқсиз ойғинип олтарди. У аяқ тәрипидә бир аялниң ятқинини көрүп, һәйран болуп:
9— Сән ким? — дәп сориди.
— Бу мән Рут, чакириңиз. Сиз мениң һалимдин хәвәр елиш мәҗбурийитиңиз болған йеқин туққиним. Шуңа сиз қанитиңизни маңа сайә қилип, мени әмриңизгә алсиңиз! — деди Рут.
10Боаз униңға:
— Әй қизим, Пәрвәрдигар саңа көп бәхит ата қилсун! Сениң һазир ериңниң уруқ-әвладиға көрситиватқан садақитиң бурун көрсәткән садақитиңдинму артуқтур. Чүнки сән пули болсун-болмисун бир яшни тапалаттиң, лекин ундақ қилмидиң. 11Қизим, ғәм қилмиғин! Сениң тәләп қилғанлириңниң һәммисини орунлап беримән, чүнки шәһәрдикиләрниң һәммиси сениң бир яхши аял екәнлигиңни билиду. 12Мән һәқиқәтән сениң йеқин туққиниң, бирақ билгинки, саңа мәндинму йеқин йәнә бир адәм бар. 13Бүгүн кечә бу йәрдә қалғин. Әтә сәһәрдә мән униң билән параңлишип, униң саңа туққанлиқ һәққини өтәшни халайдиған-халимайдиғанлиғини билип бақай. У өзиниң борчини ада қилип, сени әмригә алса яхши, бу иш шундақ болсун. Әгәр халимиса, Пәрвәрдигар алдида қәсәм қилимәнки, сени өзәм әмримгә елип, борчимни ада қилимән. Әнди сән таң атқичә бу йәрдә йетип тур! — деди.
14Рут униң аяқ тәрипидә ятти. Лекин таң сүзүлүштин бурун орнидин турди, чүнки Боаз униң бу йәргә кәлгәнлигини башқиларниң билип қелишини халиматти.
15Боазму орнидин туруп униңға:
— Мүрәңдики йепинчаңни елип, ечип тутуп турғин, — деди.
У шундақ қилди. Боаз униңға бир халта кәлгидәк арпини усуп, мүрисигә артип қоюп, өзи шәһәргә кәтти.
16Рут өйигә қайтип барғинида, қейинаниси униңдин:
— Ишлириң қандақ болди, қизим? — дәп сориди.
Рут Боазниң өзи үчүн қилған ишлирини қейинанисиға ейтип бәрди.
17— У мени сизниң алдиңизға қуруқ қол қайтмисун дәп, бу йепинчидики арпини бәрди, — деди Рут.
18Наоми униңға:
— Бу ишларниң ахири чиққичә, бу җайда сәвир қилип турғин. Боаз бүгүн бу ишларни пүткүзмәй болди қилмайду, — деди.
Currently Selected:
Рут 3: HZUTCYR
Highlight
Share
Copy
Want to have your highlights saved across all your devices? Sign up or sign in
Uyghurche Muqeddes Kitab Jemiyiti