2MAKABE 3
3
Bilga tẽng Simo zãmbo
1Tẽn-sõnga ra pida ne neb sẽn zĩ ne laafi n tũud b rog-n-mik sõmb-sõmbo. Maan-kʋʋd kãseng a Oniyas ra yaa nin-sõng menga, n da kis wẽng ne a sũur fãa. 2Dĩm dãmba kẽer me ra pẽgda do-sõngã n da kõt kũun bɛda sẽn zẽkd a yʋʋre. 3Yaa woto la Azi dĩm, a Selekus da yiisd a meng korgẽ, ligd ning b sẽn tar a soab tʋʋmde, neba yĩnga la maanda rũmsa raab yĩnga. 4Wakat n waa n zĩndi tɩ Bilga tẽng ned sẽn boond tɩ Simo paam n lebg wẽnd dooga gũuda, Nin kãng me moora waa n yõsga ne maan-kʋʋd kãsengã, daasa yãgsg poorẽ. 5A sẽn yãe t'a pa tõe n maan a Oniyas bũmbu, a babsa Tars daoa a Apoloniyus. Yẽ n da ya Sele-Siri la Fenisi komber wakat kãnga. 6A tɩ wilg-a lame tɩ Zerizalɛɛm kʋɩlen-dooga pida ne arzɛka, arzɛk sẽn ka tõe n gelg n sɛ ye. A ra zʋʋga al wʋsgo maanda ligd sẽn tog n kẽes ligd ningã. A tol n yeelame t'a tara dabaar tɩ Zerizalɛɛm arzɛka wa lebg dĩma rẽnna. 7Dẽ la a Apoloniyus tɩ sõs ne dĩma n gom ne a arzɛka yelle wala a meng sẽn wʋme. Dĩma tʋma a samand naab a Eliodor t'a tɩ wa ne arzɛkã. 8A Eliodor yiime wa a na n tɩ gesa tẽnsa sẽn be Sele-Siri la Fenisi, mik a rabd n na n tɩ pidsa dĩma daabo. 9A sẽn poog Zerizalɛɛm, maan-kʋʋd kãsengã la tẽnga tõre, deeg-a-la ne waoogre. A togsa a sẽn wʋme la a wilga a waoonga võore, n maag a meng n sok n gese arzɛka sã sɩd yaa wa b sẽn gomdã. 10Maan-kʋʋd kãsenga wilg-a lame bala tɩ yaa pʋg-kõap la kɩɩbs ligdi n be be, 11n paas a Tobi biiga a Irkã dẽnna. A Irkã da yaa tẽnga nin-kãsenga la sã n ka a Simo zirẽ-beedã, bũmb da ka be rooga pʋg n zʋʋg wanzurf waas kobs-naase la sãnem waas kobs-yi ye. 12A le wilgame tɩ b pa tog n zãmb neb niyns sẽn teeg b wẽnd doogã, sẽn ya sõngo, n tar ziirã, n wa bobel b ligda be wã ye, ned pa tõe n sɩɩs sẽn be a pʋgẽ ye.
Tẽnga rãmbgo
13A Eliodor baas n yeelame tɩ yaa tɩlɛ tɩ arzɛka kẽ dĩma koglgẽ, tɩ dĩma tʋm-a-la rẽ yĩnga. 14A yãka raare n wa kẽ n na n ges arzɛkã la tẽnga tõr yɛɛsa baraare. 15Maan-kʋʋdba yeelga b futu, n wõg maan-kugra taoore n pʋʋsd Soaala Wẽnde tɩ bãmb n wilg sẽn tõe la sẽn ka tõe n maan ne bobelle la b sõng tɩ bobella lagfr ba a ye da loog ye. 16F sã n da yãe maan-kʋʋd kãsenga nenga, f sũur da pa tõe n pa sãam ye. A nenga gãnengo, a yĩn-gãonga pelgre ra wilgda a yɩɩra sẽn ta zĩig ninga. 17A yɛɛsgã, a yĩnga rigbã ra wilgda neb niyns fãa sẽn da get-a, sũ-beed ninga sẽn da tar-a. 18Wʋsg ra zoet n yita b zagsẽ n na n naag b taab n pʋʋse, tɩ b ra nee yel-beed ning sẽn segend wẽnd dooga yĩnga. 19Pagba ra mobga b yãoog ne kʋɩdse n yi n pid soya. Kom-pugli wã paa zakẽ la kẽer da sɩndgda lalsã n getẽ tɩ kẽer lɩkd dota võẽ, tɩ kẽer lɩkd dota noy. 20B ra zɛka b nus yĩngri n pʋʋsdẽ. 21F sã n yãend neba sũ-sãanga la maan-kʋʋd kãsenga yɩɩre la a rɩgbu, b nimbãaneg yõkd-f lame. 22Bãng-y tɩ wakat ning neba sẽn waa n pʋʋsd Wẽnd tɩ b sõng tɩ ligda sẽn bĩngã 23leb b rãmba tɩ bũmb pa yãke, bãng-y tɩ yaa wakat kãng la a Eliodor yik n na n pids dĩma raabo.
A Eliodor sɩbgre
24A Eliodor kolga kʋɩlen-dooga ne a nebã la Yĩngr-Soaala, Pãng-Soaba, lika b menga. B lika b meng ne vẽenem kãsenga la vẽenema pãng komsa nini la a yaala neb niyns fãa sẽn da be-b be. 25B yãee weefo, wed-dʋʋd sẽn zombe. Wed-dʋʋda ra kẽesda rabeem la weefa ra maneg n faasame, n yɩgd ne pãnga n teesd a Eliodor a taoor nao-bendo. Yaa wa wed-dʋʋda ra yeelga sãnem fuugu. 26Neb a yiib n waa n paase n tar pãng kẽeng la neerem sẽn pid zãnga, n yeelg fu neeb sẽn ka to ye. Nin-yend yalsa a Eliodor goabga, t'a ye yals a rɩtgo, tɩ b tar a pãbre. Sapɩlem bas n vʋʋse! 27A Eliodor lʋɩɩme t'a neng sobg, tɩ b rɩk-a ne pãndare. 28N-ye! Sẽn kẽe-a kʋɩlen-doogẽ ne neb wʋsgã, ne tãb-biis sẽn ya gãndaadã, b kong n tʋk-a lame t'a meng ra ka tõe n maan fɩ la tʋkdba bãngame tɩ Wẽnd n yɩɩd fãa.
29Wẽnd pãng sẽn waa n gãneg a Eliodor t'a ka le tõe n gome, n ka le tar teegda la fãagda, 30wakat kãng tɩ Zʋɩf rãmba tara b Soaala bark pʋʋsgo, tɩ b puka b rooga sõmblem. Sẽn da be-b wẽnd dooga pʋg mars-marsã ne yɛɛsgo la rabeema, kilsame la b kɩdma sũ-noogo, likra yĩnga. 31A Eliodor tũud-n-taas kẽer yeela a Oniyas t'a kos Yĩngr-Soaala t'a wogl sẽn gãee soaba yõore t'a rat n kiime. 32Maan-kʋʋdba maana rabeem tɩ dɩma na n wa yeel tɩ yaa Zʋɩf rãmb n tʋm a Eliodor beedo; a kʋʋ maando n kos Wẽnd t'a vʋʋg-a. 33Maan-kʋʋda sẽn waa n koot a rũmsã la dap a yiibã sẽn le lik a Eliodor, ne b pĩnd futã la b yalsa yĩngr n yeel-a: «Pʋʋs maan-kʋʋd a Oniyas bark wʋsgo, tɩ yaa a kosga yĩnga la f ket n vɩ, 34la fo sẽn paam yĩngr sɩbrgã wilg b fãa Wẽnd pãng sẽn yaa a soaba.» B sẽn gom woto b loogame.
A Eliodor teemda zʋgo
35A Eliodor kʋʋ maando n pʋlem Naaba-Wẽnd sẽn wogl a yõore la a kosa a Oniyas sore n leb dĩma nengẽ ne a tãb-biisi. 36A yãee ne a nini Wẽnd tʋʋm-bãna la a ra pẽgd-b-la neba fãa taoore. 37Dĩma tɩ sok-a lame tɩ ãnda la a tõe n tʋm Zerizalɛɛm yɛsa t'a leok: 38«Y sã n tar bɛyã bɩ ninsaan-kazukemdi, tʋm-y y bɛ wã be la a sã n pa ki, a na lɛɛg n wa ne yĩng sẽn bug kaase. Sɩda yaa Wẽnd meng n wilgd b pãng zĩ-kãngã. 39Yĩngr-Soaba nif teega zĩ-kãng la a gũud-a lame. Sẽn kẽe-a be ne raab wẽnga, b wẽed-a lame n kʋ.» 40Yɛla yɩ-la a woto la rẽ me la wẽnd dooga arzɛka pa wʋk n loog ye.
Currently Selected:
2MAKABE 3: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.