2MAKABE 2
2
A Zeremi solgda wẽnd dooga teedo
1B sẽn wʋk b rãmb n kẽng yembdã paama a Zeremi sebre la sebra yeel-b lame tɩ b zɩ bugum ning b sẽn gom a yellã. 2D karemdame tɩ bãngda sẽn kɩs b Noora sebre, a sagl-b lame tɩ b ra yĩm Wẽnnaam ye la b ra bas tɩ nin-naandsa sẽn maan ne sãnem la wanzurf la te-neeb a taaba b sẽn na n yãendã kẽes b yama moog ye. 3B sẽn le paam sagls niyns yɛsa, yaa b ra bas tɩ b sũura zãag ne Noora sebr bada. 4D karma sebra pʋgẽ me tɩ bãngda kɩtame tɩ Sɛka roogo la kuga walsa koglg yãag-a, t'a rʋʋ tãng ning a Moyiiz sẽn zĩnd a soab zug n yãe Kãabg Tẽngã. 5Sebra le yetame t'a sẽn ta be, a Zeremi yãee tãng boko sẽn maneg wa roogo la a kẽesa Sɛka roogo la kuga walsa koglgã la tɩdara maan-kugrã n lɛɛg n pag boka noore. 6A tũud-n-taas kẽer sẽn da rat n lɛɛg n wa be ninga sorã b sẽn tũ wã makre la b pa le yãend sora ye. 7A Zeremi wʋma b sẽn tʋlg n maan bũm ninga la a zab-b lame. A gom-b-la woto: «Zĩiga kõn le bãnge n ta wakat ning Naaba-Wẽnd sẽn na n zoe a buuda nimbãanega n le tigma zĩ yɛnga. 8Wakat kãnga b na wilg teeda zĩiga, b ziir na puk zĩ-kãnga, b sawadg na yals a zugu, wala a Moyiiz wakatẽ, la wala a Salomo wakatẽ, a sẽn waa n pʋʋs tɩ Soaala sik b barka rooga zugu, roog sõng ning a sẽn me n kõ bãmbã.» 9Sebra ra le tẽegda a Salomo sẽn paam yam vẽenem ninga la maanda sõor sẽn yɩ a soaba wẽnd dooga baasgo la a bark ningr daare. 10Wala a Moyiiz sẽn da pʋʋs Wẽnd tɩ bugma yi yĩngri n sig n yõog maandã, woto me a Salomo pʋʋsame la bugum sigame n dɩ a me rẽnna. 11A Moyiiz yeelame: «Yaa y sẽn zãgs tɩ y kõn wãb maoongã sẽn kʋ yel-wẽna dolb yĩnga la b yõog-a bugum.» 12Wala b sẽn mii maand wakat kẽerã, a Salomo me maana kibs rasma a nii.
13Bũmb a to n paase, b wilga a Neemi vɩɩma sebr pʋgẽ t'a mee roog sɛb bĩngr yĩnga n sɩd tigim be dĩm damba kibɛ, bãngdba ne a Daviid sɛb la dĩm dãmba sẽn gʋls maanda poorẽ. 14A Zɩɩda tigsa sɛb bãmb fãa zĩ yɛng, zaba dabeem yĩnga. 15Dɩlla y sã n tar kẽer tʋʋmde bɩ y tʋm neb tɩ b wa reege.
16Yaa d sẽn segend n dat n maan d wẽnd dooga yɩlgr kibsa la d gʋlsd yãmba. Segdame t'a raarã bɩ y me maan kibsa. 17Wẽnd ning sẽn fãaga a buudu, n kõ-a pʋɩɩre, n kõ-a naam, n kõ-a maan-kʋʋdba, n kõ-a sõmblem, 18d tẽedame tɩ wala bãmb meng sẽn kãabã, Wẽnnaam na zoe d nimbãanega, n le bool d mooga ween-vɩɩsa naasã n wa tigim-do b zĩ-sõngẽ. D tẽedame tɩ bala b zoe n yiis-d-la yel-beed pʋgẽ la b yɩlga b do-sõngã.
Sebra tʋɩɩsgo
19Sirɛn Zasõ sɛba labsa la pida ne yɛl toor-toore: ad a Zɩɩda Makabe ne a ba-biis kibare, Wẽnd dooga yɩlgre, maan-kugr paalga bark ningri. 20Ad zaba ne a Antiyokus Epifan la a biiga Ewupator. 21Ad sõngr ning sẽn yi yĩngri neb niyns sẽn zab-b rog-n-mika yĩnga, tɩ ba b sẽn da ka waoogã, bɩ b tõog n deeg zĩig n yãmbe, n dig bu-zẽmba. 22Ad-b wẽnd dooga sẽn tar pẽgre zĩig zãnga reegre, tẽn-sõnga fãagre, Zʋɩf rãmba rog-n-mikab sẽn da yet tɩ b bas tɩ lʋɩ wã vʋʋgre. Dẽ fãa tõogame ne Soaala-Wẽnd yardo la b nonglem kãsengã yĩnga. 23Dẽ fãa gʋlsa Sirɛn dao a Zasõ sɛb a nu wã pʋgẽ la d kʋms-b-la sebr a yembrẽ. 24D yãeeme tɩ geelse la sõaads n pid sɛbã la kibɛ wã. B yaa wogd tɩ b karõng ya toogo, 25tɩ d dat tɩ sẽn karemd-ba karem ne yamleoogo, tɩ sẽn dat-ba n ning pʋtẽerẽ tõog n dɩk-b naana-naana, tɩ sẽn ya ned ning fãa bɩ b naf-a. 26La d sẽn yet tɩ d na n kʋmsame n ning seb yɛng pʋgẽ, ad-y yaa tʋʋm toogo la d baoo n kõ d menga. Ka nana ye, yaa kaag tʋʋlgo la zãgs gõeem tʋʋmde. 27A toolma wẽnda ned sẽn segl dɩɩbo n baood a taab sũ-noog bala. Yaa tõnd me sẽn dat n noog d taab sũuri la d dɩk tʋʋmdã. 28D basa sebra soab togs zãnga n baood togs vẽenega. 29Ro-paal sã n metẽ, rooga tõr yikr paka ro metã. Sẽn yaool n pak rooga manegda yaa a kẽ gʋl-a tɩ yɩ neer bala. 30Kẽ pʋgẽ, gilg zãnga n ges bũmba fãa a yembr-yembre paka kibara gʋlsda. 31Sã n ya sẽn kʋmsda kibẽ wã, b tog n bas-a lame t'a kʋʋse la togs n keese.
32Bɩ d sɩng kibarã n da le paas bũmb ye. D da maan yalemdo n tʋɩɩs sebra wok-woko n yaool n tẽed tɩ kibɛ wã mens na tõog n kʋʋs koees-koees ye.
Currently Selected:
2MAKABE 2: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.