2MAKABE 1
1
Zʋɩf rãmba sɛba
1D pʋʋsda d saam-biisa sẽn be Ezipt tẽnga. Yaa Zʋɩf rãmb sẽn be Zerizalɛɛm la Zɩɩda tẽng n bõsd Wẽnd y yĩnga, laafi la paoong buud fãa. 2Bɩ Wẽnd sik b kũuna, bãmb sẽn tẽr tɩ b yõga Zood ne b sõgen-sõma, a Abraam, a Izaak la a Zakoob. 3Wẽnd na ning b waoogr tʋlsem y fãa sũurẽ! Wẽnd na kɩt tɩ y reeg b noore ne nonglem la yamleoogo! 4Wẽnd na yalg y pʋtẽer tɩ y gãd b sẽn wilg yãmbã tɩ y zamaan yɩ laafi zamaan! 5Wẽnd na reeg y kosgo tɩ y pa ne bãmba tɩ b ra bas-y yel-pakdem wakat ye! 6D sẽn be ka wã, d tara pʋʋsg waare y yĩnga. 7Tõndo, y saam-biisi, d da zoe n gʋls-y lame, a Demetriyus naamẽ, koabg la pisoob la a wɛ yʋʋmde. Yɩɩ d nimbãanega la d sũ-beeda wakato, a Zasõ ne a neba sẽn waa n kong raoodo n zoe n bas d tẽn-sõngã la d ba-yirã. 8B tol n wa yõoga wẽnd dooga kʋɩlen-kãsengã la b kʋ neb sẽn ka maan-b bũmbu. Tõnd pʋʋsa Soaala la d kosga reegame. Tõnd kʋʋ maoongo la d tẽgna zom pɛɛlg kũuni. D le yõgna fitilsã, d le kõo burã. 9Marsã d gʋlsd-y lame tɩ Kislewu kiuug bɩ y maan sẽgda kibsa, 10koabg la pis-nii la a nii yʋʋmdã.
Sebr a yiib soaba
Zerizalɛɛm dãmb la Zɩɩda tẽng rãmba, b nin-kẽemse la buuda tõre n pʋʋsd a Aristobul, dĩm a Ptoleme sagenda la maan-kʋʋdba yagenga. B le naag n pʋʋsda Zʋɩf rãmba sẽn be Ezipt. Wẽnd na zĩndg b fãa ne laafi la yĩn-maasem! 11Wẽnd n fãag tõnd ne yel-beedo tɩ d pʋʋsd-b bark wʋsgo, bãmb n zabe n fãag-d dĩma nugẽ. 12Dĩma menesa neb niyns fãa sẽn yik-b zabre ne tẽn-sõngã. 13Sɩda, b tãnsoaba taa Pɛrs, n tẽed t'a tãb-biis sẽn ya gãndaadã, a na maan daoodo la ka yɩ boto a Nanea wẽnd poaka roogẽ ye; b kʋ-b lame, la rẽ tũu ne maan-kʋʋdba sɩlem. 14Ade, a Antiyokus ne a zo-rãmb tũu taab n kẽng be, tɩ rĩma n da yeele t'a rat n yii kãadem ne wẽn-poaka a Nanea, n miẽ tɩ pʋg-paala peoog na pidsa ne arzɛk kãsenga. 15Maan-kʋʋdba maaga b menga n yɛdg arzɛkã wẽn-poaka roogẽ t'a Antiyokus ne a tũud-n-taas sẽn pa waooge wa kẽe n yãende. 16Maan-kʋʋdba paga rooga noya gilli n yaool n lak võor bãmb bal sẽn da mi tiiri dooga zugu la b tũu be n lab pʋgẽ dãmba ne kuga. B lɛɛg n kẽ n pas-b lame n lob b zuta yɩnga. 17Tõnd Wẽnda paam pẽgr tɩ bãmb n teel neb sẽn sak wẽnga n tɩ lub b yaoogẽ!
Bugma kibare
18Sã n yɩ bilfu, Kislewu kiuugã piig la a nu raare, tõnd na n maana Wẽnd dooga yɩlgr kibsa. Dẽ la d tags tɩ segdame tɩ d wilg yãmb tɩ y me maan sẽgd kibsa, tɩ segdame tɩ y maan kibs n le kɩdem bugum ning sẽn widg a Neemi zamaanẽ, a sẽn waa n me wẽnd doogã la maan-kugrã, n kʋ maand n dʋʋg. 19Sɩda b sẽn wa n wʋk tõnd ba rãmba n loog Pɛrs, maan-kʋʋd sõma wã yãka, wakat kãnga, bugma sẽn wit maan-kugra zugã n bao bul kẽoogo n ning-a be. Bãng-y tɩ bugma paa be n solg tɩ ned ba a ye ka miẽ ye. 20Yʋʋma kaoosame la ne Wẽnd daabo, Pɛrs dãmb dĩma waa n tʋma a Neemi, yẽ ne maan-kʋʋdba yagense, tɩ b bao bugma b yaab rãmba sẽn da solgã. Maan-kʋʋdba yagens waa n yeelame tɩ b ka yãe bugma ye, tɩ yaa bũmb sẽn ya koaag la taalle la b yãend yã. A yeel-b lame tɩ b yõng n wa. 21Maanda sẽn waa n kʋ n sɛ, a Neemi yeela maan-kʋʋdba tɩ rɩk bõn-koaagã n bol daadã la nemdã sẽn dogl b zugã. 22B maana wa a Neemi sẽn yeelã. Sawatã sẽn da lud wĩndga waa n wɩlgame n bas-a t'a yãnge la bug kãseng n widg maan-kugra zugu tɩ neba fãa pĩ b noore. 23Bugma sẽn waa n dɩt maandã, maan-kʋʋdba la neba fãa gill da pʋʋsdame. A Zonatã n da pʋte t'a Neemi ne neb a taaba reesdẽ. 24B ra pʋʋsda woto:
«Soaala, Soaala-Wẽnde, bũmb fãa Naanda, yãmb kẽesda rabeem, y pãng ka to ye, y zemsgo la y nimbãan-zoeer ka tɛk ye, yãmb bal la dĩma, yãmb bal la sõngo. 25Yãmb la kõata, yãmb la roanda, yãmb la pãng soaba, yãmb n ka sɩngre la y kõn zĩnd sɛɛbo, yãmb n fãag a Israyɛl, a yel-pakr buud fãa pʋgẽ, n tũus d yaab rãmbã la y welg-b toore. 26Reeg yã a Israyɛl gill fãa maoongo. Da bas-y Israyɛl ye, da fãoog-y buud kãnga ne buud a taab ye. 27Tigs-y sẽn sẽege, lood-y y yemsa wĩyã, yols-y-b sẽn get b rãmb ne sãbsgo, b sẽn tʋʋsd b rãmba. Sõng-y tɩ dũni rãmba bãng tɩ yãmb la tõnd Wẽnde. 28Sibg-y sẽn namsd-b tõndo, sẽn yaand-b tõndo, ne wilg-m-menga. 29La wala a Moyiiz sẽn yeele, kɩt-y tɩ buuda kɩ yẽgna zĩ-sõngẽ.» 30Maan-kʋʋdba me ra zodogda yɩɩla. 31Maanda sẽn kʋ n sɛ, a Neemi yeelame tɩ b raal bõn-koaaga sẽn kellã kug bɛda zutu. 32La b sẽn daal n sɛ la bugma sẽn widgi. Bug-kãng maana vẽenem n yɩɩg maan-kugra rẽnna.
33Kibara sẽn waa n sãag n ta Pɛrs tɩ dĩma wʋm tɩ zĩig ning maan-kʋʋdba sẽn solg bugma, koom n puk be, t'a Neemi tall-a n yɩlg maan-kugrã la maandã, 34a kɩtame tɩ b me zĩigã n gũbg la a lebga zĩ-sõngo; a reng n dɩɩ yella kaseto m mik tɩ yaa sɩda. 35Dĩma sẽn dɩk zĩ-sõngã n bas ne b rãmba da wat n kõt-a-la yõod wʋsgo. 36A Neemi boola kooma tɩ neftar, dat n yeelame tɩ yɩlgr koom. Neb a taaba yẽ ra boond-a lame tɩ naft.
Currently Selected:
2MAKABE 1: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.